ມື້ນີ້ຂ່າວບັນເທີງພາທຸກຄົນມາຊົມຄວາມງາມຂອງນ້ອໆສາວງາມທີ່ຄວ້າຕໍາແໜ່ງເວທີ ນາງສາວເຊກອງໄປຄອງໄດ້ງາມຫວານຍິ້ມມີສະເໜ່ສຸດໆ ນັ້ນກໍຄືນ້ອງ ນາງ ຊົມວິວ ຄິວລະວົງ ຄວ້າໄດ້ຕຳແໜ່ງນາງສາວເຊກອງ ປະຈຳປີ 2024 ເຊິ່ງງານປະກວດນາງສາວແຂວງເຊກອງ ເປັນໜຶ່ງໃນກິດຈະກໍາທີ່ກໍານົດໃນງານສະເຫຼີມສະຫຼອງວັນສ້າງຕັ້ງແຂວງເຊກອງ ຄົບຮອບ 40 ປີນັ້ນເອງ.
ການປະກວດແມ່ນຈັດຂຶ້ນໃນຄໍ່າຄືນວັນທີ 1 ເມສາ 2024ຜ່ານມາ. ຜ່ານການປະກວດ ໝາຍເລກ S08 ນາງ ຊົມວິວ ຄິວລະວົງ ສາມາດເອົາຊະນະໃຈກໍາມະການ ແລະ ຄວ້າໄດ້ຕຳແໜ່ງນາງສາວເຊກອງ ປະຈໍາປີ 2024 ໄດ້ຮັບມົງກຸດ ພ້ອມສາຍສະພາຍ ແລະ ເງິນລາງວັນ 15 ລ້ານກີບ, ໃນຂະນະທີ່ໝາຍເລກ S17 ນາງ ທິດນະມອນ ສຸລິຍະໄທ ຄວ້າໄດ້ 3 ລາງວັນ ຄື: ໄດ້ອັນດັບທີ 2 ໄດ້ຮັບສາຍສະພາຍ ພ້ອມເງິນລາງວັນ 10 ລ້ານກີບ, ນອກນີ້ຍັງໄດ້ຮັບລາງວັນຂວັນໃຈມະຫາຊົນ ໄດ້ຮັບສາຍສະພາຍ ພ້ອມເງິນລາງວັນ 3 ລ້ານກີບ ແລະ ລາງວັນຜິວງາມ ໄດ້ຮັບສາຍສະພາຍ ພ້ອມເງິນສົດ 2 ລ້ານກີບ, ອັນດັບທີ 3 ໝາຍເລກ S18 ນາງ ສຸກສະໄໝ ສິດທິອຸດົມ ໄດ້ຮັບສາຍສະພາຍ ພ້ອມເງິນລາງວັນ 8 ລ້ານກີບ, ຮອງອັນດັບ 3 ມີ 4 ນ້ອງ ຄື: S01 ນາງ ອາເຫວີຍ ອິນທາທິລາດ, S13 ນາງ ຈັນທະໜອມ ແກ້ວສະຫງ່າ, S05 ນາງ ສຸດາວັນ ບຸດບຸນມີ ແລະ S20 ນາງ ປາລີດຕາ ຜາສຸກ ໄດ້ຮັບເງິນລາງວັນ 5 ລ້ານກີບ, ສໍາລັບ 13 ໝາຍເລກທີ່ຕົກຮອບແມ່ນໄດ້ຮັບລາງວັນຊົມເຊີຍຄົນລະ 2 ລ້ານກີບ ແລະ ການປະກວດຄັ້ງນີ້ ມີຜູ້ເຂົ້າປະກວດ 20 ນ້ອງນາງສາວ, ໃນນີ້ ຕົວແທນຈາກເມືອງດາກຈຶງ 2 ຄົນ, ເມືອງກະລຶມ 4 ຄົນ, ເມືອງລະມາມ 2 ຄົນ ເມືອງທ່າແຕງ 3 ຄົນນັ້ນເອງ.
ພາຍຫຼັງໄດ້ຮັບຕໍາແໜ່ງອັນຊົງຄຸນຄ່າໄປຄອງ ນ້ອງ ຊົມວິວ ຄິວລະວົງ ນາງສາວເຊກອງ ປະຈຳປີ 2024 ກໍໄດ້ມີການໂພສພາບພ້ອມແຄັບຊັນເພື່ອເວົ້າເຖິງຄວາມຮູ້ສຶກຂອງຕົນເອງຫຼັງຈາກໄດ້ຮັບຕໍາແໜ່ງວ່າ: “ ກ່ອນອື່ນໝົດຂໍຂອບໃຈທຸກຄົນທີ່ຊ່ວຍເຊຍ ແລະ ສົ່ງກຳລັງໃຈໃຫ້ນ້ອງໃນການປະກວດຄັ້ງນີ້ຈົນສາມາດປະສົບຜົນສຳເລັດໄດ້ ຂອບໃຈເມືອງລະມາມ ທີ່ສົ່ງເຂົ້າປະກວດນາງສັງຂານ ທີ່ໃຫ້ໂອກາດນ້ອງໄດ້ມາສະແດງສັກກະຍະພາບ ຄວາມສາມາດ ແລະ ໄດ້ມາຢືນເທິງເວທີແຫ່ງນີ້ຂອບໃຈທາງຄະນະກຳມະການຄະນະຮັບຜິດຊອບງານ ພ້ອມດ້ວຍຄອບຄົວອ້າຍເອື້ອຍພີ່ນ້ອງ ແລະ ໝູ່ຄູ່ທຸກຄົນທີ່ຊັບພອດເປັນກຳລັງໃຈໃຫ້ ແລະ ຊ່ວຍເຊຍຊ່ວຍແຊຣ໌ ແລະ ໃຫ້ຄຳປຶກສາຕະຫຼອດ.
ຂອບໃຈທຸກຄົນທີ່ເປັນກຳລັງໃຈໃຫ້ ທັງສົ່ງມາທາງຂໍ້ຄວາມທັງ Comment ຕ່າງໆ ອາດຈະບໍ່ໄດ້ຕອບໝົດທຸກຄົນ ແຕ່ຢາກຈະບອກວ່າທຸກກຳລັງໃຈຂອງທຸກຄົນທີ່ສົ່ງມາ ເຮັດໃຫ້ນ້ອງປະສົບຜົນສຳເລັດໃນມື້ນີ້ ຂອບໃຈເວທີ Miss Tourism Laos ນາງສາວທ່ອງທ່ຽວລາວ ທີ່ໃຫ້ບົດຮຽນໃຫ້ ຄວາມຮູ້ປະສົບການຕ່າງໆ ຈົນໄດ້ນຳເອົາໃຊ້ໃນມື້ນີ້ຈົນໄດ້ຮັບຜົນສຳເລັດ ຂອບໃຈແມ່ ນາງ ຄໍາພອນ ແກ້ວພິມມະຈັນ ທີ່ຄອຍສະໜັບສະໜູນ ແລະ ຊັບພອດລູກທຸກຢ່າງ ຢາກບອກແມ່ວ່າລູກເຮັດໄດ້ລະເດີ ຂອບໃຈແມ່ລ້ຽງ ສີຜາສຸກ ແກ້ວພູທານ ປຽບສະເໝືອນແມ່ຜູ້ທີ 2 ທີ່ຄອຍຊ່ວຍເຫຼືອລູກທຸກຢ່າງ ຂອບໃຈຊ່າງແຕ່ງໜ້າທີ່ເນລະມິດຄວາມງາມໃຫ້ໃນມື້ນີ້ Ling Xykm.
ທ້າຍນີ້ຂ່າວບັນເທີງເອງຕ້ອງຂໍສະແດງຄວາມຍິນດີກັບນ້ອງ ແລະ ຝາກທຸກຄົນຕິດຕາມຜົນງານການເຄື່ອນໄຫວຂອງນ້ອງແດ່ເດີ.
