ເອາະຫຼາມເປັນອາຫານພື້ນເມືອງລາວເຮົາ ທີ່ໃຜກໍຮູ້ຈັກ ແລະ ກິນຍາມໃດກໍແຊບຊ້ອຍຍາມນັ້ນ ເຊິ່ງການເອາະຫຼາມ ແມ່ນສາມາດເຮັດໄດ້ທັງຊີ້ນແຫ້ງທຸກຊະນິດ ແລະ ປາແຫ້ງກໍໄດ້ ແຕ່ສ່ວນຫຼາຍຄົນຈະນິຍົມເຮັດຊີ້ນແຫ້ງເພາະຈະແຊບກວ່າ. ດັ່ງນັ້ນມື້ນີ້ເຮົາຈະພາທ່ານມາເຮັດເອາະຫຼາມຊີ້ນງົວແຫ້ງໃສ່ຜັກຊີ.
▶ວັດຖຸດິບ: ຊີ້ນງົວແຫ້ງ (ຕັດຕ່ອນພໍດີຄຳ), ເຂົ້າເບືອ, ເກືອ, ແປ້ງນົວ, ຫົວຫອມບົ່ວ, ຫົວຜັກທຽມ, ຫົວສີໃຄ, ນໍ້າປາ ຫຼື ປາແດກ, ຄະນໍ, ໝາກເຜັດ (ບາງຄົນອາດຈະໃສ່ໝາກເຂືອ ຖ້າໃຜບໍ່ມັກບໍ່ໃສ່ກໍໄດ້). ສ່ວນປະເພດຜັກແມ່ນມີເຫັດຫູໜູ, ໝາກຖົ່ວຝັກຍາວ, ໝາກແຄ້ງຟ້າ, ຍອດໝາກອຶ, ຜັກຕຳນິນ, ຜັກກາດ ຫຼື ຜັກເທົ່າທີ່ມີ, ຫອມບົ່ວ ແລະ ຜັກຊີ (ຖ້າມີສະຂ່ານກໍໃສ່ນຳໄດ້) ສ່ວນປະເພດຜັກ ແລະ ຫອມລ້າງສະອາດ.
▶ວິທີເຮັດ: ຄ້າງໝໍ້ຕົ້ມຊີ້ນງົວ, ໝາກເຜັດດິບ (ຖ້າຈະໃສ່ໝາກເຂືອເລັກໜ້ອຍກໍຜ່າຕົ້ມໃສ່ເລີຍ) ພ້ອມສະຂ່ານ ຖ້າບໍ່ມີບໍ່ໃສ່ກໍໄດ້, ເກືອ, ແປ້ງນົວ, ຫົວສີໃຄທຸບ, ຈາກນັ້ນມາຕຳຫົວຜັກທຽມ ແລະ ຫົວຫອມບົ່ວໃຫ້ລະອຽດ ເມື່ອໝາກເຂືອ ແລະ ໝາກເຜັດສຸກແລ້ວໃຫ້ຕັກອອກມາຕຳໃສ່ກັນໃຫ້ລະອຽດແລ້ວໃສ່ລົງໝໍ້ຄືນ, ພ້ອມເອົາເຫັດຫູໜູ, ໝາກຖົ່ວ ແລະ ໝາກແຄ້ງຟ້າລົງ (ສູດບາງຄົນອາດຈະບໍ່ໃສ່ໝາກເຂືອ ແຕ່ໃສ່ໝາກແຄ້ງຟ້າແລ້ວເອົາອອກມາຕຳເລັກໜ້ອຍ ພໍໃຫ້ໝາກແຄ້ງແຕກ), ຈາກນັ້ນກໍຕຳເຂົ້າເບືອລົງ ເມື່ອທຸກຢ່າງໃກ້ຈະສຸກແລ້ວໃຫ້ເອົາຜັກລົງ
ພ້ອມໃຫ້ປຸງລົດຊາດຕາມໃຈມັກ ເມື່ອທຸກຢ່າງສຸກແລ້ວໃຫ້ຊອຍຫອມບົ່ວ ແລະ ຜັກຊີໃສ່ ເທົ່ານີ້ທ່ານກໍຈະໄດ້ເອາະຫຼາມຊີ້ນງົວໃສ່ຜັກຊີກິນແລ້ວ.