ອົງການອະນາໄມໂລກ ( WHO ) ຕັ້ງເປົ້າສັກວັກແຊັງປ້ອງກັນໂຄວິດ – 19 ໃຫ້ແກ່ປະຊາກອນທຸກປະເທດ ໃຫ້ໄດ້ 40% ພາຍໃນປີນີ້ ແລະ ກວມເອົາ 70% ໃນປີ 2022 ໂດຍຕັ້ງເປົ້າສົ່ງມອບວັກແຊັງໃຫ້ປະເທດທີ່ມີລາຍຮັບຕ່ຳກ່ອນ ໂດຍສະເພາະໃນທະວີບອາຟຣິກກາ.
ຜູ້ອຳນວຍການໃຫຍ່ອົງການອະນາໄມໂລກ ກ່າວວ່າ: ໃນວັນທີ 8 ຕຸລາ 2021 ອົງການອະນາໄມໂລກ ໄດ້ປັບຍຸດທະສາດໃໝ່ ເພື່ອໃຫ້ບັນລຸເປົ້າໝາຍການສັກວັກແຊັງປ້ອງກັນໂຄວິດ – 19 ທົ່ວໂລກໃນກາງປີ 2022 ໂດຍຍຸດທະສາດໃໝ່ນີ້ໄດ້ກຳນົດເສັ້ນທາງທີ່ພວກເຮົາທຸກຄົນຕ້ອງຮ່ວມມືກັນ ເພື່ອໃຫ້ບັນລຸເປົ້າໝາຍໃນການສັກວັກແຊັງແກ່ປະຊາກອນທຸກປະເທດ ໃຫ້ໄດ້ 40% ພາຍໃນທ້າຍປີນີ້ ແລະ 70% ໃນກາງປີໜ້າ.
ຜູ້ອຳນວຍການໃຫຍ່ WHO ກ່າວອີກວ່າ: ການທີ່ຈະບັນລຸເປົ້າໝາຍດັ່ງກ່າວນັ້ນ ຈະຕ້ອງການວັກແຊັງຢ່າງໜ້ອຍ 10,1 ພັນລ້ານໂດສ ເຊິ່ງເປັນບັນຫາໃນການຈັດສັນແຕ່ບໍ່ແມ່ນການສະໜອງ ເນື່ອງຈາກວ່າກຳລັງການຜະລິດວັກແຊັງທົ່ວໂລກໃນຂະນະນີ້ ປະມານ 1,5 ຕື້ໂດສຕໍ່ເດືອນ ຈຶ່ງມີວັກແຊັງພຽງພໍຕໍ່ການບັນລຸເປົ້າໝາຍ ຖ້າຫາກວ່າມີການຈັດສັນຢ່າງເທົ່າທຽມກັນ.
ທັງນີ້, ອີງຕາມຂໍ້ມູນຂອງ WHO ລະບຸວ່າ: ມາຮອດປັດຈຸບັນທົ່ວໂລກໄດ້ສັກວັກແຊັງປ້ອງກັນໂຄວິດໄປແລ້ວ ຈຳນວນ 6,4 ພັນລ້ານໂດສໃນທົ່ວໂລກ ແລະ ປະຊາກອນໂລກເກືອບ 1/3 ໄດ້ຮັບການສັກວັກແຊັງຄົບໂດສແລ້ວ. ແນວໃດກໍຕາມ, ປະເທດທີ່ມີລາຍຮັບຕ່ຳໄດ້ຮັບການສັກວັກແຊັງຕ່ຳກວ່າ 0,5% ຂອງວັກແຊັງທົ່ວໂລກ, ສ່ວນຄົນໃນທະວີບອາຟຣິກກາທີ່ໄດ້ຮັບການສັກວັກແຊັງຄົບໂດສແລ້ວບໍ່ເຖິງ 5% ຂອງຈຳນວນປະຊາກອນ.