ສຳນັກຂ່າວຕ່າງປະເທດລາຍງານວ່າ: ອົງການບໍລິຫານຄອງປານາມາ ເຊິ່ງເປັນໜຶ່ງໃນເສັ້ນທາງສັນຈອນທາງທະເລ ທີ່ມີເຮືອບັນທຸກສິນຄ້າແລ່ນຜ່ານຫຼາຍທີ່ສຸດອີກແຫ່ງຂອງໂລກ ໄດ້ອອກມາປະກາດວ່າ ຈະຄວບຄຸມເຮືອບັນທຸກຂະໜາດໃຫຍ່ທີ່ແລ່ນຜ່ານຄອງດັ່ງກ່າວຢ່າງເຂັ້ມງວດ ເນື່ອງຈາກລະດັບນ້ຳບົກແຫ້ງລົງຢ່າງໄວວາ ຫຼັງປານາມາ ປະເຊີນກັບໄພແຫ້ງແລ້ງ.
ນັບແຕ່ຕົ້ນປີ 2023 ເປັນຕົ້ນມາ ອົງການບໍລິຫານຄອງດັ່ງກ່າວ ໄດ້ອອກມາດຕະການຫຼາຍຄັ້ງ ເພື່ອກຳນົດຄວາມເລິກຂອງເຮືອທີ່ຈະແລ່ນຜ່ານຄອງດັ່ງກ່າວ ເນື່ອງຈາກບັນຫາໄພແຫ້ງແລ້ງ ຫວັງຊ່ວຍບັນເທົາວິກິດການ ການເດີນເຮືອຜ່ານຄອງປານາມາ.
ທັງນີ້, ຄອງດັ່ງກ່າວມີຄວາມຍາວທັງໝົດປະມານ 80 ກິໂລແມັດ ເຊິ່ງເຊື່ອມຕໍ່ລະຫວ່າງມະຫາສະໝຸດແອັດແລນຕິກ ແລະ ມະຫາສະໝຸດປາຊີຟິກ ເຊິ່ງໃນແຕ່ລະປີ ຈະມີເຮືອບັນທຸກສິນຄ້າ ແລະ ບັນທຸກນ້ຳມັນແລ່ນຜ່ານຄອງດັ່ງກ່າວ ປະມານ 3,5% ຂອງການຄ້າໂລກທັງໝົດ.
ລະບຽບໃໝ່ທີ່ປະກາດອອກມາຄັ້ງຫຼ້າສຸດນີ້ ຈະກຳນົດຄວາມເລິກຂອງເຮືອຂົນສົ່ງສິນຄ້າ ຫຼື neo-Panamax ໄວ້ທີ່ 43,5 ຟຸດ ( ປະມານ 13,3 ແມັດ ) ຈາກເດີມກຳນົດໄວ້ທີ່ 44 ຟຸດ, ນັ້ນກໍໝາຍຄວາມວ່າເຮືອບັນທຸກເຫຼົ່ານີ້ ຈະບັນທຸກສິນຄ້າໜ້ອຍລົງ ຫຼື ຫຼຸດນ້ຳໜັກຂອງເຮືອລົງ ເພື່ອໃຫ້ເຮືອສາມາດລອຍໄດ້ສູງຂຶ້ນ.
ສ່ວນເຮືອ Panamax ເຊິ່ງໃຊ້ຊ່ອງທາງການເດີນເຮືອແບບດັ້ງເດີມຂອງຄອງປານາມານັ້ນ ຈະອອກລະບຽບຄວບຄຸມຢ່າງເຂັ້ມງວດ ນັບແຕ່ວັນທີ 9 ກໍລະກົດເປັນຕົ້ນໄປ ແລະ ນັບແຕ່ວັນທີ 19 ກໍລະກົດ 2023 ເປັນຕົ້ນໄປ ເຮືອທັງສອງປະເພດນີ້ຈະປະເຊີນກັບຂໍ້ຈຳກັດເພີ່ມຂຶ້ນອີກ, ແຕ່ກໍຂຶ້ນຢູ່ກັບປະລິມານນ້ຳຝົນ ວ່າຈະຫຼາຍໜ້ອຍສ່ຳໃດ ທີ່ຈະເຮັດໃຫ້ທະເລສາບທີ່ຕັ້ງຢູ່ຮອບຄອງປານາມາ ເພີ່ມປະລິມານນ້ຳຂຶ້ນ. ທັງນີ້, ປາກົດການແອລ ນີໂຍ ( El Nino ) ເຮັດໃຫ້ປານາມາ ປະເຊີນກັບໄພແຫ້ງແລ້ງຢ່າງຮຸນແຮງທີ່ສຸດໃນຮອບຫຼາຍປີ.