ຫຼາຍທ່ານອາດຈະເຫັນຄລິບກ່ອນໜ້ານີ້ທີ່ມີການເຜີຍແຜ່ໃນວັນທີ 2 ມີນາ 2024 ປາກົດວ່າ: ປະຊາຊົນພົບເຫັນນ້ຳຕົກຕາດຂະມຶດ ຢູ່ບ້ານໜອງຫຼວງ ເມືອງປາກຊ່ອງ ແຂວງຈໍາປາສັກ ກາຍເປັນສີເຫຼືອງຂຸ່ນໆ ຜິດຈາກປົກກະຕິ ເຮັດໃຫ້ໃຫ້ສັງຄົມ ແລະ ຜູ້ຊົມໃຊ້ສື່ອອນລາຍ ສັບສົນ, ມີຄວາມເຂົ້າໃຈໄປຄົນລະທິດລະທາງ ແລະ ມີຄໍາເຫັນຕ່າງໆ.
ຫຼ້າສຸດ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຈຳປາສັກ ໃນຖານະເປັນຂະແໜງມະຫາພາກໃນການຄຸ້ມຄອງແຫຼ່ງທ່ອງທ່ຽວ ໄດ້ປະ ສານໄປຍັງ ຄະນະພັກ – ອົງການປົກຄອງບ້ານໜອງຫຼວງ, ຫ້ອງການ ຖວທ ເມືອງປາກຊ່ອງ ແລະ ບໍລິສັດກຣິນແອັດແວນເຈີ ເຊິ່ງເປັນຜູ້ພັດທະນາໃນບໍລິເວນດັ່ງກ່າວ ແລະ ໄດ້ຮັບການລາຍງານວ່າ: ຄຼິປນໍ້າຕົກຕາດຂະມຶດເປັນສີຂຸ່ນເຫຼືອງ ທີ່ປະກົດຂຶ້ນໃນສີ່ອອນລາຍ ເປັນພາບເກົ່າທີ່ເກີດຂຶ້ນປະມານເດືອນກ່ອນ, ສາເຫດ ຍ້ອນບໍລິເວນ ຫົວຕາດ (ລຳຫ້ວຍຕວຍ) ດໍາເນີນການກໍ່ສ້າງໂຄງການເຂື່ອນໄຟຟ້ານໍ້າພາກ ເຊິ່ງໄດ້ມີການຂຸດເຈາະ ແລະ ຖົມດິນບາງບ່ອນ (ເຮັດເປັນຝາຍນໍ້າລົ້ນ) ຈິ່ງເຮັດໃຫ້ສາຍນໍ້າຂຸ່ນ, ປະລິ ມານນໍ້າກໍນ້ອຍລົງ.
ປັດຈຸບັນນໍ້າຕົກຂະມຶດ ໄດ້ກັບມາຂາວໃສເປັນປົກກະຕິແລ້ວ ແລະ ຍັງເປີດໃຫ້ບໍລິການນັກທ່ອງທ່ຽວ ເຂົ້າມາທ່ຽວຊົມຢ່າງເປັນປົກກະຕິ. ຖ້າທ່ານໃດສົງໄສ ແລະ ຍັງຄ້າງຄາໃຈ ກໍຂໍເຊີນໄປທ່ຽວຊົມໃຫ້ເຫັນດ້ວຍຕາຂອງຕົນເອງໄດ້.
ສໍາລັບຕາດຂະມຶດ ຕັ້ງຢູ່ບ້ານໜອງຫຼວງ ເມືອງປາກຊ່ອງ ແຂວງຈໍາປາສັກ ຫ່າງ ຈາກເທດສະບານເມືອງປາກຊອງ ໄປທາງທິດຕາເວັນອອກ 11 ກິໂລແມັດ, ເປັນນໍ້າຕົກທີ່ມີຂະໜາດໃຫຍ່ ແລະ ມີຄວາມສູງເຖິງ 7 ຊັ້ນ ໂດຍສ່ວນທີ່ສູງສຸດແມ່ນສາມາດຂີ່ສະລິງຜ່ານເພື່ອຊົມຄວາມຍິ່ງໃຫຍ່ ແລະ ຄວາມສວຍງາມຂອງສະຖານທີ່ດັ່ງກ່າວ.
Cr: ທີມງານໜັງສືພິມຈໍາປາໃໝ່
