ຟີລິບປິນເປັນປະເທດທີ 3 ໃນອາຊຽນ ທີ່ຢືນຢັນຈຳນວນຜູ້ປ່ວຍສະສົມຈາກໂຄວິດ-19 ຫຼາຍກວ່າ 10 ພັນຄົນ.
ສຳນັກຂ່າວຕ່າງປະເທດລາຍງານຈາກນະຄອນຫຼວງມະນີລາ ປະເທດຟີລິບປິນ ເມື່ອວັນພຸດ ທີ 6 ພຶດສະພາ ວ່າ ກະຊວງສາທາລະນະສຸກຟີລິບປິນ ອອກຖະແຫຼງການ ເມື່ອວັນພຸດ ກ່ຽວກັບສະຖານະການຂອງໂຄວິດ-19 ໃນປະເທດ ວ່າ ຢືນຢັນມີຜູ້ປ່ວຍໃໝ່ອີກ 320 ຄົນ ເພິ່ມຈຳນວນຜູ້ປ່ວຍສະສົມ ຢ່າງໜ້ອຍ 10.004 ຄົນ.
ທັງນີ້, ຟີລິບປິນເປັນປະເທດທີ 3 ໃນອາຊີຕາເວັນອອກສຽງໃຕ້ ທີ່ມີຜູ້ປ່ວຍສະສົມຈາກໂຄວິດ-19 ຫຼາຍກວ່າ 10 ພັນຄົນ ຮອງຈາກສິງກະໂປ ເຊິ່ງປັດຈຸບັນ ມີປະຊາຊົນຕິດເຊື້ອຫຼາຍກວ່າ 20 ພັນຄົນແລ້ວ ແລະ ອິນໂດເນເຊຍ ມີຜູ້ປ່ວຍສະສົມຫຼາຍກວ່າ 12 ພັນຄົນ.
ຂະນະທີ່ ໃນວັນດຽວກັນ ມີການຢືນຢັນ ຜູ້ເສຍຊີວິດຈາກໂຄວິດ-19 ໃນປະເທດຟິລິບປິນ ອີກ 21 ຄົນ ເພິ່ມສະຖິຕິສະສົມຢ່າງໜ້ອຍ 658 ຄົນ ແລະ ປິ່ນປົວເຊົາ ໃນຮອບ 1 ວັນຜ່ານມາ ອີກ 98 ຄົນ ເພີ່ມສະຖິຕິສະສົມຢ່າງໜ້ອຍ 1.506 ຄົນ.
ທ່ານຟານຊິສໂກ ດູເກ ລັດຖະມົນຕີກະຊວງສາທາລະນະສຸກຟີລິບປິນ ກ່າວວ່າ ການກວດພົບຜູ້ຕິດເຊື້ອປະຈຳວັນຈະຍັງສຶບຕໍ່ ເນື່ອງຈາກວ່າ ລັດຖະບານໄດ້ຍົກລະດັບ ແລະ ຂະຫຍາຍຂອບເຂດການກວດຫາເຊື້ອໃຫ້ກວ້າງຂຶ້ນ ໂດຍມີເປົ້າໝາຍໃຫ້ໄດ້ 28ພັນ ຫາ 30ພັນ ຕົວຢ່າງໃນທ້າຍເດືອນນີ້.
ຢ່າງໃດກໍ່ຕາມ, ຈຳນວນຜູ້ປ່ວຍໃໝ່ປະຈຳວັນຫຼຸດລົງຈະຊ່ວຍຫຼຸດຜ່ອນຄວາມກົດດັນແກ່ບຸກຄະລາກອນແພດ ແລະ ຫຼຸດຜ່ອນຄວາມໜາແໜ້ນຂອງລະບົບສາທາລະນະສຸກ ແຕ່ທ່ານດູເກ ຢືນຢັນວ່າ ທຸກຝ່າຍທີ່ກ່ຽວຂ້ອງໄດ້ກຽມພ້ອມ ແລະ ຍົກສູງການຮັບມື ໂດຍມີການສຳຮອງອຸປະກອນຊຸດປ້ອງກັນສ່ວນຕົວ (PPE) ສຳລັບເຈົ້າໜ້າທີ່ສາທາລະນະສຸກ ລະຫວ່າງ 12 ເຖິງ 15 ລ້ານຊຸດ ເຊິ່ງສາມາດສຳຮອງໄດ້ອີກປະມານ 3 ເດືອນ.
