ຖືວ່າຜ່ານພົ້ນໄປແບບຈົບງາມສໍາລັບ ການມາຮັບໃຊ້ທີມຊາດລາວ ຊຸດໃຫຍ່ ຄັ້ງທໍາອິດຂອງ ໄມເຄິລ ວ່າງ ນັກເຕະເຊື້ອສາຍລາວ-ອາເມຣິກາ ໂດຍຟອມການຫຼິ້ນຖືວ່າໂດດເດັ່ນ ແລະ ເຂົ້າຕາແຟນບານຊາວລາວ ເປັນຢ່າງຍິ່ງ ດ້ວຍການພາທີມຊາດລາວ ລົງສະໜາມ 3 ນັດຊະນະ 1 ນັດ ແລະ ເສຍ 2 ນັດຄວ້າອັນດັບ 2 ລາຍການ Prime Minister 3 Nations Cup 2023 ທີ່ປະເທດເນປານ ໃນທ້າຍເດືອນມີນາ 2023.
ລາຍການດັ່ງກ່າວ ໄມເຄິລ ວ່າງ ກາຍເປັນຄີແມນຂອງ ທີມຊາດລາວ ຊຸດໃຫຍ່ ຢ່າງແທ້ຈິງ ໄດ້ຮັບໂອກາດລົງສະໜາມເປັນຕົວຈິງເຖິງ 3 ນັດ ສາມາດຫຼິ້ນເຂົ້າກັບທີມ ແລະ ຊ່ວຍທີມໄດ້ເປັນສ່ວນ ໂດຍສະເພາະສາມາດປະສານງານຂອງ ສຸກອາພອນ ວົງຈຽງຄໍາ ກັບ ບຸນພະຈັນ ບຸນກອງ 2 ຕົວເກັ່ງຂອງທີມຊາດລາວ ໄດ້ເປັນຢ່າງດີ ເຊິ່ງຜົນງານນັດທໍາອິດເສຍໃຫ້ກັບ ເນປານ 0-2, ກ່ອນທີ່ນັດທີ 2 ຈະສາມາດ ເອົາຊະນະ ບູຖານ 2-1 ຜ່ານເຂົ້າຮອບຊີງຊະນະເລີດເສຍໃຫ້ກັບ ເນປານ ອີກຄັ້ງ 1-2 ຄວ້າອັນດັບ 2 ໄປຄອງ.
ໄມເຄິລ ວ່າງ ໃຫ້ສໍາພາດເນື່ອງໃນໂອກາດມາຮັບໃຊ້ທີມຊາດລາວ ຊຸດໃຫຍ່ ວ່າ: ຄວາມຮູ້ສຶກທໍາອິດ ຂ້ອຍຮູ້ສຶກດີໃຈຫຼາຍ, ຂ້ອຍຮັກປະເທດລາວ, ປະເທດລາວງາມຫຼາຍ ແລະ ເປັນກຽດທີ່ສຸດ ທີ່ຂ້ອຍໄດ້ກັບມາຢ້ຽມຢາມ ບ້ານເກີດຂອງພໍ່-ແມ່ຂ້ອຍ ເຊິ່ງຂ້ອຍກໍໄດ້ເຫັນກິລາບານເຕະລາວ, ມັນເປັນເລື່ອງດີ ທີ່ມີການພັດທະນາໃນຫຼາຍປີທີ່ຜ່ານມາ, ຄອບຄົວຂອງຂ້ອຍ ຮູ້ສຶກຕື່ນເຕັ້ນ, ເປັນກຽດ ແລະ ມີຄວາມສຸກຫຼາຍ ທີ່ຂ້ອຍໄດ້ເປັນສ່ວນໜຶ່ງຂອງ ທີມຊາດລາວ ສຸດທ້າຍ ຂໍຂອບໃຈແຟນບານ ແລະ ສະຫະພັນບານເຕະແຫ່ງຊາດລາວ ທີ່ເຮັດໃຫ້ຂ້ອຍໄດ້ມາຢູ່ບ່ອນນີ້ ເປັນນັກເຕະຂອງ ທີມຊາດລາວ.
ຄລິບສໍາພາດໄມເຄິລ ວາງ
ສ່ວນ ຊີເກມ ຄັ້ງທີ 32 ທີ່ປະເທດກໍາປູເຈຍ ເປັນເຈົ້າພາບໃນເດືອນພຶດສະພາ 2023 ໄມເຄິລ ວ່າງ ແມ່ນບໍ່ໄດ້ຮ່ວມທີມຊາດລາວ ຊຸດດັ່ງກ່າວ ເນື່ອງຈາກປີນີ້ເຈົ້າພາບຊີເກມ ກໍານົດເອົານັກເຕະອາຍຸບໍ່ເກີນ 22 ປີ ເຊິ່ງແຕກຕ່າງຈາກຄັ້ງທີ່ຜ່ານມາ ເຮັດໃຫ້ ໄມເຄິລ ວ່າງ ອົດຮັບໃຊ້ທີມຊາດລາວ ຊຸດຊີເກມ ເນື່ອງຈາກອາຍຸ 23 ປີແລ້ວ.
ຂ່າວ: Larh Creators; ຮູບ-ວີດໂອຈາກ: ສຕລ
