ໃນເຊົ້າມື້ນີ້ ວັນທີ 10 ເມສາ 2023, ທ່ານ ຫວໍ ວັນ ເຖືອງ ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍຄະນະຜູ້ແທນຂັ້ນສູງ ໄດ້ເດີນທາງເຖິງ ສະໜາມບິນສາກົນວັດໄຕ, ນະຄອນຫລວງວຽງຈັນເປັນທີ່ຮຽບຮ້ອຍແລ້ວ ໂດຍຕອບສະໜອງຕາມຄໍາເຊີນຂອງ ທ່ານ ທອງລຸນ ສີສຸລິດ ເລຂາທິການໃຫຍ່, ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ອອກຕ້ອນຮັບຄະນະຜູ້ແທນໂດຍ ທ່ານ ນາງ ເຂັມມະນີ ພົນເສນາ ຫົວໜ້າຫ້ອງວ່າການສໍານັກງານປະທານປະເທດ (ລັດຖະມົນຕີກຽດຕິຍົດ) ແລະ ຄະນະ ຊຶ່ງທ່ານ ຫວໍ ວັນ ເຖືອງ ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍຄະນະຜູ້ແທນຂັ້ນສູງ ຈະເດີນທາງຢ້ຽມຢາມ ຢ່າງເປັນທາງການ ສປປ ລາວ ແຕ່ວັນທີ 10-11 ເມສາ 2023, ເພື່ອເພີ່ມທະວີ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ ແລະ ຫວຽດນາມ.
ທ່ານ ຫວໍ ວັນ ເຖືອງ ປະທານປະເທດຄົນໃໝ່ຂອງ ສສ ຫວຽດນາມ ເກີດເມື່ອວັນທີ 13 ທັນວາ 1970 ທີ່ ຕາແສງ ອານເຟືອກ , ເມືອງ ແມ້ງທິ , ແຂວງວິ້ງລອງ ລະດັບການສຶກສາຂອງເພິ່ນແມ່ນຈົບປະລິນຍາຕີ ສາຂາປັດຊະຍາ, ປະລິນຍາໂທ ສາຂາວິທະຍາສາດ ສັງຄົມ ແລະ ມະນຸດສາດ, ລະດັບທິດສະດີການເມືອງ: ຂັ້ນສູງ, ພາສາຕ່າງປະເທດ ພາສາ ອັງກິດ.
ກ່ອນຈະມາດຳລົງຕຳແໜ່ງເປັນປະທານປະເທດແມ່ນທ່ານໄດ້ເປັນກໍາມະການສໍາຮອງ ສູນກາງພັກ ຊຸດທີ X; ກໍາມະການສູນກາງພັກ ຊຸດທີ XI, XII ແລະ XII; ເລຂາທິການສູນກາງພັກ ຊຸດທີ XII ແລະ XIII; ກໍາມະການກົມການເມືອງສູນກາງພັກ ຊຸດທີ XII ແລະ XIII; ຮອງສະພານິຕິບັນຍັດ ຊຸດ XII, XIV ແລະ XV.
ແລະມາຮອດເດືອນ ມີນາ 2023 ທ່ານໄດ້ຮັບເລືອກເປັນກໍາມະການກົມການເມືອງສູນກາງພັກ, ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ.
