ໃນວັນທີ 20 ທັນວາ 2023 ຜ່ານມານີ້ໄດ້ເປີດການນຳໃຊ້ເຄື່ອງຜະລິດອົກຊີແຊນທາງການແພດ ເຄື່ອງທີ 3 ແລະ ທີ 4 ທີ່ໂຮງໝໍແຂວງຫຼວງພະບາງ ແລະ ແຂວງອຸດົມໄຊ ໂດຍໄດ້ຮັບການສະໜັບສະໜຸນຈາກອົງການອະນາໄມໂລກ (WHO), ພາຍຫຼັງການນຳໃຊ້ເຄື່ອງທີ 2 ຢູ່ແຂວງສະຫວັນນະເຂດ ໃນເດືອນກັນຍາ 2023 ເຊິ່ງຖືວ່າເປັນບາດກ້າວອັນສໍາຄັນສໍາລັບການຍົກລະດັບຄວາມອາດສາມາດຂອງປະເທດໃນການສະໜອງການບຳບັດດ້ວຍອົກຊີແຊນ.
ໃນຂະນະລົງຢ້ຽມຢາມເບິ່ງເຄື່ອງຜະລິດອົກຊີແຊນ ທີ່ໂຮງໝໍແຂວງຫຼວງພະບາງ, ທ່ານ ດຣ ບຸນແຝງ ພູມມະໄລສິດ, ລັດຖະມົນຕີ ກະຊວງສາທາລະນະສຸກ ໄດ້ກ່າວວ່າ: “ການຊ່ວຍເຫຼືອຂອງອົງການອະນາໄມໂລກໃນການຕິດຕັ້ງ ແລະ ເປີດການນຳໃຊ້ເຄື່ອງຜະລິດອົກຊີແຊນຢູ່ທີ່ໂຮງໝໍແຂວງຫຼວງພະບາງ ແລະ ແຂວງອຸດົມໄຊ ມີຄວາມສຳຄັນຫຼາຍໃນການສ້າງຄວາມເຂັ້ມແຂງໃຫ້ແກ່ພື້ນຖານໂຄງລ່າງສຳລັບການປິ່ນປົວຮັກສາສຸຂະພາບ, ການປັບປຸງຄວາມອາດສາມາດໃນການໂຕ້ຕອບໃນສະຖານະການສຸກເສີນ, ການຍົກລະດັບຄຸນນະພາບໂດຍລວມຂອງການປິ່ນປົວຮັກສາສຸຂະພາບ ຢູ່ໃນ 2 ແຂວງ ແລະ ການຫຼຸດຜ່ອນຄ່າໃຊ້ຈ່າຍສຳລັບການປິ່ນປົວ. ພວກເຮົາຂໍສະແດງຄວາມຂອບໃຈຕໍ່ກັບການຊ່ວຍເຫຼືອຢ່າງຕໍ່ເນື່ອງຈາກອົງການອະນາໄມໂລກ ເພື່ອຊ່ວຍຮັບປະກັນໃຫ້ທຸກຄົນມີສຸຂະພາບທີ່ດີ ໃນ ສປປ ລາວ.”
ເຄື່ອງຜະລິດອົກຊີແຊນດັ່ງກ່າວຈະສະໜອງຄວາມສາມາດຂອງແຂວງໃນການຜະລິດອົກຊີແຊນເປັນຄັ້ງທຳອິດ. ເຄື່ອງຜະລິດອົກຊີແຊນເຫຼົ່ານີ້ ແມ່ນ 2 ໃນ 3 ເຄື່ອງ ທີ່ສະໜອງໂດຍອົງການອະນາໄມໂລກ ເຊິ່ງແມ່ນສ່ວນໜຶ່ງຂອງການຊ່ວຍເຫຼືອ ທີ່ມີມູນຄ່າ 33,5 ຕື້ ກີບ (1,7 ລ້ານ ໂດລາສະຫະລັດ) ເຊິ່ງເຄື່ອງຜະລິດອົກຊີແຊນເຫຼົ່ານີ້ ຈະສາມາດສະໜອງອົກຊີແຊນໄດ້ສູງເຖິງ 75 000 ບັ້ງຕໍ່ປີ ເພື່ອຊ່ວຍເຫຼືອຄົນເຈັບຫຼາຍສິບພັນຄົນ.
ອົກຊີແຊນດັ່ງກ່າວ ຈະສາມາດຊ່ວຍເຫຼືອຄົນເຈັບຫຼາຍພັນຄົນ ແລະ ຊ່ວຍຫຼຸດຜ່ອນຄ່າໃຊ້ຈ່າຍຂອງໂຮງໝໍ. ນອກຈາກນີ້, ຍັງຈະຊ່ວຍທັງຄົນເຈັບທີ່ເຂົ້າຮັບການຜ່າຕັດ, ແມ່ ແລະ ເດັກເກີດໃໝ່, ຄົນເຈັບທີ່ເປັນພະຍາດຫົວໃຈວາຍ, ພະຍາດຫອບຫືດ ຫຼື ອັກເສບປອດ.
