ສປປ ລາວເຮົາເປັນປະເທດທີ່ກຳລັງພັດທະນາ ຊື່ງມີຄວາມຕ້ອງການແຮງງານຈຳນວນຫຼາຍ ແຕ່ໃນເວລາດຽວກັນວິຊາການສະເພາະທາງ ໂດຍສະເພາະໃນວຽກງານຕ່າງໆທີ່ກ່ຽວກັບສີມືແຮງງານ ໃນທີ່ຜ່ານມາຍັງໄດ້ນຳເຂົ້າຈາກຕ່າງປະເທດເປັນຈຳນວນຫຼາຍ ຍ້ອນຄົນພາຍໃນຍັງບໍ່ນິຍົມໄປຮຽນສາຍອະຊີວະເທົ່າທີ່ຄວນ.
ທີ່ຄົນບໍ່ນິຍົມໄປຮຽນອະຊີວະຍ້ອນຫຍັງ ກ່ອນອື່ນຄືຄວາມເຂົ້າໃຈ ຫຼາຍຄົນເປັນຕົ້ນຜູ້ທີ່ຈະຮຽນນັ້ນມີໜ້ອຍຄົນທີ່ຮູ້ວ່າ ຮຽນອະຊີວະແມ່ນກ່ຽວກັບຫຍັງ ຮຽນແລ້ວໄດ້ຫຍັງຈະມາເຮັດວຽກແນວໃດ ຄວາມຈີງແລ້ວ ອະຊີວະແມ່ນເປັນສາຂາຄວາມຮູ້ ແລະວິຊາຊີບ ກ່ຽວກັບການປະຍຸກໃຊ້ປະຍຸກວິທະຍາ ດ້ານເຕັກໂນໂລຊີວິທະຍາສາດ ເພື່ອມາປັບໃຊ້ໃນຊີວິດປະຈຳວັນໃຫ້ເກີດປະໂຫຍດສູງສຸດ ເປັນຕົ້ນ ການນຳໃຊ້ວັດສະດຸ, ເຄື່ອງຈັກ, ເຄື່ອງໃຊ້, ເຄື່ອງມື ແລະຂະບວນການຕ່າງໆ ເພື່ອສະໜອງຕໍ່ຈຸດປະສົງການໃຊ້ງານທີ່ຖືກຕ້ອງ ແລະປອດໄພ ເຊື່ອຖືໄດ້ ກໍ່ຄືການນຳໃຊ້ຢ່າງມີຫຼັກວິຊາການທີ່ຊຳນານງານນັ້ນເອງ.
ສຳລັບບ້ານເຮົາໃນທີ່ຜ່ານມາກໍມີບາງວິທະຍາໄລໄດ້ລົງໂຄສະນາເຜີຍແຜ່ກ່ຽວກັບຄວາມຮູ້ພື້ນຖານຂອງອະຊີວະແນ່ແລ້ວ ແຕ່ບາງຂໍ້ມູນຄວາມຕ້ອງເພີ່ມເຕີມອີກເປັນຕົ້ນ ໃນແຕ່ລະສາຍອາຊີບຄວາມຕ້ອງການຂອງຕະຫຼາດແຮງງານຫຼາຍປານໃດ ຄົນມາຮຽນຫຼາຍໜ້ອຍສ່ຳໃດ ມີບຸກຄົນໃດທີ່ຮຽນຈົບໄປແລ້ວມີຊີວິດທີ່ດີຂຶ້ນຍ້ອນວິຊາຊີບນີ້ ຫຼື ບຸກຄົນໃດທີ່ມີລາຍຮັບແຕ່ຍັງຮຽນບໍ່ຈົບ ເພື່ອສ້າງແຮງຈູງໃຈໃຫ້ນ້ອງນັກຮຽນຢາກມາຮຽນໃນສາຍວິຊາຊີບຍ້ອນມີເປົ້າໝາຍ ມີບຸກຄົນເປັນຕົ້ນແບບ(ໄອດໍ).
ແນວໃດກໍ່ດີ ຖືເປັນຂ່າວດີທີ່ວິທະຍາໄລເຕັກນິກວິຊາຊີບແຂວງຫຼວງພະບາງ ໄດ້ລົງເຜີຍແຜ່ຫຼັກສູດໃໝ່ໃຫ້ແກ່ນັກຮຽນຜູ້ທີ່ມີຄວາມສົນໃຈເຂົ້າຮຽນສາຍອາຊີວະສຶກສາ ທີ່ ໂຮງຮຽນ ເຮີແມນ ກມາຍເນີ ຫຼວງພະບາງ.
ພິທີຈັດຂຶ້ນໃນວັນທີ 29 ກຸມພາ 2024 ນີ້ ນຳພາທິມງານໂດຍ ທ່ານ ບຸນເພັງ ແຈ່ມມາໄລ ຮອງຜູ້ອຳນວຍການວິທະຍາໄລ, ມີຫົວໜ້າ ພະແນກວິຊາການ, ຫົວໜ້າພະແນກກິດຈະການນັກສຶກສາ, ຮອງຫົວໜ້າພະແນກວິຊາການ, ຮອງຫົວໜ້າພະແນກກິດຈະການນັກສຶກສາ, ພະນັກງານຄູ – ອາຈານ, ຄະນະອຳນວຍການ ໂຮງຮຽນ ເຮີແມນ ກມາຍເນີ ຫຼວງພະບາງ. ພ້ອມດ້ວຍ ຄູ-ອາຈານ ໂຮງຮຽນ ເຮີແມນ ກມາຍເນີ ຫຼວງພະບາງ ແລະ ນັກຮຽນຊັ້ນ ມ1 – ມ7 ເຂົ້າຮ່ວມ.