ມາຮອດປັດຈຸບັນ ລິໂອເນລ ເມສຊີ ກອງໜ້າຊາວອາກຊັງຕິນ ສາມາດເຮັດແຮັກທຣິກ ( ຍິງ 3 ປະຕູຕໍ່ນັດ ) ເປັນຄັ້ງທີ 7 ກັບທີມຊາດແລ້ວ ຫຼັງຈາກທີ່ຍິງ 3 ປະຕູໃນການຄັດເລືອກ ບານໂລກ 2022 ຮອບຄັດເລືອກ ໂຊນອາເມຣິກາໃຕ້ ເມື່ອວັນທີ 9 ກັນຍາ 2021 ທີ່ຜ່ານມາ ຊ່ວຍໃຫ້ ອາກຊັງຕິນ ເປີດບ້ານເອົາຊະນະ ໂບລີວີ 3-0.
ຈາກ 3 ປະຕູດັ່ງກ່າວຍັງເຮັດໃຫ້ ເມສຊີ ສ້າງສະຖິຕິຍິງປະຕູໃຫ້ທີມຊາດຫຼາຍທີ່ສຸດ ນັບສະເພາະໃນພາກພື້ນອາເມຣິກາໃຕ້ ລວມ 79 ປະຕູຈາກ 153 ນັດ ທຳລາຍສະຖິຕິຂອງ ເປເລ ອະດີດກອງໜ້າທີມຊາດບຣາຊິນ ທີ່ຍິງໄດ້ 77 ປະຕູ ຈາກ 92 ນັດ ໃນລະຫວ່າງປີ 1957–1971.
ນອກນັ້ນ, ຍັງຊ່ວຍໃຫ້ ທີມຊາດອາກຊັງຕິນ ຍັງບໍ່ເສຍໃນ 22 ນັດຫຼ້າສຸດລວມທຸກລາຍການ ໃນນີ້ ຊະນະ 15 ສະເໝີ 7 ພ້ອມຊ່ວຍໃຫ້ ທີມຊາດອາກຊັງຕິນ ແຂ່ງ 8 ນັດ ມີ 18 ຄະແນນ ຊະນະ 5 ສະເໝີ 3 ຢູ່ອັນດັບ 2 ຂອງກຸ່ມ ໃນບານໂລກ 2022 ຮອບຄັດເລືອກ ໂຊນອາເມຣິກາໃຕ້.
ຮູບຈາກ: AP
