ມອບອຸປະກອນປ້ອງກັນໄພພິບັດໃຫ້ເມືອງທຸລະຄົມ

11

ໃນທ້າຍອາທິດຜ່ານມາ ອົງການກາແດງແຂວງວຽງຈັນ ໄດ້ນຳເອົາອຸປະກອນປ້ອງກັນໄພພິບັດໄປຊ່ວຍເຫຼືອປະຊາຊົນ 8 ບ້ານ ທີ່ນອນໃນໂຄງການຫຼຸດຜ່ອນຄວາມສ່ຽງໄພພິບັດຊຸມຊົນຢູ່ທີ່ເມືອງທຸລະຄົມ ແຂວງ ວຽງຈັນ ເມື່ອທ້າຍອາທິດຜ່ານມາໂດຍການເຂົ້າຮ່ວມຂອງ ທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ, ມີ ທ່ານ ບຸນເນົາ ພະຈອມພົນ ຫົວໜ້າອົງການກາແດງແຂວງ ວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ເຄື່ອງອຸປະກອນປ້ອງກັນໄພພິບັດທີ່ນຳໄປຊ່ວຍເຫຼືອປະຊາຊົນ 8 ບ້ານທີ່ນອນໃນໂຄງການຫຼຸດຜ່ອນຄວາມສ່ຽງໄພພິບັດຊຸມຊົນຢູ່ເມືອງທຸລະຄົມນັ້ນ ປະກອບມີ: ຈັກເຮືອ 13 ແຮງມ້າ ຈຳນວນ 4 ເຄື່ອງ, ເຮືອເຫຼັກ 4 ລຳ, ເສື້ອຊູຊີບ 28 ຜືນ, ກົງເບັງ 8 ອັນ, ເຊືອກ 4 ກໍ້, ປາກເລີ 16 ອັນ, ແອັມ 250 W 4 ໜ່ວຍ. ພ້ອມນີ້, ຍັງມີສາຍໄຟປາກເລີ, ໄມໂຄໂຟນ, ວິທະຍຸ, ຫີບຢາປະຖົມພະຍາບານປະຈຳບ້ານຈຳນວນໜຶ່ງ ແລະ ເງິນ ເພື່ອເປັນກອງທຶນໃຫ້ບ້ານລະ 1 ລ້ານ ກີບ ລວມມູນຄ່າທັງໝົດ 86.780.000 ກີບ ເຊິ່ງໄດ້ຮັບການສະໜັບສະໜູນຈາກສະພາກາແດງ ສປ ຈີນ.

Slide
Slide
Slide

ໂຄງການດັ່ງກ່າວໄດ້ແນໃສ່ສ້າງຄວາມເຂັ້ມແຂງໃຫ້ແກ່ຊົນຊົນ ກຸ່ມບ້ານເປົ້າໝາຍທີ່ໄດ້ຮັບຜົນກະທົບຈາກນໍ້າຖ້ວມ ແລະ ມີຄວາມສ່ຽງໄພພິບັດ ເພື່ອເປັນການຂະຫຍາຍຕານ່າງອາສາສະໝັກກາແດງ, ໜ່ວຍປ້ອງກັນ ແລະ ຄວບຄຸມໄພພິບັດຂັ້ນບ້ານ ລົງສູ່ບັນດາບ້ານທີ່ມີ ຄວາມສ່ຽງສູງຕໍ່ໄພພິບັດ, ຮັບປະກັນໃຫ້ປະຊາຊົນໄດ້ຮັບການຊ່ວຍເຫຼືອໃນພາວະສຸກເສີນ ແລະ ສາມາດບໍລິຫານຈັດການ ເພື່ອຮັບມືກັບໄພພິບັດ, ຫຼຸດຜ່ອນການເສຍຫາຍທາງດ້ານຊີວິດ ແລະ ຊັບສິນ, ສາມາດຂະຫຍາຍອາສາສະໝັກໄດ້ 56 ຄົນ, ຝຶກອົບຮົມອາສາສະໝັກໄດ້ 8 ບ້ານ ປະກອບມີບ້ານເປົ້າໝາຍຄື: ບ້ານຕານປ່ຽວ, ໂພນແພງ, ສຸກສາລາ, ຫາດສວນ, ບ້ານຈຸ້ມ, ບ້ານແຈ້ງ, ລິ່ງຊັນ ແລະ ບ້ານຫາດສ້ຽວ ເມືອງທຸລະຄົມ ແຂວງວຽງຈັນ.

( ຂ່າວ – ຮູບ: Lao Red Cross )