ກົມອຸຕຸແຈ້ງເຕືອນພາຍຸດີເປຼຊັນ​ 7-9 ກໍລະກົດ ລະວັງຝົນຕົກໜັກຢູ່ແຂວງພາກເໜືອ​ ແລະ​ ພາກກາງ

973

ກົມ​ອຸຕຸນິຍົມ​ ແລະ​ ອຸທົກກະສາດ​ ແຈ້ງເຕືອນພາຍຸໝຸນເຂດຮ້ອນດີເປຼຊັນ​ ໃນວັນທີ 07 ຫາ 09 ກໍລະກົດ 2021​ ສະບັບທີ່ 2​ ວ່າ​: ໃນເວລາ 7 ໂມງເຊົ້າ ຂອງວັນທີ 07 ກໍລະກົດ 2021 ພະຍຸໝຸນເຂດຮ້ອນດີເປຼຊັ້ນ ກໍາລັງເຄື່ອນທີ່ຢູ່ເຂດທະເລຈີນໃຕ້ຕອນກາງ ທີ່ມີຈຸດສູນກາງຢູ່ເສັ້ນຂະໜານທີ່ 18.1 ອົງສາເໜືອ ແລະ ເສັ້ນແວງທີ່​ 111 ອົງສາຕາເວັນອອກ ພວມເຄື່ອນທີ່ມາ​ທາງທິດຕາເວັນຕົກສ່ຽງເໜືອ ດ້ວຍຄວາມໄວ 5​ກິໂລແມັດຕໍ່​ຊົ່ວໂມງ ແລະ ຄວາມໄວລົມສູງສູດຢູ່ໃກ້ຈຸດສູນກາງ 55​ ກິໂລແມັດຕໍ່ຊົ່ວໂມງ ຄາດວ່າຈະເຄື່ອນທີ່ໄປທາງ ເກາະໄຮໜານ​.

ຈະຜ່ານພາກເໜືອ ຂອງ ສສ ຫວຽດນາມ ໃນຄ່ຳຄືນຂອງ​ວັນທີ 08 ກໍລະກົດ 2021 ແລະ ສືບຕໍ່ເຄື່ອນທີ່ຜ່ານ ເມືອງແອດ​ ແລະ ເມືອງ ຊຳເໜືອ ແຂວງຫົວພັນ ໃນຕອນບ່າຍຂອງວັນດຽວກັນ. ຈາກນັ້ນພາຍຸຫົວນີ້ຈະອ່ອນກຳລັງລົງເປັນຍ່ອມຄວາມກົດດັນອາກາດຕໍ່າ ທີ່ມີກຳລັງແຮງປົກຄຸມເຂດພາກເໜືອ, ຊື່ງຈະເຮັດໃຫ້ມີຝົນຕົກໃນລະດັບຄ່ອຍ ຫາ ປານກາງ ເປັນບໍລິເວນກວ້າງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນແຂວງພາກເໜືອ ແລະ ພາກກາງ ໃນໄລຍະວັນທີ 07 ຫາ 09 ກໍລະກົດ​ 2021 ນີ້.

["]

ດັ່ງນັ້ນ, ຈຶ່ງແຈ້ງເຕືອນເຖີງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ ແຂວງ ຜົ້ງສາລີ, ຫົວພັນ, ຊຽງຂວາງ, ຫຼວງນ້ຳທາ, ບໍ່ແກ້ວ, ອຸດົມໄຊ, ຫຼວງພະບາງ, ໄຊຍະບູລີ, ໄຊສົມບູນ, ວຽງຈັນ,ນະຄອນຫຼວງວຽງຈັນ, ບໍລິຄຳໄຊ ແລະ ຄຳມ່ວນ ຈົ່ງມີສະຕິລະມັດລະວັງຕໍ່ ສະພາບຝົນຕົກໜັກ ພ້ອມມີລົມພັດແຮງ ທີ່ຈະເຮັດໃຫ້ມີດິນເຈື່ອນ, ນ້ຳຖ້ວມກະທັນຫັນ ແລະ ນ້ຳຖ້ວມຊຸ ເກີດຂື້ນໄດ້ ແລະ ຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.