ຄຣິສເຕຍໂນ ໂຣນັລໂດ ກອງໜ້າທີມຊາດປ໊ອກຕຸຍການ ກາຍເປັນນັກເຕະທີ່ຍິງປະຕູໃນນາມທີມຊາດຫຼາຍທີ່ສຸດໄປແລ້ວ ຈໍານວນ 111 ປະຕູ ຫຼັງຈາກທີ່ຍິງຄົນດຽວ 2 ປະຕູໃນທ້າຍເກມຊ່ວຍ ປ໊ອກຕຸຍການ ເປີດບ້ານເອົາຊະນະ ສາທາລະນະລັດໄອຣ໌ແລນ 2-1 ໃນການແຂ່ງຂັນບານໂລກ 2022 ຮອບຄັດເລືອກ ໂຊນເອີຣົບ ກຸ່ມ A ເມື່ອວັນທີ 1 ກັນຍາ 2021.
.
ກ່ອນນັດດັ່ງກ່າວ ໂຣນັລໂດ ຄອງອັນດັບ 1 ຮ່ວມກັບ ອາລີ ດາອີ ຕໍານານດາວຍິງທີມຊາດອີຣານ ທີ່ຈໍານວນ 109 ປະຕູ, ແຕ່ 2 ປະຕູໃນນັດທີ່ພາ ປ໊ອກຕຸຍການ ເອົາຊະນະ ສາທາລະນະລັດໄອຣ໌ແລນ 2-1 ໃນນາທີໆ 89 ກັບ 90 ເຮັດໃຫ້ ໂຣນັລໂດ ກ້າວຂຶ້ນມາເປັນນັກເຕະທີ່ຍິງປະຕູໄດ້ຫຼາຍທີ່ສຸດໃນທີມຊາດແບບດ່ຽວໆ.
ນອກນັ້ນ, ໂຣນັລໂດ ຍັງສ້າງສະຖິຕິລົງສະໜາມໃຫ້ກັບທີມຊາດປ໊ອກຕຸຍການ ເປັນນັດທີ 180 ເຊິ່ງເປັນນັກເຕະຈາກພາກພື້ນເອີຣົບ ທີ່ລົງແຂ່ງຂັນໃຫ້ກັບທີມຊາດຫຼາຍທີ່ສຸດຮ່ວມກັບ ເຊຄິໂອ ຣາມອສ ກອງຫຼັງທີມຊາດແອັດສະປາຍ ອີກດ້ວຍ.
ຮູບຈາກ: AP