ໃນຕອນເຊົ້າວັນທີ 24 ມິຖຸນາ 2021 ເມືອງໄຊຍະບູລີ ໄດ້ຈັດພິທີປະກາດການໂຍກຍ້າຍ ແລະ ປົ່ງຕົວແຕ່ງຕັ້ງ, ຄະນະປະຈຳພັກເມືອງ,ກຳມະການພັກເມືອງ, ຮອງເຈົ້າເມືອງ ແລະ ຫົວໜ້າກະສິກຳ ແລະ ປ່າໄມ້ເມືອງ ທີ່ຫ້ອງປະຊຸມຫ້ອງວ່າການເມືອງໂດຍການເປັນປະທານຂອງສະຫາຍ ດວງຕາ ໄຊວຸດ ຮອງເລຂາພັກແຂວງ, ຜູ້ຊີ້ນຳວຽກງານການເມືອງແນວຄິດ, ວຽກພັກພະນັກງານ ແລະ ອົງການຈັດຕັ້ງມະຫາຊົນຂັ້ນແຂວງ.
ໃນພິທີທ່ານ ຈັນເພັງ ແສນຄຳ ຮອງຫົວໜ້າຄະນະຈັດຕັ້ງແຂວງໄດ້ຂຶ້ນຜ່ານຂໍ້ຕົກລົງຂອງທ່ານ ເຈົ້າແຂວງໄຊຍະບູລີສະບັບເລກທີ 657/ຈຂ.ຊຍ ລົງວັນທີ 13 ພຶດສະພາ 2021 ວ່າດ້ວຍການໂຍກຍ້າຍພະນັກງານໄປຮັບໜ້າທີ່ໃໝ່, ອີງຕາມ ກົດໝາຍວ່າດ້ວຍການປົກຄອງທ້ອງຖີ່ນ(ສະບັບປັບປຸງ) ສະບັບເລກທີ 68/ສພຊ ລົງວັນທີ 14 ທັນວາ 2015 ພາກທີ III ໜວດທີ4 ມາດຕາ 20 ວ່າດ້ວຍສິດ ແລະ ໜ້າທີ່ຂອງເຈົ້າແຂວງ ເຈົ້າຄອງນະຄອນ.
ເຈົ້າແຂວງໄຊຍະບູລີຕົກລົງໂຍກຍ້າຍທ່ານ ສອນສະຫວັນ ຈັນທະວົງ ກຳມະການປະຈຳພັກເມືອງ ຮອງເຈົ້າເມືອງໄຊຍະບູລີໄປຮັບໜ້າທີ່ໃໝ່ຢູ່ພະແນກອຸດສາຫະກຳ ແລະ ການຄ້າແຂວງໄຊຍະບູລີ, ໂຍກຍ້າຍທ່ານ ຄໍາພອນ ສີງງາມ ຫົວໜ້າຫ້ອງການກະສິກຳ ແລະ ປ່າໄມ້ເມືອງໄປຮັບໜ້າທີ່ໃໝ່ຢູ່ພະແນກກະສິກຳ ແລະ ປ່າໄມ້ແຂວງ, ໂຍກຍ້າຍທ່ານ ຄໍາພຸດ ອິນທະວົງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງໄປຮັບໜ້າທີ່ໃໝ່ຢູ່ຫ້ອງວ່າການເມືອງໄຊຍະບູລີ, ໂຍກຍ້າຍທ່ານ ສົມພັນ ແພງສີດາ ຫົວໜ້າຂະແໜງຄຸ້ມຄອງທີ່ດິນ ແລະ ພັດທະນາກະສິກຳ ພະແນກກະສິກຳ ແລະ ປ່າໄມ້ແຂວງ ໄປຮັບໜ້າທີ່ ໃໝ່ຢູ່ຫ້ອງການກະສິກຳ ແລະ ປ່າໄມ້ເມືອງ.
ຈາກນັ້ນໃນພິທີກໍໄດ້ຜ່ານມະຕິຕົກລົງຂອງຄະນະປະຈຳພັກແຂວງເລກທີ 212/ຄພຂ ລົງວັນທີ 18 ມິຖຸນາ 2021 ວ່າດ້ວຍການອານຸມັດປົ່ງຕົວແຕ່ງຕັ້ງກໍາມະການປະຈໍາພັກເມືອງ, ຄະນະປະຈໍາພັກແຂວງໄຊຍະບູລີຕົກລົງອະນຸມັດບົ່ງຕົວ ແຕ່ງຕັ້ງສະຫາຍຄຳພຸດອິນທະວົງ ອະດີດຄະນະພັກຮາກຖານ, ຮອງຫົວໜ້າພະແນກກະສິກຳ ແລະ ປ່າໄມ້ແຂວງໄຊຍະບູລີ ເປັນກຳມະການປະຈຳພັກເມືອງ ເປັນຮອງເຈົ້າເມືອງໄຊຍະບູລີ; ອະນຸມັດບົ່ງຕົວແຕ່ງຕັ້ງສະຫາຍ ພັນໂທ ພອນສະຫວັດ ພະໄຊສົມບັດ ເລຂາໜ່ວຍພັກ ຫົວໜ້າກອງບັນຊາການ ປກສ ເມືອງ ຂຶ້ນເປັນກຳມະການພັກເມືອງ ເມືອງໄຊຍະບູລີ; ອະນຸມັດແຕ່ງຕັ້ງສະຫາຍ ສົມພັນ ແພງສີດາ ເປັນກຳມະການພັກເມືອງ ເປັນຫົວໜ້າຫ້ອງການກະສິກຳ ແລະ ປ່າໄມ້ເມືອງ.
ຂ່າວ-ພາບ: ສົມພົງ ສີສະຫວັດ