ແຂວງຫຼວງພະບາງໄດ້ອະນຸມັດໃຫ້ນັກທຸລະກິດເອກະຊົນເຂົ້າສຳປະທານທີ່ດິນລັດຈຳນວນ 30 ເຮັກຕາກວ່າ ເພື່ອສ້າງຕັ້ງໂຮງງານຜະລິດຫີນອ່ອນໃນແຂວງດັ່ງກ່າວ ນີ້ເປັນໂຄງການທີ່ມີຄວາມໝາຍຄວາມສຳຄັນຫຼາຍຂອງຫຼວງພະບາງ ແລະຫວັງວ່ຈະຊ່ວຍສ້າງວຽກເຮັດງານທຳໃຫ້ປະຊາຊົນທ້ອງຖິ່ນໄດ້ຈຳນວນໜຶ່ງ.
ພິທີເຊັນສັນຍາສຳປະທານທີ່ດິນລັດຄຸ້ມຄອງເພື່ອສ້າງໂຮງງານປຸງແຕ່ງຫີນອ່ອນມາໂບ (Marble) ລະຫວ່າງທ່ານ ຈິນດາວົງ ໂພສີຄຳ ຫົວໜ້າພະແນກແຜນການ ແລະ ການລົງທຶນແຂວງ ແລະ ທ່ານ ເພັດຈະເລີນ ໂມະນີ ຜູ້ອຳນວຍການບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ (IHC) ໄດ້ຈັດຂຶ້ນຫວ່າງບໍ່ດົນມານີ້ ທີ່ຫ້ອງປະຊຸມພະແນກແຜນການ ແລະ ການລົງທຶນ ແຂວງຫຼວງພະບາງ ໂດຍການເຂົ້າຮ່ວມຂອງ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ, ມີບັນດາທ່ານຫົວໜ້າພະແນກການ, ຮອງຫົວໜ້າພະແນກການຂອງແຂວງ ພ້ອມດ້ວຍຜູ້ຕາງໜ້າ ຈາກພາກສ່ວນທີ່ກ່ຽວຂ້ອງເຂົ້າຮ່ວມ.
ໂຮງງານປຸງແຕ່ງຫີນອ່ອນມາໂບ (Marble) ຕັ້ງຢູ່ເຂດບ້ານນູນສະຫວາດ ນະຄອນ-ຫຼວງພະບາງ ແຂວງຫຼວງພະບາງ, ມີເນື້ອທີ່ສຳປະທານ ທັງໝົດ 30,37 ເຮັກຕາ, ສັນຍາມີອາຍຸ 30 ປີ, ເລີ່ມແຕ່ 15ທັນວາ2022 ເຖິງ 15 ທັນວາ 2052 ຈາກນັ້ນ ໂຄງການຈະຕົກເປັນຂອງພາກລັດ, ອາຍຸສັນຍາສາມາດຕໍ່ໄດ້ຕາມກົດໝາຍວ່າດ້ວຍການສົ່ງເສີມການລົງທຶນ ທີ່ມີຜົນບັງຄັບໃຊ້ໃນແຕ່ລະໄລຍະບົນພື້ນຖານເຈລະຈາເນື້ອໃນສັນຍາຄືນໃໝ່.
ໂຄງການດັ່ງກ່າວ ເປັນການລົງທຶນເອກະຊົນພາຍໃນ 100% ໂດຍ ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈໍາກັດຜູ້ດຽວ (IHC), ມູນຄ່າການລົງທຶນທັງໝົດ 3 ລ້ານໂດລາ, ທຶນຈົດທະບຽນ 1 ລ້ານໂດລາ, ໂຮງງານປຸງແຕ່ງຫີນອ່ອນມາໂບ (Marble) ຈະໄດ້ສຸມໃສ່ຜະລິດ ແລະ ແປຮູບແຜ່ນຫີນອ່ອນມາໂບ, ຜະລິດແຜ່ນຫີນອ່ອນທຽມ (ຜະລິດຈາກຫີນອ່ອນມາໂບ), ສາງເກັບມ້ຽນຫີນອ່ອນມາໂບ, ຜະລິດຜົງແຄວຊ່ຽມຄາໂບແນັດ (Calcium Carbonate) ແລະ ສາງເກັບມ້ຽນສະເພາະ, ມີຫ້ອງວາງສະແດງຫີນອ່ອນມາໂບ, ສໍານັກງານ-ຫ້ອງການ, ທີ່ພັກພະນັກງານ ແລະ ຫ້ອງອາຫານ, ເດີ່ນຈອດລົດ, ສະຖານທີ່ຄ່ຽນຖ່າຍສິນຄ້າ, ເດີ່ນສໍາລັບກິດຈະກຳຕ່າງໆ ແລະ ສິ່ງອຳນວຍຄວາມສະດວກອື່ນໆ.
(ຂ່າວ-ພາບ: ຈໍາປາ)