ການແຂ່ງຂັນບານເຕະ ຢູໂຣ 2020 ຮອບ 16 ທີມສຸດທ້າຍ ນັດທໍາອິດລະຫວ່າງ ທີມຊາດເວລ ພົບກັບ ດານມາກ ເປີດສາກຂຶ້ນໃນເວລາ 23:00 ໂມງຂອງວັນທີ 26 ມິຖຸນາ 2021 ທີ່ສະໜາມ Johan Cruyff Arena ເມືອງອໍາສະເຕີດໍາ ປະເທດໂຮນລັງ.
ຜ່ານການແຂ່ງຂັນປາກົດວ່າ: 15 ນາທີທໍາອິດ ທີມຊາດເວລ ເຮັດໄດ້ດີກວ່າ ແລະ ໄດ້ໂອກາດຍິງຕໍ່ເນື່ອງ ໂດຍສະເພາະ ແກເຣັດ ເວລ ໄດ້ໂອກາດຍິງ 2 ຄັ້ງແຕ່ຍັງບໍ່ເປັນປະຕູ, ແຕ່ຫຼັງຈາກນັ້ນເປັນໄປຕາມຄາດໝາຍ ເມື່ອ ດານມາກ ກັບມາຄອງເກມໄດ້ດີກວ່າຫຼາຍພໍສົມຄວນ, ສ່ວນ ເວລ ອາໄສໂຕ້ກັບ.
ຫຼັງຈາກ ດານມາກ ບຸກຢູ່ຝ່າຍດຽວດົນພໍສົມຄວນ ຈົນເຖິງນາທີໆ 27 Kasper Dolberg ຍິງປະຕູໄດ້ຢ່າງເໜືອຊັ້ນ ນອກເສັ້ນ 18 ຍິງບານໂຄ້ງເຂົ້າປະຕູໄປຢ່າງສວຍງາມ ເຮັດໃຫ້ ດານມາກ ຂຶ້ນນໍາ 1-0 ກ່ອນຈົບເຄິ່ງເວລາທໍາອິດ.
ສ່ວນເຄິ່ງເວລາທີ 2 ເລີ່ມເກມພຽງ 3 ນາທີໆ ດານມາກ ໜີຫ່າງເປັນ 2-0 ຈາກຈັງຫວະໂຕກັບແລະ ເປີດບານເຂົ້າເຂດໂທດ ຖືກກອງຫຼັງຂອງ ເວລ ສະກັດບໍ່ດີມາເຂົ້າທາງຂອງ Dolberg ຍິງເຂົ້າໄປຢ່າງສວຍງາມ ແລະ ເປັນປະຕູທີ 2 ຂອງນັກເຕະຄົນດັ່ງກ່າວໃນນັດນີ້ອີກດ້ວຍ, ສ່ວນໄລຍະເວລາທີເຫຼືອ ເວລ ເປີດເກມບຸກແບບບໍ່ມີຫຍັງຈະເສຍ, ແຕ່ຖືກ ດານມາກ ໂຕ້ກັບໄດ້ 2 ປະຕູລວດໃນນາທີໆ 89 ຈາກການຍິງຂອງ Joakim Maehle ແລະ ໄລຍະຕໍ່ເວລາພິເສດຈາກການຍິງຂອງ Martin Braithwaite ຈົບເກມ ດານມາກ ເອົາຊະນະໄປ 4-0 ຜ່ານເຂົ້າຮອບ 8 ທີມສຸດທ້າຍເປັນທີມທໍາອິດ
ສໍາລັບ ດານມາກ ຈະເຂົ້າຮອບ 8 ທີມສຸດທ້າຍທີ່ຈະແຂ່ງຂັນໃນວັນທີ 3 ກໍລະກົດ 2021 ໄປລໍຖ້າພົບທີມຊະນະລະຫວ່າງ ໂຮນລັງ ພົບກັບ ສາທາລະນະລັດເຊັກ ທີ່ຈະແຂ່ງຂັນໃນວັນທີ 27 ມິຖຸນາ 2021 ເວລາ 23:00 ໂມງວ່າທີມໃດຈະໄດ້ເຂົ້າຮອບ