ຂ່າວຈາກວິທະຍຸກະຈາຍສຽງແຂວງສະຫວັນນະເຂດລາຍງານວ່າ ໃນໂອກາດທີ່ ທ່ານ ວັນແສງ ແກ້ວບຸນພັນ ຫົວໜ້າ ພະແນກອຸດສາຫະກໍາ-ການຄ້າແຂວງ ລົງພົບປະກັບສະມາຄົມ ປີ້ງໄກ່ເຊໂນ ເມືອງອຸທຸມພອນ ແຂວງສະຫວັນນະເຂດ ໃນວັນທີ 9 ພຶດສະພາ 2023 ນີ້, ສະມາຄົມດັ່ງກ່າວ ໄດ້ສະເໜີໃຫ້ພະແນກອຸດສາຫະກໍາ-ການຄ້າແຂວງ(ອຄ) ໃຫ້ການຊ່ວຍເຫລືອ ເພື່ອແກ້ໄຂບັນຫາ ກ່ຽວກັບຄ່າເຊົ່າສະຖານທີ່ຂາຍປີ້ງໄກ່ປະຈຸບັນແພງເກີນໄປ ໂດຍລວມຈະຢູ່ປະມານ 3-5 ລ້ານກີບຕໍ່ຫ້ອງຕໍ່ເດືອນ ບໍ່ລວມຄ່ານໍ້າ, ຄ່າໄຟຟ້າ ເຊິ່ງເຫັນວ່າແພງເກີນ.
ທ່ານ ບຸນທະວີ ສີສຸມັງ ຮອງຫົວໜ້າຫ້ອງການ ອຸດສາຫະກໍາ-ການຄ້າ ເມືອງອຸທຸມພອນ ໄດ້ລາຍງານວ່າ: ພາຍຫລັງທີ່ກຸ່ມ ຫລື ສະມາຄົມຜູ້ຜະລິດປີ້ງໄກ່ລາດເຊໂນ ໄດ້ຮັບອະນຸຍາດ ໃຫ້ນໍາໃຊ້ກາໝາຍໂອດັອບຢ່າງເປັນທາງການແລ້ວ, ເຫັນວ່າປີ້ງໄກ່ໄດ້ຮັບຄວາມນິຍົມ ເປັນທີ່ຕ້ອງການຂອງສັງຄົມພາຍໃນ ແລະ ນັກທ່ອງທ່ຽວພາຍນອກຫລາຍຂຶ້ນ. ປັດຈຸບັນ ສະມາຄົມດັ່ງກ່າວ ມີສະມາຊິກທັງໝົດ 52 ຮ້ານ, ມີຍອດຂາຍແຕ່ລະວັນປະມານ 1.200-1.500 ໂຕ.
ໂອກາດນີ້, ທ່ານ ວັນແສງ ແກ້ວບຸນພັນ ກໍໄດ້ຮັບເອົາຄໍາສະເໜີຂອງສະມາຄົມດັ່ງກ່າວ ເພື່ອໄປສະເໜີຕໍ່ຂັ້ນເທິງ ພິຈາລະນາແກ້ໄຂຕາມສະພາບຄວາມເປັນຈິງ. ຄຽງຄູ່ກັນນີ້, ທ່ານຍັງເນັ້ນໃຫ້ບັນດາແມ່ຄ້າ ຫລື ຮ້ານປີ້ງໄກ່ລາດແຕ່ລະຮ້ານ ທີ່ໄດ້ເຄື່ອງໝາຍໂອດັອບ ແລະ ຍັງບໍ່ທັນໄດ້ໂອດັອບ ຕ້ອງໄດ້ມີການພັດທະນາການຫຸ້ມຫໍ່, ຮັກສາສຸຂະອະນາໄມ ແລະ ເພີ່ມຄວາມດຶງດູດຜູ້ບໍລິໂພກ, ສ້າງຄວາມເຊື່ອໝັ້ນໃຫ້ຜູ້ບໍລິໂພກ, ຮັກສາເອກະລັກປີ້ງໄກ່ລາດເຊໂນ ໃຫ້ຍືນຍົງ ເພາະວ່າປີ້ງໄກ່ລາດເຊໂນ ແມ່ນມີຊື່ສຽງ ແລະ ເປັນທີ່ຮູ້ຈັກຂອງຄົນທົ່ວປະເທດ.
ຂ່າວ: ບຸນຊູ ພົມມະເທບ
