ພຽງມື້ທຳອິດຂອງການຄັດເລືອກເຮືອ ເຂົ້າໄປຊີງໄຊໃນວັນທີ 11 ຕຸລາ ສະໝາມທ່າວັດຈັນ, ເມືອງຈັນທະບູລີ ນະຄອນຫຼວງວຽງຈັນ ເລີ່ມຄຶກຄື້ນມວນຊົນເລີ່ມທະຍ່ອຍຊົມການແຂ່ງຂັນເຮືອຊ່ວງໃນ່ຊ່ວງຕອນບ່າຍ ໂດຍປີນີ້ຜູ້ຊົມສາມາດເຊຍໄດ້ແບບຕິດຂອບສະໝາມຢູ່ໃນໄລຍະໃກ້, ຄາດມື້ອື່ນມ່ວນແນ່ນອນ.
ບັນຍາກາດງານບຸນອອກພັນສາປະວໍລະນາ ແລະ ບຸນຊ່ວງເຮືອ ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ໃນຕອນແລງວັນທີ 10 ຕຸລາ 2022 ເລີ່ມມີພໍ່ແມ່ປະຊາຊົນຊາວນະຄອນຫຼວງວຽງຈັນ, ຕ່າງແຂວງ ແລະ ຊາວຕ່າງປະເທດ ທະຍ່ອຍເຂົ້າມາທ່ຽວຊົມງານ ພ້ອມທັງເບິ່ງການແຂ່ງຂັນຊ່ວງເຮືອ ເຊິ່ງເປັນມື້ທຳອິດໃນການຄັດເລືອກເຮືອ ປະເພດ 12 ສີພາຍ ທີ່ຈະເຂົ້າໄປແຂ່ງຂັນຊີງໄຊ ໃນວັນທີ 11 ຕຸລາ 2022 ພ້ອມກັບເຮືອປະເພດຕ່າງໆ ໂດຍຈະມີການຖ່າຍທອດສົດຜ່ານໂທລະພາບນະຄອນຫຼວງວຽງຈັນ ຫຼື VTE9, ຢ່າລືພໍ່ແມ່ພີ່ນ້ອງຊາວນະຄອນຫຼວງວຽງຈັນ ແລະ ແຂວງໃກ້ຄຽງມາຮ່ວມຊົມ ແລະ ເຊຍຊ່ວງເຮືອທີ່ທ່າໜ້າວັດຈັນ ຫຼື ຊົມຜ່ານໂທລະພາບໄດ້.
ສ່ວນໃນຄ່ຳຄືນຂອງວັນທີ 10 ຕຸລາ 2022 ກົງກັບຂຶ້ນ 15 ຄ່ຳ ເດືອນ 11 ລາວ ເປັນມື້ອອກພັນສາ ພາຍໃນງານຈະມີພິທີໄຫຼເຮືອໄຟ ເຊິ່ງມີເຮືອໄຟໃຫຍ່ຂອງເມືອງຈັນທະບູລີ ພ້ອມດຽວກັນນີ້ ຜູ້ປະກອບການຍັງໄດ້ກະກຽມບ່ອນໄຫຼເຮືອໄຟໃຫ້ກັບມວນຊົນແບບງົດງາມ ເຊິ່ງຈະໄດ້ເກັບຄ່າບໍລິການສຳລັບຜູ້ທີ່ເຂົ້າໄປໄຫຼເຮືອໄຟ.
ຢ່າງໃດກໍຕາມ, ບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນ ເມືອງຈັນທະບູລີ ປີ 2022 ນີ້ ຈະຈັດງານຄົບງັນໄປຈົນຮອດວັນທີ 11 ຕຸລາ 2022.
