ໃນໂອກາດທີ່ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ໃຫ້ກຽດຕ້ອນຮັບການເຂົ້າຢ້ຽມພົບປະ ຂອງ ທ່ານ ລີ ຢົງ ຊົນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳລາວ ໃນວັນທີ 22 ສິງຫາ ນີ້ ທີ່ຫ້ອງຮັບແຂກກະຊວງ ອຄ, ເນື່ອງໃນໂອກາດທີ່ ທ່ານ ມະໄລທອງ ກົມມະສິດ ໄດ້ຮັບຕຳແໜ່ງເປັນລັດຖະມົນຕີກະຊວງ ອຄ ຄົນໃໝ່. ສອງຝ່າຍ ໄດ້ປຶກສາຫາລືກັນ ເພື່ອຊອກຫາຊ່ອງທາງ ແລະ ໂອກາດໃນການສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສອງປະເທດ ເນື່ອງຈາກຜ່ານມາການຮ່ວມມືໃນຂົງເຂດນີ້ຍັງບໍ່ເຂັ້ມແຂງເທົ່າທີີ່ຄວນ.
ທ່ານລັດຖະມົນຕີກະຊວງ ອຄ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ທ່ານ ລີ ຢົງ ຊົນ ທີ່ໄດ້ມາພົບປະຢ້ຽມຢາມ ແລະ ສະແດງຄວາມຍິນດີ ໃນຄັ້ງນີ້. ສຳລັບດ້ານການຄ້າສອງຝ່າຍ ໃນໄລຍະຜ່ານມາແມ່ນມີມູນຄ່າໜ້ອຍຫຼາຍ ເມື່ອທຽບກັບຫຼາຍປະເທດ ຊຶ່ງໃນ 7 ເດືອນ ຕົ້ນປີ 2022 ມູນຄ່າການຄ້າລະຫວ່າງສອງປະເທດ ສາມາດປະຕິບັດໄດ້ພຽງ 28.467 ໂດລາ ໃນນັ້ນ, ມູນຄ່ານໍາເຂົ້າປະຕິບັດໄດ້ 21.667 ໂດລາ ແລະ ມູນຄ່າສົ່ງອອກ 6.800 ໂດລາ. ດ້ານການລົງທຶນ, ເລີ່ມແຕ່ປີ 2008 ມາຮອດປັດຈຸບັນ ການລົງທຶນຂອງ ສປປ ເກົາຫຼີ ໃນ ສປປ ລາວ ມີພຽງ 1 ຫົວໜ່ວຍວິສາຫະກິດ ແລະ ມູນຄ່າການລົງທຶນ 800 ລ້ານກີບ ໂດຍລົງທຶນໃນຂະແໜງບໍລິການ ສະໜັບສະໜູນ ແລະ ຄຸ້ມຄອງບໍລິຫານ.
ເພື່ອເປັນການສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດໃຫ້ຫຼາຍຂຶ້ນ; ສອງຝ່າຍ ໄດ້ປຶກສາຫາລືເຖິງຄວາມເປັນໄປໄດ້ ກ່ຽວກັບການກໍານົດວັນ ແລະ ເວລາ ເພື່ອສືບຕໍ່ຈັດກອງປະຊຸມຄະນະກຳມາທິການຮ່ວມ ເພື່ອການຮ່ວມມືດ້ານເສດຖະກິດ, ການຄ້າ, ວິທະຍາສາດ-ເຕັກໂນໂລຊີ ລະຫວ່າງ ສປປ ລາວ ແລະ ສປປ ເກົາຫຼີ ຄັ້ງທີ 4 ທີ່ມີແຜນຈະຈັດຂຶ້ນໃນປີ 2016 ທີ່ ພຽງຢາງ ສປປ ເກົາຫຼີ ແຕ່ໄດ້ເລື່ອນມາຮອດປັດຈຸບັນ ເນື່ອງຈາກໄລຍະນັ້ນ ສະພາບການຍັງບໍ່ເໝາະສົມ ເພາະຫຼາຍຂະແໜງຂອງສອງຝ່າຍບໍ່ທັນກຽມພ້ອມ ຊຶ່ງປັດຈຸບັນ ສອງຝ່າຍຕ້ອງໄດ້ຄົ້ນຄວ້າພິຈາລະນາກັບຫຼາຍພາກສ່ວນທີ່ກ່ຽວຂ້ອງ ເພື່ອກໍານົດເນື້ອໃນ ແລະ ວຽກງານທີ່ຈະຮ່ວມມືກັນໃຫ້ລະອຽດຕື່ມ. ນອກນີ້, ກໍໄດ້ປຶກສາຫາລື ເພື່ອຊອກຫາຊ່ອງທາງ ແລະ ໂອກາດໃນການສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສອງປະເທດ ອີກດ້ວຍ.
ທ່ານ ມະໄລທອງ ກົມມະສິດ ກ່າວຕື່ມວ່າ: ລັດຖະບານ ສປປ ລາວ ກໍຄື ຂະແໜງ ອຄ ມີຄວາມມຸ່ງໝັ້ນ ທີ່ຈະສະໜັບສະໜູນ ແລະ ສົ່ງເສີມໃຫ້ມີການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສອງປະເທດໃຫ້ມີຄວາມເຂັ້ມແຂງ. ເຖິງແມ່ນວ່າໃນໄລຍະຜ່ານມາ ຈະມີຄວາມພະຍາຍາມຊຸກຍູ້ສົ່ງເສີມວຽກງານດັ່ງກ່າວ ແຕ່ກໍຍັງມີຫຼາຍປັດໄຈທີ່ເປັນບັນຫາ ແລະ ອຸປະສັກ ເຊັ່ນ: ໄລຍະທາງ, ບັນຫາດ້ານການຂົນສົ່ງສິນຄ້າ ລວມທັງບັນຫາສາກົນອື່ນໆ ຊຶ່ງແນ່ນອນໃນອະນາຄົດ ສອງຝ່າຍຈະໄດ້ເຮັດວຽກຮ່ວມກັນຫຼາຍຂຶ້ນ ເພື່ອສົ່ງເສີມວຽກງານດັ່ງກ່າວ.
ໃນໂອກາດດຽວກັນ, ທ່ານ ລີ ຢົງ ຊົນ ກໍໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງ ລາຍງານສະພາບການພັດທະນາເສດຖະກິດ-ສັງຄົມ ແລະ ຜົນສຳເລັດໃນການປະຕິບັດວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ສປປ ເກົາຫຼີ ໃຫ້ທ່ານລັດຖະມົນຕີຊາບ, ພ້ອມທັງ ສະແດງຄວາມຊົມເຊີຍຕໍ່ ທ່ານ ມະໄລທອງ ກົມມະສິດ ທີ່ໄດ້ດຳລົງຕໍາແໜ່ງ ເປັນລັດຖະມົນຕີ ກະຊວງອຸດສາຫະກຳ ແລະ ການຄ້າ ຄົນໃໝ່. ພ້ອມນັ້ນ, ທ່ານ ລີ ຢົງ ຊົນ ຍັງໄດ້ໃຫ້ຄຳໝັ້ນສັນຍາວ່າ ຈະພະຍາຍາມຢ່າງສຸດຄວາມສາມາດ ເພື່ອຊຸກຍູ້ການພົວພັນຮ່ວມມືສອງຝ່າຍ ລາວ – ສປປ ເກົາຫຼີ ໃຫ້ສືບຕໍ່ໄດ້ຂະຫຍາຍຕົວຍິ່ງໆຂຶ້ນໃນຕໍ່ໜ້າ ແລະ ຈະສືບຕໍ່ສະໜັບສະໜູນຊ່ວຍເຫຼືອ ສປປ ລາວ ໃນບັນດາໂຄງການຕ່າງໆ ແລະ ກິດຈະກຳການຮ່ວມມືໃຫ້ຫຼາຍຂຶ້ນ ເພື່ອສົ່ງເສີມການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ໃຫ້ມີບ້າດກ້າວຂະຫຍາຍຕົວ.
