ພິທີປະກາດທະຫານພັນທະ ສົກປີ 2021 ສືບຕໍ່ເຂົ້າເປັນທະຫານອາຊີບ ແລະ ປະກາດຊັ້ນນາຍສິບ ຈັດຂຶ້ນຢ່າງເປັນທາງການໃນວັນທີ 1 ມີນາ 2024 ຜ່ານມານີ້, ຢູ່ທີ່ສະໂມສອນກອງພັນໃຫຍ່ 202 ຂື້ນກັບ ກອງພົນທີ 2 ໂດຍການເປັນປະທານຂອງ ສະຫາຍ ພັນເອກ ສອນເພັດ ຈັນສົມ ຫົວໜ້າຫ້ອງເສນາທິການ ກອງພົນທີ 2, ເປັນກຽດເຂົ້າຮ່ວມຂອງ ສະຫາຍ ພັນເອກ ສົມດີ ໄຊຍະລາດ ຫົວໜ້າການທະຫານ ກອງພັນໃຫຍ່ 202, ບັນດາພະແນກການວິຊາການ ທີ່ກ່ຽວຂ້ອງຈາກກອງພົນ, ມີຄະນະພັກ-ຄະນະບັນຊາກອງພັນໃຫຍ່, ພະແນກການ, ກົມກອງ, ຜູ້ທີ່ເຮັດວຽກງານວິຊາການກຳລັງພົນ, ຕະຫລອດຮອດທະຫານພັນທະ ແລະ ຜູ້ທີ່ໄດ້ຮັບການເລື່ອນຊັ້ນໃໝ່ ເຂົ້າຮ່ວມຢ່າງພ້ອມພຽງ.
ສະຫາຍ ພັນໂທ ພອນພົງ ທອງປະເສີດ ຫົວໜ້າພະແພກກຳລັງພົນ ຫ້ອງເສນາທິການກອງພົນທີ 2 ກໍ່ໄດ້ຂື້ນຜ່ານຂໍ້ຕົກລົງ ໃບນຳສົ່ງທະຫານພັນທະສຶບຕໍ່ເຂົ້າເປັນທະຫານອາຊີບ ເລກທີ 037/ສພຊ, ລົງວັນທີ 13/12/2012 ອີງໃສ່ຂໍ້ກຳນົດວ່າດ້ວຍລະບຽບການຂອງນາຍສີບ ແລະ ພົນທະຫານໃນກອງທັບປະຊາຊົນລາວ (ສະບັບປັບປຸງ) ເລກທີ 1681/ກປທ, ລົງວັນທີ 12/05/2016 (ໝວດທີ 4, ມາດຕາ 9), ອິງໃສ ຂໍ້ຕົກລົງ ຂອງກົມໃຫຍ່ເສນາທິການ ວ່າດ້ວຍການອະນຸນັດທະຫານພັນທະສືບຕໍ່ເຂົ້າເປັນທະຫານອາຊີບ ສະບັບເລກທີ 226/ກສນ, ລົງວັນທີ 24/01/2024, ກົມກຳລັງພົນ ກົມໃຫຍ່ເສນາທີການ ໄດ້ນຳສົ່ງທະຫານພັນທະສືບຕໍ່ເຂົ້າເປັນທະຫານອາຊີບຕາມການອະນຸມັດ ຂອງກົມໃຫຍ່ເສນາທິການໃຫ້ ກອງພົນທະຫານຮາບທີ 2, ກອງພັນໃຫຍ່ 202 ເຊິ່ງມີຈຳນວນທັງໝົດ 35 ສະຫາຍ. ໂດຍອີງຕາມຜົນງານ ແລະ ຄຸນງາມຄວາມດີ, ຄວາມຈູບຈ້າວຫ້າວຫັນໃນການເຄື່ອນໄຫວຈັດຕັ້ງປະຕິບັດໜ້າທີ່ວຽກງານພັນທະປ້ອງກັນຊາດເຮັດໃຫ້ສະພາບມີຄວາມສະຫງົບໃນໄລຍະ 2 ປີຜ່ານມາ ແລະ ຍັງໄດ້ປະກາດເລື່ອນຊັ້ນໃຫ້ນາຍສິບພົນທະຫານ ຊັ້ນ ສອ ຂື້ນ ວທ ຈຳນວນ 35 ສະຫາຍ.
ໃນຕອນທ້າຍພິທີຍັງໄດ້ຮັບຟັງການໂອ້ລົມຂອງ ສະຫາຍ ພັນເອກ ສອນເພັດ ຈັນສົມ ຫົວໜ້າຫ້ອງເສນາທິການກອງພົນທີ 2 ເຊິ່ງກ່ອນອື່ນ ສະຫາຍ ໄດ້ຍ້ອງຍໍຊົມເຊີຍດ້ານດີຜົນງານທີ່ໄດ້ເຂົ້າປະກອບສ່ວນຕໍ່ວຽກງານປ້ອງກັນຊາດ, ການເຄື່ອນໄຫວປະກອບສ່ວນປົກປັກຮັກສາພັດທະນາປະເທດຊາດກໍ່ຄືການສ້າງສາພັດທະນາກົມກອງ, ການຈັດຕັ້ງປະຕິບັດຂໍ້ກຳນົດກົດລະບຽບວິໄນຂອງກົມກອງດີໃນໄລຍະຜ່ານມາ ຈາກນັ້ນຍັງໄດ້ຍົກໃຫ້ເຫັນເຖິງພາລະບົດບາດ, ຄວາມໝາຍ, ຄວາມສຳຄັນສິດ ແລະ ໜ້າທີ່ຕໍ່ວຽກງານປ້ອງກັນຊາດ, ໃນນີ້ ທະຫານພັນທະທີ່ສືບຕໍ່ເຂົ້າເປັນທະຫານອາຊີບ ແລະ ຜູ້ທີ່ໄດ້ຮັບການເລື່ອນຊັ້ນໃໝ່ໃນຄັ້ງນີ້ຈົ່ງຝືກຝົນຫລໍ່ຫລອມຕົນເອງທາງດ້ານການເມືອງແນວຄິດ, ດ້ານການຈັດຕັ້ງ ທັດສະນະການດຳລົງຊີວິດໃຫ້ຖືກຕ້ອງ, ເປັນແບບຢ່າງທີ່ດີຂອງກົມກອງ ແລະ ມີຄວາມບຸກບືນ ອົດທົນຜ່ານຜ່າຄວາມຫຍຸ້ງຍາກ ແລະ ມີຄວາມຈູບຈ້າວກ້າວຫັນປະກອບສ່ວນເຂົ້າໃນໜ້າທີ່ວຽກງານການເມືອງຂອງຕົນຢູ່ໃນກົມກອງໃຫ້ດີ ມີຄວາມຮັບຜິດຊອບສູງ, ເຊື່ອມຊືມກຳແໜ້ນ ແລະ ເຂົ້າໃຈແຈ້ງຕໍ່ແນວທາງແຜນນະໂຍບາຍຂອງພັກ-ລັດ ຫັນເອົາແນວທາງທີ່ຖືກຕ້ອງມາຈັດຕັ້ງປະຕິບັດໂດຍສະເພາະແມ່ນຂໍ້ກຳນົດ 7 ລະບອບ 18 ວຽກຂອງກອງທັບ ເພື່ອແນ່ໃສ່ເຮັດໃຫ້ຕົນເອງກາຍເປັນນາຍ ແລະ ພົນທະຫານຜູ້ທີ່ສືບທອດທີ່ດີຂອງກົມກອງຢ່າງແທ້ຈິງໃນຕໍ່ໜ້າ .
ຂຽນໂດຍ: ພາໄຊ ລໍກຽດຄຳມີ
