ໃນຮອບ 15 ວັນຂອງເດືອນກັນຍາ 2019 ເງິນກີບຍັງອ່ອນຄ່າຕໍ່ເນື່ອງຢູ່ໃນລະດັບ 293 ກີບຕໍ່ 1 ບາດ ແລະ 8.805 ກີບຕໍ່ໂດລາ. ຂະນະທີ່ນັກເສດຖະສາດຫຼາຍທ່ານໄດ້ໃຫ້ຄໍາແນະນຳຫຼາຍຢ່າງ ເຊິ່ງກໍມີຫຼາຍປັດໄຈໃນຕົວ ແລະ ນອກຕົວ ລວມທັງສະພາບເສດຖະກິດໃນປັດຈຸບັນ.
ອີງຕາມອັດຕາແລກປ່ຽນຂອງທະນາຄານການຄ້າຕ່າງປະເທດລາວ ມະຫາຊົນ ເຫັນວ່າ: ວັນທີ 2 ອັດຕາແລກປ່ຽນຢູ່ທີ່ 291 ກີບຕໍ່ 1 ບາດ ແລະ ສືບຕໍ່ອ່ອນລົງຈົນຈຸລະດັບ 293,1 ກີບຕໍ່ 1 ບາດ ໃນວັນທີ 5 ກັນຍາ ກ່ອນທີ່ຈະແຂງຄ່າຂຶ້ນມາເລັກໜ້ອຍ ໃນວັນສຸກທີ 6 ກັນຍາ ຢູ່ທີ່ 292,29 ກີບຕໍ່ 1 ບາດ.
ເຂົ້າສູ່ອາທິດທີ 2 ( 9 – 13 ກັນຍາ ) ເຫັນວ່າເໜັງຕີງແຮງຫຼາຍ ຈາກລະດັບ 292,46 ກີບ ໃນວັນຈັນທີ 9 ກັນຍາ ມາເປັນ 294,57 ກີບຕໍ່ 1 ບາດ ໃນວັນສຸກທີ 13 ກັນຍາ.
ສ່ວນອັດຕາແລກປ່ຽນເງິນກີບທຽບໃສ່ເງິນໂດລາ ເຫັນວ່າຍັງອ່ອນຄ່າເຊັ່ນກັນ ເລີ່ມຕົ້ນເດືອນຢູ່ໃນລະດັບ 8.781 ກີບຕໍ່ 1 ໂດລາ. ຈາກນັ້ນ, ກໍໄດ້ອ່ອນຄ່າລົງເລື້ອຍໆຢູ່ທີ່ 8.796, 8.801, 8.803 ແລະ 8.805 ຕາມລໍາດັບນັບແຕ່ວັນທີ 2 – 16 ກັນຍາ 2019; ແຕ່ສະເພາະວັນທີ 12 ກັນຍາຢູ່ທີ່ 8.808 ກີບຕໍ່ 1 ໂດລາ.
ເມື່ອບໍ່ດົນມານີ້, ທະນາຄານ ແຫ່ງ ສປປ ລາວ ( ທຫລ ) ກໍໄດ້ລາຍງານກ່ຽວກັບສະພາບອັດຕາແລກປ່ຽນເງິນກີບກັບເງິນຕາຕ່າງປະເທດໄດ້ມີການເໜັງຕີງ ສົ່ງຜົນກະທົບຕໍ່ການດໍາເນີນທຸລະກິດ ອັນເຮັດໃຫ້ພໍ່ຄ້າຊາວຂາຍຈໍານວນໜຶ່ງພົບຄວາມຫຍຸ້ງຍາກ ແລະ ມີຄໍາຖາມເກີດຂຶ້ນໃນສັງຄົມ. ຕໍ່ບັນຫາດັ່ງກ່າວ ທຫລ ກໍໄດ້ອະທິບາຍ ວ່າ: ໃນປີ 2019 ສະພາບຕະຫຼາດເງິນຕາສາກົນ ເຫັນວ່າມີການຜັນຜວນຫຼາຍສົມຄວນ ໂດຍສະເພາະແມ່ນເງິນບາດ ແລະ ໂດລາ ເຊິ່ງໄລຍະ 8 ເດືອນຂອງປີ 2019 ເງິນໂດລາແຂງຄ່າ 1,5% ທຽບໃສ່ກັບເງິນເອີໂຣ ແລະ ເງິນບາດແຂງຄ່າ 3,50% ທຽບໃສ່ກັບເງິນໂດລາ.
ຈາກສະພາບດັ່ງກ່າວ ໄດ້ກະທົບຕໍ່ເງິນກີບອ່ອນຄ່າລົງຢ່າງຫຼີກລຽງບໍ່ໄດ້ ເນື່ອງຈາກສ່ວນໃຫຍ່ຍັງເພິ່ງພາການນໍາເຂົ້າ ໂດຍສະເພາະສິນຄ້າອຸປະໂພກ – ບໍລິໂພກ ແລະ ວັດຖຸດິບເພື່ອການລົງທຶນ ເຮັດໃຫ້ມີລັກສະນະຂາດດຸນການຄ້າຕໍ່ເນື່ອງ. ຂະນະດຽວກັນ, ສັງຄົມມີຄວາມຕ້ອງການເງິນຕາຕ່າງປະເທດ ເພື່ອຊໍາລະການນໍາເຂົ້າສິນຄ້າ ແລະ ບໍລິການໃນແຕ່ລະປີສູງກວ່າຄວາມສາມາດຕອບສະໜອງຂອງລະບົບເສດຖະກິດຂອງປະເທດເຮົາ. ເຖິງຢ່າງໃດກໍຕາມ, ທຫລ ໄດ້ມີຄວາມພະຍາຍາມຄວບຄຸມປະລິມານເງິນໃນຂອດຈໍລະຈອນໃຫ້ຢູ່ໃນລະດັບທີ່ເໝາະສົມກັບສະພາບ ແລະ ປະຕິບັດນະໂຍບາຍໃຫ້ໄປຕາມກົນໄກຕະຫຼາດທີ່ມີການຄຸ້ມຄອງຂອງລັດ.
ນັກເສດຖະສາດຂອງທະນາຄານແຫ່ງໜຶ່ງ ໃຫ້ທັດສະນະວ່າ: ການທີ່ເງິນກີບສືບຕໍ່ອ່ອນຄ່າແມ່ນເກີດຈາກຫຼາຍປັດໄຈທັງໃນຕົວ ແລະ ນອກຕົວ, ແຕ່ປັດໄຈພາຍໃນຄິດວ່າສັງຄົມມີຄວາມຕ້ອງການເງິນຕາຕ່າງປະເທດຢ່າງຫຼວງຫຼາຍ ເພື່ອໄວ້ຊໍາລະສິນຄ້ານໍາເຂົ້າ ເພື່ອເກງກໍາໄລ ແລະ ອັນເຮັດໃຫ້ອັດຕາແລກປ່ຽນຕາມທ້ອງຕະຫຼາດສູງກວ່າ ຫາກທຽບໃສ່ກັບທະນາຄານ.
ສ່ວນປັດໄຈພາຍນອກ: ການສົ່ງອອກຂອງປະເທດເພື່ອນບ້ານ ໂດຍສະເພາະແມ່ນໄທເພີ່ມຂຶ້ນ ເຮັດໃຫ້ເງິນຕາໄຫຼເຂົ້າປະເທດຫຼາຍຂຶ້ນ ລວມທັງການປະຕິບັດນະໂຍບາຍຂອງເຂົາເຈົ້າ ເພື່ອຮັກສາສະຖຽນລະພາບຂອງເງິນບາດບໍ່ໃຫ້ແຂງຄ່າເກີນໄປ, ການຄຸ້ມຄອງອັດຕາແລກປ່ຽນ ແລະ ການຖືຄອງພັນທະບັດຂອງນັກລົງທຶນຕ່າງປະເທດມີໄລຍະສັ້ນ ແລະ ມີມູນຄ່າຈໍາກັດ ກໍເປັນປັດໄຈໜຶ່ງທີ່ເຮັດໃຫ້ເງິນບາດແຂງຄ່າທຽບໃສ່ກັບໂດລາ.
ຜູ້ບໍລິຫານຂອງທະນາຄານທຸລະກິດແຫ່ງໜຶ່ງ ໃຫ້ຄໍາເຫັນວ່າ: ການສົ່ງອອກສິນຄ້າຈາກລາວໄປຕ່າງປະເທດ 6 ເດືອນຕົ້ນປີ 2019 ເຖິງວ່າຈະເພີ່ມຂຶ້ນ ຫາກທຽບໃສ່ກັບໄລຍະດຽວກັນຂອງປີ 2018 ແຕ່ການເພີ່ມຂຶ້ນດັ່ງກ່າວຍັງບໍ່ທັນກ້າວກະໂດດ ໂດຍສະເພາະແມ່ນປະເພດສິນຄ້າກະສິກຳ ເຊັ່ນ: ມັນຕົ້ນ, ສາລີ, ເຂົ້າ, ກາເຟ, ພືດຜັກ ແລະ ອື່ນໆ ທີ່ສົ່ງອອກໄປ ສປ ຈີນ, ຫວຽດນາມ ແລະ ໄທ. ຂະນະທີ່ທຸລະກິດ ຫຼື ສິນຄ້າທີ່ຕິດພັນກັບການນໍາເຂົ້າຈາກໄທ ຫາກເງິນບາດແຂງຄ່າກໍເຮັດໃຫ້ການນໍາເຂົ້າບາງລາຍການຢຸດສະງັກ ແຕ່ກໍເຊື່ອວ່າໃນທ້າຍປີນີ້ເງິນກີບຈະກັບມາແຂງຄ່າອີກຄັ້ງ ເນື່ອງຈາກການສົ່ງອອກສິນຄ້າ ແລະ ເຂື່ອນໄຟຟ້າ 10 ກວ່າແຫ່ງທີ່ກໍາລັງສໍາເລັດເລີ່ມມີການຜະລິດກະແສໄຟຟ້າສົ່ງອອກໃນຕົ້ນປີ 2020 ແລະ ຫຼ້າສຸດ ລາວເຮົາກໍໄດ້ເຮັດສັນຍາຂາຍໄຟຟ້າໃຫ້ກັບ ກໍາປູເຈຍ ແລະ ເຂື່ອນບາງແຫ່ງກໍໄດ້ສໍາເລັດ ການເຮັດສັນຍາຊື້ – ຂາຍໄຟ ເມື່ອບໍ່ດົນມານີ້.
ຂໍ້ມູນຈາກທະນາຄານ ແຫ່ງ ສປປ ລາວ ໄດ້ຊີ້ໃຫ້ເຫັນເຖິງບັນດາປັດໄຈທີ່ເຮັດໃຫ້ອັດຕາແລກປ່ຽນເໜັງຕີງເກີດຈາກຫຼາຍປັດໄຈ ເຊັ່ນ:
1 ປັດໄຈທາງດ້ານເສດຖະກິດ.
2 ປັດໄຈກ່ຽວຂ້ອງກັບນະໂຍບາຍການເງິນ ແລະ ເງິນຕາ.
3 ປັດໄຈດ້ານເຕັກນິກການຕະຫຼາດ ແລະ ດ້ານຈິດຕະວິທະຍາ ເຊິ່ງມີທັງໄລຍະສັ້ນ ແລະ ຍາວ ເຊິ່ງໄລຍະສັ້ນແມ່ນເກີດຈາກການເຄື່ອນຍ້າຍກະແສເງິນທຶນເປັນຫຼັກ, ຄວາມແຕກຕ່າງຂອງອັດຕາແລກປ່ຽນລະຫວ່າງປະເທດ, ປັດໄຈທາງດ້ານເຕັກນິກການຕະຫຼາດ ແລະ ອື່ນໆ. ສ່ວນໄລຍະຍາວແມ່ນຈາກພື້ນຖານເສດຖະກິດຂອງປະເທດເປັນຫຼັກ, ປັດໄຈທາງດ້ານເສດຖະກິດ, ປັດໄຈນະໂຍບາຍການເງິນ – ເງິນຕາ ແລະ ຍຸດທະສາດການພັດທະນາປະເທດໄລຍະຍາວ.
[ ຂ່າວ: ສົມສະຫວິນ ]
