ສຳນັກຂ່າວຣອຍເຕີ ລາຍງານວ່າ ບໍລິສັດໂຕໂຍຕ້າ ເປີດເຜີຍວ່າ ຫຼາຍປະເທດໃນໂລກ ຍັງບໍ່ພ້ອມປ່ຽນໄປນຳໃຊ້ລົດຍົນທີ່ປອດມົນລະພິດ ຈຶ່ງເຮັດໃຫ້ໂຕໂຍຕ້າ ບໍ່ຮ່ວມລົງນາມໃຫ້ຄຳໝັ້ນສັນຍາກັບອີກ 6 ຄ້າຍລົດ ວ່າຈະຍົກເລີກຜະລິດລົດທີ່ນຳໃຊ້ ນ້ຳມັນ ໃນປີ 2040.
ໂຕໂຍຕ້າ ເປີດເຜີຍວ່າ ຖ້າຫາກວ່າ ຫຼາຍປະເທດ ມີຄວາມພ້ອມໂຄງສ້າງດ້ານພະລັງງານ ແລະ ສະຖານີສາກພະລັງງານ ຕະຫຼອດຮອດດ້ານເສດຖະກິດ ແລະ ຜູ້ບໍລິໂພກ, ໂຕໂຍຕ້າ ກໍພ້ອມຮ່ວມສົ່ງເສີມ ແລະ ສະໜັບສະໜູນການປ່ຽນແປງດ້ວຍການຜະລິດ ແລະ ສົ່ງລົດເຂົ້າສູ່ຕະຫຼາດ.
ແນວໃດກໍຕາມ ຫຼາຍປະເທດ, ຫຼາຍພື້ນທີ່ໃນທະວີບອາຊີ, ອາຟຣິກກາ ແລະ ຕາເວັນອອກກາງນັ້ນສະພາບແວດລ້ອມອາດຍັງບໍ່ເໝາະສົມແກ່ການຜັກດັນການຂົນສົ່ງໄຮ້ມົນລະພິດ ເຊິ່ງພວກເຮົາຄິດວ່າ ຕ້ອງໃຊ້ເວລາໃນການພັດທະນາຕໍ່ໄປ, ດັ່ງນັ້ນ ໂຕໂຍຕ້າ ຈຶ່ງຍັງບໍ່ສາມາດໃຫ້ຄຳໝັ້ນສັນຍາໄດ້ໃນຂະນະນີ້.
