ໃນວັນທີ 25 ມີຖຸນາ 2023 ທີ່ຜ່ານມານີ້ ຢູ່ທີ່ວັດບ້ານຕາແຫຼວ ເມືອງຈໍາພອນ ແຂວງສະຫວັນນະເຂດ ໄດ້ຈັດພິທີຝຶກອົບຮົມການຍ້ອມແພຝ້າຍສີທຳມະຊາດ, ໂດຍການໃຫ້ກຽດເຂົ້າຮ່ວມຂອງ ທ່ານ ປອ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະ ກິລາແຂວງສະຫວັນນະເຂດ, ທ່ານ ອາຈານ ປົກກະສິນ ຫົວໜ້າແຜນງານໂຄງການວິໄຈ ເກັບກຳຂໍ້ມູນພາກສະໜາມ ມະຫາວິທະຍາໄລລາດສະພັດສະກົນນະຄອນ (ປະເທດໄທ) ພ້ອມດ້ວຍກຸ່ມຫັດຖະກຳຕ່ຳແຜ່ນແພເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ອາຈານ ປົກກະສິນ ຫົວໜ້າແຜນງານ ໂຄງການວິໄຈເກັບກໍາຂໍ້ມູນພາກສະໜາມ ມະຫາວິທະຍາໄລ ລາດສະພັດສະກົນນະຄອນ (ປະເທດໄທ) ໄດ້ແນະນຳວິທີຄົ້ນເຄືອຫູກ, ວິທີສືບ, ວິທີຕ່ຳ, ກວັກຝ້າຍ ແລະ ຍ້ອມສີຈາກໃບ ແລະ ໝາກໄມ້ ເຊິ່ງໃນຄັ້ງນີ້ ໄດ້ກໍານົດເອົາສອງສີຄື: ສີຈາກໝາກຄູນ ແລະ ສີຈາກໃບໝາກເຍົາແດງ, ເຊິ່ງທາງໂຄງການໄດ້ມອບເຄືອຫູກໃຫ້ກຸ່ມຫັດຖະກຳຕ່ຳແຜ່ນແພ ບ້ານຕາແຫຼວ 2 ເຄືອ, ບ້ານດອນແດງ 1 ເຄືອ ພ້ອມທົດລອງຍ້ອມຝ້າຍຕ່ຳ.
ຫຼັງຈາກນັ້ນກໍ່ໄດ້ນຳພາຈັດຕັ້ງປະຕິບັດ ນຳເອົາວັດຖຸດິບທີ່ກຽມໄວ້ເປັນຕົ້ນ ໝາກຄູນ ແລະ ໃບໝາກເຍົາແດງ ມາຕົ້ມແລ້ວກັ່ນຕອງເອົາແຕ່ນ້ຳ ແລະ ໃສ່ສ່ວນປະສົມ ຈາກນັ້ນກໍ່ນຳຝ້າຍມາຍ້ອມສີທີ່ກຳນົດໄວ້. ທັງນີ້ກໍ່ເພື່ອເປັນການອະນຸລັກທາງດ້ານສິ່ງແວດລ້ອມ ຈຶ່ງນຳເອົາສິ່ງທີ່ມີໃນທຳມະຊາດມາໝູນໃຊ້ໃຫ້ເປັນປະໂຫຍດ. ການຝຶກອົບຮົມ ໃນຄັ້ງນີ້ພາຍໃຕ້ກອງທຶນ ສະໜັບສະໜູນພິເສດແມ່ນ້ຳຂອງລ້ານຊ້າງ. ມະຫາວິທະຍາໄລລາດສະພັດສະກົນນະຄອນ(ປະເທດໄທ) ຮ່ວມກັບ ມະຫາວິທະຍາໄລສະຫວັນນະເຂດ ແລະ ພະແນກສຶກສາທິການ ແລະ ກິລາແຂວງສະຫວັນນະເຂດ.
ໂດຍ: ວິທະຍຸກະຈາຍສຽງ ແຂວງສະຫວັນນະເຂດ
