ໄດ້ແລ້ວຜູ້ຊະນະເລີດການແຂ່ງຂັນເດາະບານຊີງເງິນລ້ານ 2021, ສ່ວນ ອ໊ອບ R9 ຈົບອັນດັບ 4

489

ການແຂ່ງຂັນເດາະບານຊີງເງິນລ້ານໃນຫົວຂໍ້ທີ່ວ່າ “ຢຸດເຊື້ອ ເພື່ອຊາດ ເດາະບານຢູ່ບ້ານ ລຸ້ນເງິນລ້ານ ກັບ  ສຸກອາພອນ ວົງຈຽນຄຳ” ສໍາເລັດຢ່າງເປັນທາງການເມື່ອທ້າຍອາທິດທີ່ຜ່ານມາ. ຂະນະທີ່ ທ້າວ ອິນທະວົງ ອິນສີຊຽງໃໝ່ ຫຼື ນ້ອງ ອ໊ອບ R9 ( ໂຣນັລໂດ ປະເທດລາວ ) ຮອບ 2 ນີ້ສ້າງສະຖິຕິເດາະບານໄດ້ 3.600 ຄັ້ງ ແຕ່ຮອບສຸດທ້າຍຈົບອັນດັບທີ 4.

ການແຂ່ງຂັນເດາະບານຊີງເງິນລ້ານ ມີນັກກີລາເຂົ້າຮ່ວມທັງໝົດ 50 ຄົນ ກ່ອນຄັດເອົາ 25 ຄົນເຂົ້າຮອບ 2 ແລະ ຄັດເອົາ 10 ຄົນສຸດທ້າຍເຂົ້າຮອບສຸດທ້າຍ, ເຊິ່ງຮອບສຸດທ້າຍແຂ່ງຂັນໃນວັນທີ 30 ກໍລະກົດ 2021 ເຊິ່ງໂຈດຮອບສຸດທ້າຍຍາກພໍສົມຄວນຄື: ເດາະບານໂຊລີລາ ໂດຍບານຕ້ອງບໍ່ຕົກ ໃຜມີທ່າຫຼາຍສຸດແມ່ນຈະເປັນແຊ້ມດາະບານເງິນລ້ານ; ໃນຮອບນີ້ແມ່ນຈະໃຫ້ຜູ້ເເຂ່ງຂັນສົ່ງຄລິບເດາະໂຊລີລາຂອງໂຕເອງໃຫ້ທີມງານ ໂດຍບໍ່ໃຫ້ກາຍມື້ທີທີມງານກຳນົດໄວ້ ແລະ ຄລິບຕ້ອງບໍ່ຜ່ານການຕັດຕໍ່ ຫຼື ແກ້ໄຂເດັດຂາດ; ຕ້ອງໃຊ້ໝາກບານທີ່ສູບຕຶງທີ່ໃຊ້ສຳລັບແຂ່ງຂັນເຕະບານຫ້າມໃຊ້ບານແວບ ຫຼື ລັກສະນະທີ່ບໍ່ໄດ້ໃຊ້ສຳລັບການແຂ່ງຂັນເຕະບານ ແລະ ເກີບທີ່ໃຊ້ເດາະໃຊ້ເກີບຫຍັງກໍໄດ້ທີ່ນັກກີລາຖະໜັດທີ່ສຸດ
ຜ່ານການແຂ່ງຂັນປາກົດວ່າ:
ສຳພະສິດ ຫຼວງອາໄພ ຕົວແທນຈາກນະຄອນຫຼວງ ຄືຜູ້ຊະນະເລີດອັນດັບ1 ແຊັມເດາະບານເງິນລ້ານຄົນທຳອິດຂອງປະເທດລາວ ຮັບລາງວັນລວມມູນຄ່າ 6.200.000 ກີບ ( ເງິນສົດ 2.000.000 ກີບ ພ້ອມບັດ ແທນເງິນສົດຈາກ Evo 1.000.000 ກີບ, ບັດສັ່ງອາຫານຈາກ Food panda 1.800.000 ກີບ ແລະ ດື່ມໂຄກຟຣີ 1 ປີ ).
ສອນເພັດ ຮຸ່ງມີໄຊ ຕົວແທນຈາກແຂວງ ຫຼວງພະບາງຄືຮອງຊະນະເລີດອັນດັບ 2, ຮັບລາງວັນລວມ ມູນຄ່າ 3.400.000 ກີບ ( ເງິນສົດ 1.000.000 ກີບ ພ້ອມບັດແທນເງິນສົດຈາກ Evo 500.000 ກີບ. ບັດສັ່ງອາຫານຈາກ Food panda 1.200.000ກີບ ແລະ ດື່ມໂຄກຟຣີ 6 ເດືອນ ).
ວິລະກອນ ວິໄລທອງ (ບຣູໂນ້) ຕົວແທນຈາກ ນະຄອນຫຼວງວຽງຈັນ ຮອງຊະນະເລີດອັນດັບ 3, ຮັບລາງວັນລວມ ມູນຄ່າ 1.700.000 ກີບ ເງິນສົດ 500.000 ກີບ ພ້ອມບັດແທນເງິນສົດຈາກ Evo 300.000 ກີບ, ບັດສັ່ງອາຫານຈາກ Food panda 600.000 ກີບ ແລະ ດື່ມໂຄກຟຣີ 3ເດືອນ.

["]

ຂະນະທີ່ ນ້ອງ ອ໊ອບ R9 ນັກເຕະດາວເດັ່ນ ຈົບອັນດັບທີ 4 ໄປຢ່າງໜ້າເສຍດາຍຕາມຫຼັງອັນດັບ 3 ພຽງ 3 ຄະແນນ. ຢ່າງໃດກໍຕາມ ພໍ່ຂອງທ້າວອ໊ອບ ບອກວ່າ: ຮອບສຸດທ້າຍແມ່ນຍາກພໍສົມຄວນ ເພາະເປັນການເດາະບານແບບຟຣີສະໄຕ ແລະ ນ້ອງອ໊ອບ ກໍບໍ່ເຄີຍແຂ່ງຂັນມາກ່ອນແບບນີ້. ຢ່າງໃດກໍຕາມ ຈະກັບໄປຝຶກຊ້ອມ ແລະ ເພີ່ມທ່າໃຫ້ຫຼາຍຂຶ້ນກວ່າເກົ່າ ເພື່ອກັບມາແຂ່ງຂັນອີກຄັ້ງໃນຄັ້ງຕໍ່ໆໄປ.
ຂ່າວ: ຫຼ້າ MKP; ຮູບ: ເດາະບານເງິນລ້ານ