ຖ້າຜູ້ທີ່ກໍາລັງມີບັນຫາສຸຂະພາບ ແລະ ຮູ້ສຶກວ່າຮ່າງກາຍບໍ່ແຂງແຮງ ກໍ່ລອງປ່ຽນມາການກິນໝາກຖົ່ວພູເບິ່ງກໍ່ອາດຈະຊ່ວຍໄດ້. ຕາມຕໍາລາພື້ນເມືອງໝາກຖົ່ວພູ ແມ່ນພືດຜັກຊະນິດໜຶ່ງທີ່ມີຄຸນຄ່າທາງອາຫານ ແລະ ດີຕໍ່ຮ່າງກາຍ, ພ້ອມກັນນັ້ນຍັງມີຄຸນສົມບັດເປັນຢາສະໝຸນໄພໄດ້ອີກດ້ວຍ. ເຊິ່ງຄຸນປະໂຫຍດຂອງໝາກຖົ່ວພູ ແມ່ນມີຫຼາກຫຼາຍທີ່ຫຼາຍຄົນອາດຄິດບໍ່ເຖິງ. ດັ່ງນັ້ນ, ມື້ນີ້ຈຶ່ງຈະນໍາເອົາຄວາມຮູ້ດີໆກ່ຽວກັບສັບພະຄຸນ ແລະ ຄຸນປະໂຫຍດຂອງໝາກຖົ່ວພູມາໃຫ້ຮູ້ຈັກ.
ຄຸນປະໂຫຍດຂອງໝາກຖົ່ວພູ.
ໝາກຖົ່ວພູແມ່ນພືດທີ່ມີກາກໄຍອາຫານເປັນຈຳນວນຫຼວງຫຼາຍ ເຊິ່ງເຮັດໃຫ້ລະບົບຂັບຖ່າຍເປັນໄປຢ່າງປົກກະຕິ, ສະດວກ ແລະ ບໍ່ອືດທ້ອງ. ນອກຈາກນັ້ນ, ຫົວຂອງໝາກຖົ່ວພູກໍ່ຍັງສາມາດນໍາໄປຕາກແຫ້ງ ແລ້ວຂົ້ວໃຫ້ເຫຼືອງ, ນໍາມາຊົງເປັນນໍ້າຊາດື່ມຊູກໍາລັງໄດ້ ແລະ ຍັງເໝາະສົມສໍາລັບຄົນບໍ່ສະບາຍ ຫຼື ຄົນທີ່ອ່ອນເພຍງ່າຍໄດ້ນຳ.
ຄຸນຄ່າທາງອາຫານຂອງໝາກຖົ່ວພູ.
ໝາກຖົ່ວພູ 1 ຂີດຈະໃຫ້ພະລັງງານ 19 ກິໂລແຄລໍລີ. ເຊິ່ງປະກອບດ້ວຍນໍ້າ 93.8 ກຣາມ, ກາໂບໄຮເດຣດ 2.4 ກຣາມ, ໂປຣຕີນ 2.1 ກຣາມ, ໄຂມັນ 0.1 ກຣາມ, ແຄຊຽມ 5 ມິນລີກຣາມ, ຟອດສຟໍຣັດ 4.3 ມິນລີກຣາມ, ທາດເຫຼັກ: 0.5 ມິນລີກຣາມ, ໄນອາຊິນ 0.8 ມິນລີກຣາມ, ວິຕາມິນ B 10.35 ມິນລີກຣາມ ແລະ ວິຕາມິນ C 32 ມິນລີກຣາມ.
ສັບພະຄຸນຂອງໝາກຖົ່ວພູ.
ຫົວໝາກຖົ່ວພູ: ໃຊ້ເປັນຢາບໍາລຸງຮ່າງກາຍ, ແກ້ອ່ອນເພຍ, ແກ້ຮ້ອນໃນ, ແກ້ປາກແຫ້ງ ແລະ ແກ້ໄຂ້.
ຮາກ: ແກ້ພະຍາດລົມພິດກໍາເລີດ, ແກ້ເຈັບທ້ອງ, ໃຊ້ຮັກສາສິວ ແລະ ພະຍາດຜິວໜັງບາງຊະນິດ.
ສ່ວນຕໍາລາຢາພື້ນເມືອງໄດ້ບອກວ່າ: ໃຫ້ນໍາເອົາແກ່ນໝາກຖົ່ວພູມາຕົ້ມ ໂດຍຂັດເອົາສະເພາະແກ່ນທີ່ມີສີນໍ້າຕານເຂັ້ມ. ເຊິ່ງຈະກິນແກ່ນທີ່ຕົ້ມສຸກເລີຍກໍ່ໄດ້ ຫຼື ນໍາເອົາແກ່ນທີ່ຕົ້ມສຸກມາບົດໃຫ້ລະອຽດ ແລ້ວປະສົມກັບນໍ້າດື່ມກ່ອນອາຫານ 3 ເວລາຈະຊ່ວຍໃຫ້ສຸຂະພາບແຂງແຮງ ແລະ ເພີ່ມພະລັງວັງຊາ.
