ໃນທີ່ສຸດກໍໄດ້ແລ້ວ ຜູ້ຄອງມົງກຸດນາງສາວເຜົ່າມົ້ງລາວ2024 ເຊິ່ງຈັດການປະກວດໃນຄໍ່າຄືນຂອງວັນທີ10ມັງກອນນີ້ ແລະ ກໍໄດ້ສາວງາມສຸດໜ້າຮັກຜູ້ຄອງມົງກຸດຂອງເວທີດັ່ງກ່າວນັ້ນກໍຄື ນາງ ຊົວຈົວ ທ່າວ Miss Hmong Laos 2024 ມາຈາກ ບ້ານນໍ້າງາດ ເມືອງວັງວຽງ, ແຂວງ ວຽງຈັນ ໝາຍເລກ M10ນັ້ນເອງ ໄດ້ຮັບມົງກຸດເພັດ ພ້ອມສາຍສະພາຍໄປຄອງຢ່າງສົມກຽດ ສົມກັບແຮງເຊຍແຮງໃຈກັນເລີຍ.
ຮອງຊະນະເລີດອັນດັບ1 ໄດ້ແກ່ M08 ນາງ ອີຢາ ວ່າງ ຕົວແທນຈາກແຂວງຊຽງຂວາງ.
ຮອງຊະນະເລີດອັນດັບ2 ໄດ້ແກ່ M17 ນາງ ປາເດີ້ລໍ່ ໂຊ້ຕູ້ກີ ຕົວແທນຈາກແຂວງໄຊສົມບູນ.
ຮອງຊະນະເລີດອັນດັບທີ3 ໝາຍເລກ M13 ນາງ ໄມຊີ ຟາສືວື່ ຕົວແທນຈາກແຂວງວຽງຈັນ.
ຮອງຊະນະເລີດອັນດັບ4 ເປັນຂອງໝາຍເລກ M1 ນາງ ປາເຕັ່ງ ຕົວແທນຈາກແຂວງຫົວພັນ.
ສາມາດໄປຕິດຕາມການອັບເດດຜົນງານ ແລະ ບັນຍາກາດຂອງງານໄດ້ທາງເພຈ Miss Hmong Laos Hmong Laos New Year ແລະເຊີນຮ່ວມທ່ຽວຊົມປະເພນີ້ ກິດຈະກຳຕ່າງໆໄດ້ທີ່ ບຸນນໍ່ເປ່ເຈົ່າ (ບຸນກິນຈຽງ) ຂອງຊົນເຜົ່າມົ້ງລາວ ປະຈຳປີ 2024 ນີ້ ທີ່ ສະໜາມກິລາພື້ນເມືອງ ລາວສຳພັນນາໆຊາດ ບ້ານຊຳເກດ ເມືອງສີໂຄດຕະບອງ ນະຄອນຫຼວງວຽງຈັນ.
ສໍາລັບກິດຈະກຳ ກຽມ ຄວາມພ້ອມພາຍໃນງານ ຈັດງານບຸນກິນຈຽງກໍມີຫຼາກຫຼາຍໃຫ້ໄດ້ຊົມກັນ ບໍ່ວ່າຈະເປັນ ໂຍນໝາກຄອນຂອງໜຸ່ມສາວ, ເຕະບານຊາວໜຸ່ມ, ບູ໊ດວາງສະແດງສິນຄ້າຜະລິດຕະພັນພື້ນເມືອງລາວ, ຍິງໜ້າເກັກ, ໝາກຂ່າງ,ງານຄອນເສີດມືອາຊີບຊົນເຜົ່າມົ້ງ, ການສະແດງກາຍະສິນແຫ່ງຊາດ ແລະ ອີກຫຼາກຫຼາຍກິດຈະກຳ.
ໃນວັນທີ 14ມັງກອນ 2024ແມ່ນພິທີ ປິດງານບຸນກິນຈຽງ ປະຈໍາປີ 2024ນັ້ນເອງ ສະນັ້ນ, ເຊີນຊວນທຸກຄົນໄປຮ່ວມງານກັນເດີ ຮັບຮອງຈະໄດ້ສີສັນ ບັນຍາກາດທີ່ແປກໃໝ່ແນ່ນອນ.
