ໃນອາທິດຜ່ານມາ ສະຖານທູດສະຫະລັດອາເມຣິກາ ໄດ້ຈັດກອງປະຊຸມຖະແຫຼງຂ່າວໂຕະມົນຂຶ້ນ ທີ່ສູນອາເມຣິກາທາດດຳ ກ່ຽວກັບຍຸດທະສາດອິນໂດ – ປາຊີຟິກ ແລະ ການພົວພັນຮ່ວມມືລະຫວ່າງ ສະຫະລັດອາເມຣິກາ ແລະ ສປປ ລາວ ໂດຍການຖະແຫຼງຂອງທ່ານ ນາງ ທ່ານ ຄາເມວ ພອນ ດໍສັນ ( Camille P.Dawson ) ຮອງຜູ້ຊ່ວຍລັດຖະມົນຕີຕ່າງປະເທດ ຫ້ອງການອາຊີຕາເວັນອອກ ແລະ ປາຊີຟິກ, ກະຊວງການຕ່າງປະເທດ ສະຫະລັດອາເມຣິກາ ແລະ ມີບັນດາສື່ມວນຊົນເຂົ້າຮ່ວມ.
ທ່ານ ນາງ ຄາເມວ ພອນດໍສັນ ກ່າວບາງຕອນວ່າ: ນີ້ເປັນຄັ້ງທຳອິດຂອງຂ້າພະເຈົ້າ ທີ່ໄດ້ມາຢ້ຽມຢາມ ສປປ ລາວ ເຊິ່ງຂ້າພະເຈົ້າຮູ້ສຶກດີໃຈຫຼາຍ. ສະຫະລັດອາເມຣິກາ ກັບ ສປປ ລາວ ແມ່ນມີຫຼາຍດ້ານທີ່ພວກເຮົາໄດ້ມີການພົວພັນຮ່ວມມືກັນ ແລະ ມີຫຼາຍດ້ານທີ່ຈະສືບຕໍ່ສ້າງຄວາມເຂັ້ມແຂງ ລວມທັງກັບພາກພື້ນອີກດ້ວຍ.
ການຮ່ວມມືສອງຝ່າຍ ລະຫວ່າງ ສະຫະລັດອາເມຣິກາ ແລະ ສປປ ລາວ ມີບັນຍາກາດທີ່ດີ ແລະ ມີປະສິດທິຜົນໃນຫຼາຍດ້ານ ໂດຍສະເພາະການຮ່ວມມືແກ້ໄຂບັນຫາລະເບີດບໍ່ທັນແຕກຕົກຄ້າງຢູ່ລາວ ເຊິ່ງນັບແຕ່ປີ 1995 ເປັນຕົ້ນມາ ສະຫະລັດອາເມຣິກາ ໄດ້ປະກອບສ່ວນງົບປະມານຫຼາຍ ກວ່າ 310 ລ້ານໂດລາສະຫະລັດ ເຂົ້າໃນວຽກງານດັ່ງກ່າວ. ນອກນີ້, ສະຫະລັດອາເມຣິກາ ກໍໄດ້ສືບຕໍ່ຮ່ວມມືໃນວຽກງານໂພຊະນາການ, ການສຶກສາ, ສາທາລະນະສຸກ, ກະສິກໍາ, ການສ້າງຄວາມເຂັ້ມແຂງດ້ານວຽກງານກົດໝາຍ ແລະ ຂົງເຂດອື່ນເປັນຈໍານວນຫຼາຍໃນໄລຍະຜ່ານມາ.
ແນວໃດກໍຕາມ, ສະຫະລັດ ອາເມຣິກາ ກໍເຫັນວ່າຍັງມີອີກຫຼາຍດ້ານທີ່ຢາກສືບຕໍ່ຮ່ວມມືກັບ ສປປ ລາວ ໂດຍສະເພາະການລົງທຶນໃສ່ການພັດທະນາໃນອະນາຄົດຂອງ ສປປ ລາວ ເປັນຕົ້ນແມ່ນການສະໜັບສະໜູນປັບປຸງພາກທຸລະກິດຂອງລາວໃຫ້ເຂັ້ມແຂງ, ຊຸກຍູ້ໃຫ້ຜູ້ປະກອບການ ຫຼື ນັກທຸລະກິດ ຂອງສອງປະເທດໄດ້ຮ່ວມມືກັນນັບມື້ຫຼາຍຂຶ້ນ.
ນອກນີ້, ກໍຈະສ້າງເງື່ອນໄຂ ແລະ ໂອກາດທີ່ເອື້ອອໍານວຍຫຼາຍຂຶ້ນ ໃຫ້ແກ່ການຮ່ວມມືຂອງພາກປະຊາຊົນ ໂດຍເນັ້ນໃສ່ການສົ່ງເສີມການສຶກສາຂອງໄວໜຸ່ມ, ການແລກປ່ຽນວັດທະນະທໍາ ແລະ ການທ່ອງທ່ຽວ ລະຫວ່າງ ປະຊາຊົນສອງປະເທດ ລວມເຖິງການເສີມສ້າງ ຄວາມເຂັ້ມແຂງໃຫ້ແກ່ການສ້າງຜູ້ນໍາໄວໜຸ່ມ.
ນອກຈາກນີ້ອາເມຣິກາ ຍັງມີຍຸດທະສາດ ໜຶ່ງທີ່ສຳຄັນກໍຄືຮ່ວມມືກັບກັບພາກພື້ນ ໃຫ້ກາຍເປັນພາກພື້ນແຫ່ງເຊື່ອມໂຍງເຊື່ອມຈອດ.
