W.I.G NAGA ສະໂມສອນບານເຕະເຍົາວະຊົນລາວ ໃນຮຸ່ນອາຍຸບໍ່ເກີນ 10 ປີສາມາດເອົາຊະນະໃຈກອງເຊຍ ເຖິງວ່າຈະຕົກຮອບໄປ ໂດຍສະເພາະນັດສຸດທ້າຍຮອບແບ່ງກຸ່ມສາມາດສູ້ກັບ MBF ອໍາພາວາ ທີມຊຸດແຊັມລາຍການ 108 ລາຍການແຊັມຊົນແຊັມ 2022 ທັງເປັນຕົວເຕັງແຊ້ມໄດ້ຢ່າງໂດດເດັ່ນ ກ່ອນຈະເສຍໄປ ໃນລາຍການ PAN CCFA FOOTBALL YOUTH CUP 2023 ລະຫວ່າງວັນທີ 11-13 ພຶດສະພາ 2023 ທີ່ສະໜາມ ເອັສເອັສ ອາຣີນາ ແຂວງບູຣີຣໍາ ປະເທດໄທ.
ສໍາລັບ W.I.G NAGA U10 ແມ່ນໃຊ້ນັກເຕະຢູ 8-9 ເລື່ອນຂຶ້ນມາຫຼິ້ນຊຸດນີ້ເປັນສ່ວນໃຫຍ່ ແລະ ຍັງຂາດ 2 ຕົວຫຼັກເນື່ອງຈາກຄາສອບເສັງບໍ່ສາມາດມາຊ່ວຍທີມໄດ້ ໂດຍລາຍການນີ້ ຢູ 10 W.I.G ຖືກຈັດຢູ່ໃນກຸ່ມ F ຮ່ວມກັບ MBF ອຳພາວາ ແຊັມຢູ 10 ລາຍການແຊ້ມຊົນແຊ້ມທີ່ຊຽງຣາຍ ປີ 2022, ລຳປາຍມາສ ອາຄາເດມີ້ ແລະ ເດວິດ ເລີບາສ.
ຜ່ານການແຂ່ງຂັນປາກົດວ່າ: ນັດທໍາອິດເສຍ ຢູ 10 W.I.G NAGA ພາດທ່າເສຍໃຫ້ກັບ ເດວິດ ເລີບາສ ທີມຈາກໄທ 0-1 ທັງທີ່ມີໂອກາດຍິງຫຼາຍກວ່າ ແຕ່ຈົບບໍ່ລົງ, ສ່ວນນັດທີ 2 ຄືນຟອມ ເອົາຊະນະ ລຳປາຍມາສ ອາຄາເດມີ້ ໄປຂາດລອຍ 4-1 ກ່ອນທີ່ນັດສຸດທ້າຍຮອບແບ່ງກຸ່ມຈະໄປຕັດສິນເຂົ້າຮອບກັບ MBF ອຳພາວາ ເຊິ່ງການແຂ່ງຂັນດໍາເນີນໄປຢ່າງດຸເດືອດ ທາມກາງສຽງເຊຍຈາກແຟນບານກາງສະໜາມ ກ່ອນທີ່ໄລຍະທ້າຍເກມ MBF ອຳພາວາ ຈະມາໄດ້ປະຕູໄຊບຽດເອົາຊະນະ ຢູ 10 W.I.G NAGA ໄປຫວຸດຫວິດ 1-0.
ຈາກຜົນດັ່ງກ່າວ ເຮັດໃຫ້ ຢູ 10 W.I.G NAGA ມີ 3 ຄະແນນບໍ່ພຽງພໍຕໍ່ການເຂົ້າຮອບ ເນື່ອງຈາກ MBF ອຳພາວາ ຊະນະ 3 ນັດລວດມີ 9 ຄະແນນ ແລະ ເດວິດ ເລີບາສ ມີ 6 ຄະແນນ ຜ່ານເຂົ້າຮອບໃນຖານະອັນດັບ 1 ແລະ 2 ຂອງສາຍ, ສ່ວນ ລຳປາຍມາສ ອາຄາເດມີ້ ຕົກຮອບໄປເຊັ່ນດຽວກັນ, ສ່ວນຮອບ 16 ທີມຈະໄປແຂ່ງຂັນກັນຕໍ່ໃນວັນທີ 12 ພຶດສະພາ 2023.
ຫຼັງຈົບການແຂ່ງຂັນ ໂຄຊ ເອກ ໜຶ່ງໃນຄູຝຶກຂອງ W.I.G NAGA ຊຸດນີ້ໃຫ້ສໍາພາດວ່າ: ຊົມເຊີຍນັກເຕະເຍົາວະຊົນ W.I.G NAGA ຢູ 10 ທີ່ຊະນະໃນກອງເຊຍ ແລະ ຄູຝຶກເອງ ເນື່ອງຈາກໃຊ້ນັກເຕະອາຍຸ 8-9 ຍັງບໍ່ພໍນັກເຕະຕົວຫຼັກ 2-3 ແມ່ນຄາສອບເສັງບໍ່ສາມາດເດີນທາງມາແຂ່ງຂັນໄດ້ ລວມທັງຍັງພົບກັບ ທີມແຊ້ມລາຍການໃຫຍ່ປີ 2022 ກໍຄືລາຍການ ແຊ້ມຊົນແຊັມ ທີ່ຜ່ານມາ, ແຕ່ກໍສາມາດສູ້ໄດ້ຢ່າງໂດດເດັ່ນ ກ່ອນຈະເສຍໄປຫວຸດຫວິດ. ຢ່າງໃດກໍຕາມ ຂໍໃຫ້ນ້ອງສືບຕໍ່ພັດທະນາຕົວເອງຕໍ່ໄປ.
ຜົນງານກ່ອນໜ້ານີ້ຂອງ W.I.G NAGA ໃນປີ 2023 ເຂົ້າຮ່ວມການແຂ່ງຂັນບານເຕະ 7 ຄົນລາຍການ ໂຂງ-ຊີ-ມູລ ຈູເນ່ຍ ຄັບ 2023 ທີ່ມຸກດາຫານ ປະເທດໄທ ລະຫວ່າງວັນທີ 1-2 ເມສາ 2023 ຜ່ານການແຂ່ງຂັນສາມາດປະຫວັດສາດເຂົ້າຮ່ວມ 4 ຮຸ່ນສາມາດເຂົ້າຮອບຊີງໄດ້ທັງ 4 ຮຸ່ນ ກ່ອນທີ່ຈະຍາດໄດ້ 2 ແຊັມຈາກ ຢູ 9 ແລະ 10 ປີ, ສ່ວນ ຢູ 11 ກັບ ຢູ 12 ແມ່ນມີນັກເຕະເຈັບຫຼາຍ ຈົນຕ້ອງໄດ້ເອົານັກເຕະຈາກຢູ 9 ກັບ 10 ປີຂຶ້ນມາເຕະຊ່ວຍ ກ່ອນເສຍໄປໃນຮອບຊີງຊະນະເລີດໄດ້ອັນດັບ 2 ທັງສອງຮຸ່ນ.
ຂ່າວ-ຮູບ: Larh Creators
