ດ້ວຍຟອມການຫຼິ້ນ, ນັກເຕະ ແລະ ສະຖານະການ ເຮັດໃຫ້ນັກວິເຄາະ ແລະ ແຟນບານຕ່າງກໍຍົກໃຫ້ ທີມຊາດອັງກິດ ເປັນຕົວເຕັງສູ່ຮອບຊີງຊະນະເລີດການແຂ່ງຂັນບານເຕະ ຢູໂຣ 2020 ແບບບໍ່ມີທີ່ຕິຫຼັງຈາກທີ່ນັດຫຼ້າສຸດເອົາຊະນະ ເຢຍລະມັນ 2-0 ໃນການແຂ່ງຂັນຮອບ 16 ທີມສຸດທ້າຍເມື່ອວັນທີ 29 ມິຖຸນາ 2021 ເຮັດໃຫ້ ອັງກິດ ເຂົ້າຮອບ 8 ທີມສຸດທ້າຍ; ແນ່ນອນ ອັງກິດ ຢູ່ສາຍລຸ່ມແມ່ນສາຍທີ່ບໍ່ໜັກ ແລະ ເໜືອກວ່າຄູ່ແຂ່ງ ເຮັດໃຫ້ໂອກາດເຂົ້າຮອບຊີງມີຫຼາຍກວ່າທີມອື່ນໆ.
ການແຂ່ງຂັນວັນສຸດທ້າຍຂອງຮອບ 16 ທີມສຸດທ້າຍ ອັງກິດ ພົບກັບ ເຢຍລະມັນ ເຊິ່ງອັງກິດ ຄຸມຄວາມໄດ້ປຽບທັງເປັນເຈົ້າບ້ານ ແລະ ບໍ່ອະນຸຍາດໃຫ້ ເຢຍລະມັນ ຊ້ອມໃນສະໜາມເວມບຣີ ສະເຕດ້ຽມ ທີ່ໃຊ້ແຂ່ງໃນນັດຕົວຈິງເທົ່ານັ້ນ ປາກົດວ່າ: ທັງສອງທີມແຂ່ງກັນໄດ້ຢ່າງສູສີ, ແຕ່ເປັນທີມຊາດອັງກິດ ທີ່ຈົບປະຕູໄດ້ຈາກ ຣາຮີມ ຣາຮີມ ສະເຕີລິງ ຂຶ້ນນໍາ 1-0 ນາທີໆ 75 ກ່ອນທີ່ ແຮຣີ ເຄນ ຈະມາໂໝ່ງປະຕູທີ 2 ໃຫ້ກັບອັງກິດ ນາທີໆ 86 ຈົບເກມ ອັງກິດ ເອົາຊະນະໄປ 2-0.
ຈາກຜົນດັ່ງກ່າວເຮັດໃຫ້ ອັງກິດ ຜ່ານເຂົ້າຮອບ 8 ທີມສຸດທ້າຍໄປພົບກັບ ອູແກຣນ ທີ່ຊະນະ ຊູແອັດ 2-1 ເຊິ່ງຈະແຂ່ງຂັນໃນວັນທີ 3 ກໍລະກົດ 2020 ( ກົງກັບເວລາ 2:00 ໂມງຂອງວັນທີ 4 ກໍລະກົດ ເວລາໃນບ້ານເຮົາ ).
ນອກນັ້ນ, ຜົນນັດນີ້ຍັງເຮັດໃຫ້ ອັງກິດ ຖືກເບິ່ງວ່າຈະເປັນຕົວເຕັງເຂົ້າຮອບຊີງຊະນະເລີດ ເພາະຖ້າຫາກຜ່ານ ອູແກຣນ ກໍຈະໄປລຸ້ນກັບທີມຊະນະລະຫວ່າງ ສາທາລະນະລັດເຊັກ ຫຼື ດານມາກ ເຊິ່ງຈະໄດ້ແຂ່ງຂັນທີ່ສະໜາມເວມບຣີ ສະເຕດ້ຽມ ໃນປະເທດອັງກິດ ຍິ່ງໄດ້ປຽບອີກຄັ້ງ ເຊັ່ນດຽວກັບຮອບຊີງຊະນະເລີດກໍຈະແຂ່ງຂັນທີ່ສະໜາມເວມບຣີ ເຊິ່ງດ້ວຍສະຖິຕິ ແລະ ຟອມການຫຼິ້ນ ລວມເຖິງຍັງພຽງທີມດຽວທີ່ບໍ່ເສຍຈັກປະຕູໃນຢູໂຣ 2020 ຮອບສຸດທ້າຍ ເຊິ່ງອັງກິດ ຈະເປັນທີມທີ່ມີໂອກາດຫຼາຍທີ່ສຸດເຂົ້າຮອບຊີງຊະນະເລີດໄດ້.
ສະຫຼຸບ 8 ທີມທີ່ໄດ້ໄປຕໍ່ໃນຢູໂຣ 2020 ມີດັ່ງນີ້:
-ສະວິດ ພົບ ແອັດສະປາຍ ໃນວັນທີ 2 ກໍລະກົດ 2021 ( ກົງກັບເວລາໃນບ້ານເຮົາ 23:00 ໂມງຂອງວັນທີ 2 ກໍລະກົດ ) ແຂ່ງຂັນທີ່ປະເທດຣັດເຊຍ
-ແບນຊິກ ພົບ ອິຕາລີ ໃນວັນທີ 2 ກໍລະກົດ 2021 ( ກົງກັບເວລາໃນບ້ານເຮົາ 2:00 ໂມງຂອງວັນທີ 3 ກໍລະກົດ ) ແຂ່ງຂັນທີ່ປະເທດເຢຍລະມັນ
-ສາທາລະນະລັດເຊັກ ພົບ ດານມາກ ໃນວັນທີ 3 ກໍລະກົດ 2021 ( ກົງກັບເວລາໃນບ້ານເຮົາ 23:00 ໂມງຂອງວັນທີ 3 ກໍລະກົດ ) ແຂ່ງຂັນທີ່ປະເທດອາເຊີໄບຈານ
-ອູແກຣນ ພົບ ອັງກິດ ໃນວັນທີ 3 ກໍລະກົດ 2021 ( ກົງກັບເວລາໃນບ້ານເຮົາ 2:00 ໂມງຂອງວັນທີ 4 ກໍລະກົດ ) ແຂ່ງຂັນທີ່ປະເທດອິຕາລີ
ຂ່າວ: ຫຼ້າ,ຮູບຈາກ: AP