ເພື່ອເປັນການສົ່ງເສີມການຮ່ວມມື, ການຄ້າ, ການລົງທຶນລະຫວ່າງປະເທດເພື່ອນບ້ານ ຈັງຫວັດຈັນທະບູລີ ປະເທດໄທ ໄດ້ຈັດງານສະແດງ ແລະ ຈຳໜ່າຍຜະລິດຕະພັນສິນຄ້າ OTOP ສານສຳພັນສອງແຜ່ນດິນ ຂຶ້ນທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ ໃນລະຫວ່າງວັນທີ 20 ຫາ 22 ກຸມພາ 2020 ໂດຍການເຂົ້າຮ່ວມຂອງ ທ່ານ ພົງພັດ ວົງຕະກຸນ ຮອງຜູ້ວ່າລາດຊະການຈັງຫວັດຈັນທະບູລີ, ທ່ານ ນາງ ປະວິດຕາ ມ່ວງສະກຸນ ຜູ້ຊ່ວຍອຳນວຍການສຳນັກງານສົ່ງເສີມການຄ້າໃນຕ່າງປະເທດ ນະຄອນຫຼວງວຽງຈັນ ພ້ອມດ້ວຍຜູ້ປະກອບການສິນຄ້າໂອທັອບ ( OTOP ) ໃນຈັງຫວັດຈັນທະບູລີ ແລະ ຈັງຫວັດໃກ້ຄຽງເຂົ້າຮ່ວມ.
ທ່ານ ນາງ ວັນວິສາ ນາມແກ້ວ ຫົວໜ້າຝ່າຍອຳນວຍສຳນັກງານພັດທະນາຊຸມຊົນ ຈັງຫວັດຈັນທະບູລີ ກ່າວວ່າ: ການຈັດງານສະແດງ ແລະ ຈຳໜ່າຍຜະລິດຕະພັນສິນຄ້າ OTOP ສານສຳພັນສອງແຜ່ນດິນໃນຄັ້ງນີ້ປະກອບດ້ວຍກຸ່ມເປົ້າໝາຍ OTOP Trader ເຄືອຂ່າຍ OTOP ຜູ້ຜະລິດ, ຜູ້ປະກອບການ OTOP ຂອງຈັງຫວັດຈັນທະບູລີ ແລະ ຈັງຫວັດໃກ້ຄຽງຈາກປະເທດໄທ ເຂົ້າຮ່ວມວາງສະແດງ ແລະ ຈຳໜ່າຍຈໍານວນ 50 ຮ້ານ.
ສິນຄ້າສ່ວນຈະໃຫຍ່ຈະເປັນປະເພດອາຫານ ( ເຂົ້າໜົມ ), ເຄື່ອງສະໝຸນໄພ, ສິນຄ້າຫັດຖະກຳ ແລະ ມີສິນຄ້າ ODOP ຈາກ ສປປ ລາວ ເຂົ້າຮ່ວມ 3 ຮ້ານ.
ຈຸດປະສົງຂອງການຈັດງານແມ່ນເພື່ອເພີ່ມຊ່ອງທາງການຕະຫຼາດໃຫ້ກັບຜະລິດຕະພັນ OTOP ເພື່ອໃຫ້ OTOP Trader ແລະ ຜູ້ຜະລິດ, ຜູ້ປະກອບການ OTOP ຂອງຈັງຫວັດໄດ້ຮຽນຮູ້ແນວທາງໃນການພັດທະນາຄຸນນະພາບມາດຕະຖານສິນຄ້າ ໃຫ້ເປັນທີ່ຍອມຮັບຂອງປະຊາຊົນປະເທດເພື່ອນບ້ານ ຈາກປະສົບການການຈຳໜ່າຍສິນຄ້າ, ໃຫ້ OTOP Trader ແລະ ຜູ້ຜະລິດ, ຜູ້ປະກອບການ OTOP ໄດ້ມີໂອກາດເຈລະຈາເຮັດທຸລະກິດຂອງປະເທດເພື່ອນບ້ານ ເພື່ອສົ່ງເສີມຄວາມສຳພັນດ້ານການຄ້າ ແລະ ການຮ່ວມມືກັບປະເທດເພື່ອນບ້ານ, ສົ່ງເສີມຄວາມສຳພັນດ້ານການຄ້າ ແລະ ການຮ່ວມມືລະຫວ່າງປະເທດເພື່ອນບ້ານໄດ້ຢ່າງມີປະສິດທິພາບ ແລະ ເກີດຜົນເປັນຮູບປະທຳ.
ທ່ານ ພົງພັດ ວົງຕະກູນ ກ່າວວ່າ: ບັນດາສິນຄ້າຂອງຈັງຫວັດຈັນທະບູລີ ແມ່ນມີຫຼາກຫຼາຍຜະລິດຕະພັນ ໂດຍສະເພາະສິນຄ້າ OTOP. ແຕ່ການນຳມາວາງສະແດງໃນງານທີ່ ສປປ ລາວ ໃນຄັ້ງນີ້ແມ່ນເປັນພຽງຈຳນວນໜຶ່ງ. ແຕ່ຢ່າງໃດຕາມ, ໃນຄັ້ງນີ້ພວກເຮົາຫວັງວ່າກຸ່ມຜູ້ຄ້າ, ຜູ້ປະກອບການຂອງໄທ ແລະ ສປປ ລາວ ຈະມີການຈັບຄູ່ທຸລະກິດ ເພື່ອເປັນການຕໍ່ຍອດໃນອະນາຄົດໃນການຈັດຈຳໜ່າຍສິນຄ້າ ໂດຍສະເພາະບໍ່ຂາຍແຕ່ໃນງານວາງສະແດງເທົ່ານັ້ນ ແລະ ການຈັດງານໃນຄັ້ງນີ້ຫວັງວ່າຈະເປັນການເພີ່ມສານສຳພັນລະຫວ່າງຜູ້ປະກອບການ ແລະ ປະຊາຊົນ 2 ປະເທດ.
( ຂ່າວ: ສັນຕິ )