ງານນີ້ຂ່າວບັນເທີງບອກເລີຍວ່າເໝາະສົມກັບຕໍາແໜ່ງ ແລະ ສະຫງ່າງາມທີ່ສຸດເລີຍ ສໍາລັບສາວງາມຜູ້ຄວ້າຕໍາແໜ່ງນາງສາວດອກງິ້ວບານ 2024 ໄປຄອງສົມກັບແຮງເຊຍແຮງໃຈຂອງແຟນໆ ແລະ ຫຼັງຈາກການຈັດປະກວດທີ່ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວສິ້ນສຸດລົງ ແລະ ກໍໄດ້ສາວງາມຜູ້ຄວ້າຕໍາແໜ່ງນາງສາວດອກງິ້ນບານ ປະຈຳປີ 2024 ໄປຄອງໄດ້ແກ່ໝາຍເລກ MK4 ນາງ ວິສຸດາ ອຸ່ນແກ້ວ ຕົວແທນຈາກເມືອງຕົ້ນເຜິ້ງ ແຂວງບໍ່ແກ້ວ.
ພິທີປະກວດໄດ້ຈັດຂຶ້ນໃນວັນທີ 28 ມັງກອນ ໃນງານເທສະການດອກງິ້ວບານ ປີ 2024 ທີ່ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໂດຍມີ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດ ຖະມົນຕີ, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ທ່ານ ຈ້າວເຫວີຍ ປະທານສະພາບໍລິຫານເຂດເສດຖະກິດພິເສດສາມຫຼ່ຽມຄໍາ, ມີຜູ້ໃຫ້ການສະໜັບສະໜູນ, ຄະນະກຳມະການ, ມວນຊົນທັງພາຍໃນ ແລະ ຕ່າງປະເທດເຂົ້າຮ່ວມຊົມຮ່ວມເຊຍຢ່າງເປັນຂະບານການຄຶກຄື້ນກັນເລີຍ.
ການຈັດງານປະກວດນາງສາວດອກງິ້ວບານ ກໍຖືໄດ້ວ່າເປັນອີກໜຶ່ງໃນກິດຈະກຳທີ່ໄດ້ຈັດຂຶ້ນທຸກໆປີ ໃນໂອກາດເທສະການດອກງິ້ວບານ. ສໍາລັບນາງສາວທີ່ເຂົ້າຮ່ວມປະກວດແມ່ນມາຈາກເມືອງຕ່າງໆພາຍໃນແຂວງ ບໍ່ແກ້ວເອງ ເຊິ່ງມີທັງໝົດ 20 ນາງສາວກັນເລີຍ ເພື່ອເຂົ້າຮອບຕັດສິນແລ້ວຄັດໃຫ້ເຫຼືອ 10 ນາງສາວ, ຈາກ 10 ນາງສາວຄັດອອກເຫຼືອພຽງ 4 ນາງສາວເທົ່ານັ້ນ ເພື່ອເຂົ້າຮອບຊີງອັນດັບ 1, ອັນດັບ 2 , ອັນດັບ 3 ແລະ ອັນດັບ 4ນັ້ນເອງ.
ຜົນຂອງການປະກວດໃນເວທີ່ອັນຊົງກຽດອີກໜຶ່ງເວທີ ເຊິ່ງອັນດັບ 1 ໄດ້ແກ່ໝາຍເລກ MK4 ນາງ ວິສຸດາ ອຸ່ນແກ້ວ ຈາກເມືອງຕົ້ນເຜິ້ງ ສາມາດຄວ້າຕໍາແໜ່ງນາງສາວດອກງິ້ວບານ ປະຈຳປີ 2024 ໄດ້ຮັບມົງກຸດ, ສາຍສະພາຍ, ລາງວັນເງິນສົດ 100 ລ້ານກີບ ພ້ອມລົດຈັກ 1 ຄັນ ແລະ ລາງວັນອື່ນໆ ລວມມູນຄ່າ 200 ກວ່າລ້ານກີບ.
ຮອງອັນດັບ 1 ໄດ້ແກ່ໝາຍເລກ MK20 ນາງ ຈິນລະພອນ ວິໄລວັນ ຈາກເມືອງຕົ້ນເຜິ້ງ ໄດ້ຮັບສາຍສະພາຍ ພ້ອມລາງວັນເງິນສົດ 70 ລ້ານກີບ; ຮອງອັນດັບ 2 ໄດ້ແກ່ໝາຍເລກ MK14 ນາງ ຂວັນຕາ ພົງສະຫວັດ ຈາກເມືອງປາກທາ ໄດ້ຮັບສາຍສະພາຍ ພ້ອມລາງວັນເງິນສົດ 50 ລ້ານກີບ ແລະ ຮອງອັນດັບ 3 ໄດ້ແກ່ໝາຍເລກ MK10 ນາງ ອາລິຍາ ວູ່ປັນໂຍ ຈາກເມືອງຫ້ວຍຊາຍ ໄດ້ຮັບສາຍສະພາຍ ພ້ອມລາງວັນເງິນສົດ 30 ລ້ານກີບ.
ຍັງບໍ່ພໍເທົ່ານັ້ນ ຍັງມີລາງວັນນາງສາວບຸກຄະລິກຂະພາບດີ, ນາງສາວມິດຕະພາບ ແລະ ລາງວັນອື່ນໆ ໄດ້ຮັບລາງວັນເງິນສົດລາງວັນລະ 5 ລ້ານກີບອີກດ້ວຍ ເຊິ່ງງານນີ້ໃຫ້ກຽດມອບລາງວັນໂດຍ ທ່ານ ສົມສະຫວາດ ເລັ່ງສະຫວັດ, ທ່ານ ບົວຄົງ ນາມມະວົງ, ທ່ານ ຈ້າວເຫວີຍ ຕາມລຳດັບ.
