ກອງປະຊຸມສະໄໝສາມັນຂອງ ສະຫະພັນບານເຕະແຫ່ງຊາດລາວ ຈັດຂຶ້ນໃນຕອນເຊົ້າຂອງວັນທີ 10 ທັນວາ 2023 ທີ່ໂຮງແຮມເມືອງແທງ ນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີິກະຊວງສຶກສາທິການ ແລະ ກີລາ, ທ່ານ ສົມສະຫວາດ ເລັ່ງສະຫວັດປະທານກິດຕິມະສັກ ສະຫະພັນບານເຕະແຫ່ງຊາດລາວ ແລະ ຕາງໜ້າ ສະຫະພັນບານເຕະແຕ່ລະແຂວງ, ຄະນະບໍລິການງານ ສຕລ ແລະ ສະໂມສອນໃນເປບຊີ ລາວລີກ ພ້ອມດ້ວຍສື່ມວນຊົນເຂົ້າຮ່ວມຢ່າງພ້ອມພຽງ.
ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ ກ່າວເປີດກອງປະຊຸມວ່າ: ການແຂ່ງຂັນກີລາບານເຕະ ໃນປີ 2023 ມີ 9 ສະໂມສອນທີ່ຊະນະເລີດ ໂດຍສະເພາະແມ່ນ ຊ້າງນ້ອຍ ເອັຟຊີ ຄວ້າແຊັມບານເຕະເປບຊີ ລາວລີກ 1, ສະໂມສອນ ຊ້າງນ້ອຍ ເອັຟຊີ ຄວ້າແຊັມບານເຕະລາວລີກຍິງ, ສະໂມສອນ ເບ ສະຫວັນ ຄວ້າແຊັມຟຸດຊໍລີກ, ຊ້າງນ້ອຍ ເອັຟຊີ ຄວ້າແຊັມບານເຕະຊີງຂັນ ສຕລ ຮຸ່ນອາຍຸບໍເກີນ 15 ປີ ແລະ ສະໂມສອນ ຊ້າງນ້ອຍ ເອັຟຊີ ຄວ້າແຊັມບານເຕະ ຊີງຂັນ ສຕລ ຮຸ່ນອາຍຸບໍ່ເກີນ 18 ປີ. ນອກນັ້ນ, ສູນຝຶກຈໍາປີ-ຈໍາປາ ເປີດແລ້ວ 5 ສູນ: ນະຄອນຫຼວງມີ 2 ສູນ, ຈໍາປາສັກ 1 ສູນ, ຫຼວງນໍ້າທາ 1 ສູນ ແລະ ຫຼວງພະບາງ 1 ສູນ.
ຂະນະດຽວກັນ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີິກະຊວງສຶກສາທິການ ແລະ ກີລາ ກ່າວວ່າ: ຂໍສະແດງຄວາມຍ້ອງຍໍ ແລະ ຕີລາຄາສູງຂອງ ສຕລ ຕະຫຼອດໄລຍະ 1 ປີທີ່ຜ່ານມາ ໂດຍມີການຂຶ້ນແຜນຫຼາຍກິດຈະກໍາ ທີ່ເປັນປະໂຫຍດໃນ ສປປ ລາວ, ລວມທັງໄປແຂ່ງຂັນລາຍການໃນພາກພື້ນ ແລະ ສາກົນບໍ່ວ່າຈະເປັນ ຊີເກມ, ຢູ 17, ຢູ 19 ແລະ ທີມຊາດຊຸດໃຫຍ່, ຈັດການຝຶກອົບຮົມຄູຝຶືກ ໃນການສ້າງຄູຝຶກໃໝ່ ແລະ ຄະນະຈັດການແຂ່ງຂັນ ໃນການພັດທະນາບຸກຄະລະກອນ ລວມເຖິງການເຂົ້າຮ່ວມການເປີດໂຄງການພັດທະນາກີລາບານເຕະໃນໂຮງຮຽນ ເຊິ່ງຈະເປັນການສ້າງນັກເຕະຮຸ່ນສືບທອດທີ່ສໍາຄັນ. ສຸດທ້າຍຂໍຮຽກຮ້ອງໃຫ້ ສຕລ ໄດ້ມີການເອົາໃຈໃສ່ພັດທະນາໃນທຸກໆດ້ານ ເພື່ອໃຫ້ກີລາບານເຕະເປັນກີລາທີ່ຍອດນິຍົມທີ່ສຸດ.
ທ່ານ ສົມສະຫວາດ ເລັ່ງສະຫວັດປະທານກິດຕິມະສັກ ສະຫະພັນບານເຕະແຫ່ງຊາດລາວ ໃຫ້ກຽດກ່າວໂອ້ລົມໃນທີ່ປະຊຸມວ່າ: ກີລາບານເຕະມີການເຄື່ອນໄຫວຢ່າງຫ້າວຫັນ ເຮັດໃຫ້ມີການແຂ່ງຂັນຢ່າງແຜ່ຫຼາຍບໍ່ວ່າຈະເປັນທັງພາຍໃນ ແລະ ຕ່າງປະເທດ ເຊິ່ງກໍມີບຸກຄະລະກອນລາວ ສາມາດຄັດເລືອກໄປຢູ່ໃນຄະນະບໍລິຫານງານຂອງ AFC ແລະ FIFA, ສ່ວນນັກກີລາລາວ ກໍສາມາດກ້າວໄປຫຼິ້ນໃນລີກຕ່າງປະເທດ. ຢ່າງໃດກໍຕາມ, ກໍຂໍຮຽກຮ້ອງໃຫ້ ສຕລ ຕ້ອງເອົາໃຈໃສ່ ແລະ ພະຍາຍາມເຮັດແນວໃດໃຫ້ໄດ້ຮັບນະໂຍບາຍ ລວມເຖິງຍາດແຍ່ງໂອກາດຕ່າງໆຈາກພາກພື້ນ ແລະ ສາມາກ ເພື່ອໃຫ້ນັກກີລາໄດ້ມີເວທີແຂ່ງຂັນ ແລະ ນະໂຍບາຍຕ່າງ, ສ່ວນຂໍ້ສະເໜີຕໍ່ ກະຊວງສຶກສາທິການ ແລະ ກີລາ ກໍຄືລັດຖະບານ ໃຫ້ມີນະໂຍບາຍ ແລະ ສະເໜີໃຫ້ທ້ອງຖິ່ນ ໃຫ້ມີການປະສານງານລະຫວ່າງສະຫະພັນບານເຕະແຂວງ ປະສານສົມທົບກັບ ສະຫະພັນບານເຕະແຫ່ງຊາດລາວ ແລະ ກະຊວງສຶກສາ ໃຫ້ມີການປຶກສາຫາລື ເພື່ອເຮັດໃຫ້ມັນດີຂຶ້ນ ລວມເຖິງຂໍ້ສະເໜີໃຫ້ກັບ ຫົວໜ່ວຍທຸລະກິດຕ່າງ ໃຫ້ອຸປະຖໍ້າ ທີມຊາດລາວ ຊ່ວຍທາງ ສຕລ ເພື່ອໃຫ້ທີມຊາດລາວມີການພັດທະນາໄປເລື້ອຍໆ.
ທ້າຍພິທີກໍຍັງໄດ້ມີການຮັບຮອງເອົາແຜນການເຄື່ອນໄຫວ ປະຈໍາປີ 2024 ເຊິີ່ງມີຫຼາຍລາຍການເປັນຕົ້ນແມ່ນ: ບານເຕະເປບຊີ ລາວລີກ 1, ລາວລີກຍິງ, ບານເຕະຊີງຂັນ ສຕລ, ຟຸດຊໍລີກ ແລະ ອື່ນໆ. ນອກນັ້ນກໍ ຍັງມີແຜນສົ່ງທີມຊາດລາວ ເຂົ້າຮ່ວມຫຼາຍລາຍການ.
ຂ່າວ: Larh Creators
