ໃນວັນທີ 30 ກໍລະກົດ 2020 ນີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ໄດ້ນໍາພາ ທ່ານ ພົນຈັດຕະວາ ສີພັນ ພຸດທະວົງ ຫົວໜ້າກົມຊາຍແດນ ກະຊວງປ້ອງກັນປະເທດ ພ້ອມດ້ວຍທີມງານ ລົງຢ້ຽມຢາມ ແລະ ໂອ້ລົມປະຊາຊົນ ບ້ານນໍ້າພຽງ ເມືອງບໍ່ແຕນ ແຂວງໄຊຍະບູລີ.
ກ່ອນອື່ນແມ່ນໄດ້ຮັບຟັງການລາຍງານສະພາບຂອງບ້ານຈາກ ທ່ານ ຄໍາແພງ ພູສີຄໍາ ນາຍບ້ານນໍ້າພຽງ ວ່າ: ບ້ານນໍ້າພຽງ ໄດ້ສ້າງຕັ້ງຂຶ້ນໃນຕົ້ນປີ 2017, ເປັນບ້ານທີ່ຕັ້ງຢູ່ລຽບຊາຍແດນລາວ – ໄທ, ມີ 50 ຄອບຄົວ, ມີຈຳນວນພົນ 293 ຄົນ ຍິງ 147 ຄົນ, ອາຊີບສ່ວນໃຫຍ່ແມ່ນເຮັດນາ, ເຮັດສວນປູກພືດ ແລະ ລ້ຽງສັດ ເປັນຕົ້ນແມ່ນປູກສາລີ, ມັນຕົ້ນ, ໝາກເດືອຍ ແລະ ອື່ນໆ. ພ້ອມນີ້, ຄະນະບ້ານຍັງໄດ້ເຮັດໜ້າທີ່ເຄື່ອນໄຫວຮ່ວມກັບອ້າຍນ້ອງທະຫານຊາຍແດນທີ່ປະຈໍາແຕ່ລະປ້ອມ ກວດກາຂອບເຂດຊາຍແດນທີ່ບ້ານຮັບຜິດຊອບ, ເຮັດໃຫ້ບໍລິເວນດັ່ງກ່າວມີ ຄວາມສະຫງົບໂດຍພື້ນຖານ.
ຈາກນັ້ນ, ທ່ານເຈົ້າແຂວງ ກໍໄດ້ນໍາພາທີມງານຂອງ ທ່ານ ນາຍພົນ ຢ້ຽມຢາມອ້າຍນ້ອງທະຫານຊາຍແດນທີ່ເຮັດໜ້າທີ່ປ້ອງກັນຊາຍແດນຢູ່ປ້ອມນໍ້າພຽງ, ປ້ອມພູວຽງ 1 ແລະ ພູວຽງ 2, ກ່ອນອື່ນແມ່ນໄດ້ຖາມຂ່າວຄາວ, ຄວາມສຸກ – ທຸກ ແລະ ໃຫ້ກໍາລັງໃຈກັບອ້າຍນ້ອງທະຫານຊາຍແດນແຕ່ລະຄົນ, ພ້ອມທັງໄດ້ຮຽກຮ້ອງໃຫ້ອ້າຍນ້ອງທະຫານແຕ່ລະສະຫາຍທີ່ປະຈໍາແຕ່ລະປ້ອມຈົ່ງເຊີດຊູທຸກກໍາລັງແຮງເຂົ້າໃນການປະຕິບັດໜ້າທີ່ – ທີ່ຊາດໄດ້ມອບໝາຍໃຫ້ ກໍຄືການຮັກສາຊາຍແດນ, ເຂດນໍ້າແດນດິນອັນຄົບຖ້ວນຂອງຊາດ.
[ ຂ່າວ – ຮູບ: ອຸ່ນເຮືອນ ໂພທິລັກ ] ນັກຂ່າວຫ້ອງວ່າການ
