ໃນວັນທີ 12 ມິຖຸນາ 2020 ຜ່ານມານີ້, ທີ່ຫ້ອງປະຊຸມອົງການປະກັນສັງຄົມແຫ່ງຊາດ, ໄດ້ມີພິທີປະກາດຍົກຍ້າຍໜ້າທີ່ ແລະ ແຕ່ງຕັ້ງ ທ່ານ ດວງສີ ທຳມະວົງ ຫົວໜ້າພະແນກຮ່ວມມືອາຊຽນ, ກົມແຜນການ ແລະ ການຮ່ວມມືສາກົນ ຂື້ນເປັນຮອງຫົວໜ້າຫ້ອງການຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຢູ່ ສປປ ລາວ(ຊກລ), ກະຊວງແຮງງານ ແລະ ສະຫວັດດີການສັງຄົມ( ຕຳແໜ່ງປະເພດ 3 ທຽບເທົ່າຮອງກົມ), ໂດຍເປັນກຽດເຂົ້າຮ່ວມ ຂອງ ທ່ານ ຄຳຂານ ພິນສະຫວັນ ຫົວໜ້າກົມຈັດຕັ້ງ ແລະ ພະນັກງານ ກະຊວງ ຮສສ ແລະ ພະນັກງານພາຍໃນກົມເຂົ້າຮ່ວມ.
ພິທີ ຍົກຍ້າຍ-ແຕ່ງຕັ້ງຮອງຫົວໜ້າຫ້ອງການ ຄຊກລ ຄັ້ງນີ້, ແມ່ນອີງຕາມ ຂໍ້ຕົກລົງ ຂອງລັດຖະມົນຕີກະຊວງ ຮສສ , ອີງຕາມດຳລັດການຈັດຕັ້ງ ແລະ ເຄື່ອນໄຫວຂອງ ກະຊວງ ຮສສ ແລະ ອີງຕາມແຈ້ງການ ຂອງກະຊວງພາຍໃນ.
ໃນໂອກາດດັ່ງກ່າວ, ທ່ານ ຄຳຂານ ພິນສະຫວັນ ໄດ້ໃຫ້ກຽດມີຄຳເຫັນ ແລະ ໂອ້ລົມ ຕໍ່ພິທີດັ່ງກ່າວວ່າ: ເນື້ອແທ້ຂອງການປະກາດການຈັດຕັ້ງຕຳແໜ່ງບໍລິຫານປະເພດຕ່າງໆ, ແຕ່ງຕັ້ງຕຳແໜ່ງຮອງຫ້ອງການ, ຮອງກົມ ແມ່ນການມອບໝາຍໜ້າທີ່ ແລະ ຄວາມຮັບຜິດຊອບ ວຽກງານຂອງພັກ-ລັດ ໂດຍສະເພາະ ຂອງຄະນະພັກ ແລະ ສະມະຊິກພັກ ຮ່ວມກັບໝູ່ຄະນະ ໃນການຊີ້ນຳ-ນຳພາ, ຈັດຕັ້ງຜັນຂະຫຍາຍ ແລະ ປະຕິບັດແນວທາງນະໂຍບາຍຂອງພັກ ແລະ ລັດ ເປັນຕົ້ນຄວາມຮັບຜິດຊອບ ຕໍ່ວຽກງານຄຸ້ມຄອງນຳພາ ວຽກງານແຮງງານ ແລະ ສະຫວັດດີການສັງຄົມ, ກໍຄືວຽກງານ ລບຕ ໃນຂອບເຂດທົ່ວປະເທດ.
ພ້ອມກັນນີ້, ທ່ານ ຍັງຮຽກຮ້ອງໃຫ້ ຮອງຫົວໜ້າຫ້ອງການ ຄຊກລ ຄົນໃໝ່ ໃຫ້ເອົາໃຈໃສ່ ຊີ້ນຳ-ນຳພາ-ຄຸ້ມຄອງ ຍຸດທະສາດຂອງພັກ ແລະ ລັດ, ເປັນຜູ້ທີ່ມີຄວາມຮັບຜິດຊອບ ໃຫ້ມີຜົນສຳເລັດເປັນຢ່າງດີ ແລະ ຊີ້ນຳ-ນຳພາພະນັກງານ ພ້ອມກັນແກ້ໄຂຂໍ້ຂາດຕົກບົກຜ່ອງທັງໝົດໃນການນຳພາ- ຊີ້ນຳ, ຄຸ້ມຄອງ-ບໍລິຫານ ວຽກງານເກັບກູ້ລະເບີດບໍ່ທັນແຕກທີ່ຍັງຕົກຄ້າງຢູ່ໃນ ສປປ ລາວ ໃຫ້ປະສົບຜົນສຳເລັດ./
( ຂ່າວສານ ຮສສ: ຂ່າວເພັດສະໄໝ, ພາບ: ໜູທອງ)
