ມື້ນີ້ແອັດມິນຢູ່ທີ່ແຂວງຊຽງຂວາງ ເພື່ອຮ່ວມພິທີເປີດງານງານມະຫາກຳກິລາແຫ່ງຊາດ ທີ່ແຂວງຊຽງຂວາງ ສະພາບອາກາດແມ່ນເລີ່ມໜາວເຢັນ ອຸນຫະພູມຕ່ຳສຸດ 10 ອົງສາ ແລະ ມີລົມພັດໃນລະດັບຄ່ອຍ ນຳເອົາຄວາມໜາວເຢັນຕ້ອນຮັບຊຽງຂວາງເກມ.
ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດ ໃນໄລຍະວັນທີ 12 ຫາ 18 ທັນວາ 2022 ວ່າ: ໄລຍະວັນທີ 12 ຫາ 16 ທັນວາຄວາມກົດດັນສູງຂອງອາກາດເຢັນທີ່ປະເທດຈີນ ຈະແຜ່ລົງປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງປານກາງ ຊື່ງຈະເຮັດໃຫ້ອາກາດເຢັນຢູ່ທົ່ວໄປຢູ່ໃນແຕ່ລະພາກ ຫາ ແຮງ, ສົມທົບກັບກະແສລົມຕາເວັນອອກສ່ຽງໜືອພັດປົກຄຸມ ແລະ ອາກາດຈະໜາວເຢັນຫາໜາວເຢັນຫຼາຍຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ, ພ້ອມມີໝອກໜາປົກຫຸ້ມໃນຕອນເຊົ້າ ແລະ ຈະມີຝົນຕົກໃນລະດັບຄ່ອຍ ຢູ່ບາງທ້ອງຖິ່ນ.
ຈາກນັ້ນໃນໄລຍະວັນທີ 17 ຫາ 18 ທັນວາ 2022 ຄວາມກົດດັນສູງຂອງອາກາດເຢັນທີ່ປະເທດຈີນ ຈະແຜ່ລົງປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງແຮງ, ສົມທົບກັບກະແສລົມຕາເວັນອອກສ່ຽງເໜືອທີ່ມີກຳລັງແຮງພັດປົກຄຸມ, ຊື່ງຈະເຮັດໃຫ້ອາກາດໜາວເຢັນລົງຕື່ມອີກຢູ່ໃນແຕ່ລະພາກ ແລະ ຈະມີລົມພັດແຮງຢູ່ທົ່ວໄປ.
ນອກຈາກນີ້, ຍັງມີຄຳເຕືອນມວນອາກາດໜາວເຢັນຈາກປະເທດຈີນໄດ້ມີກໍາລັງແຮງເພີ່ມຂື້ນ ຈະແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ໄລຍະວັນທີ 15 ຫາ 18 ທັນວາ 2022 ຊຶ່ງຈະເຮັດໃຫ້ອຸນຫະພູມອາກາດໜາວເຢັນລົງ 3 ຫາ 5 ອົງສາ ຢູ່ເຂດພູສູງ, ພູດອຍ ແລະ ຮ່ອມພູ ເຊັ່ນ: ບັນດາແຂວງ ພາກເໜືອ, ແຂວງ ໄຊສົມບູນ ແລະ ເຂດພູພຽງບໍລະເວນ ອາກາດຈະໜາວເຢັນຫຼາຍ.
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອຳນາດການປົກຄອງ ແລະ ອົງການຈັດຕັ້ງທຸກພາກສ່ວນ ຈົ່ງມີສະຕິກຽມພ້ອມຮັບມືກັບສະພາບການປ່ຽນແປງຂອງອຸນຫະພູມ, ອາກາດໜາວເຢັນຫຼາຍ.
ທ່ານໃດຈະມາຊົມ ແລະ ມາເຊຍໃນງານມະຫາກຳກິລາແຫ່ງຊາດທີ່ແຂວງຊຽງຂວາງ ກໍຢ່າລືມໃສເສື້ອກັ້ນໜາວ ເນື່ອງຈາກສະພາບອາກາດຢູ່ທີ່ນີ້ຂ້ອນຂ້າງໜາວເຢັນຫຼາຍໄລຍະອາທິດນີ້.
