ສຳນັກຂ່າວຣອຍເຕີ ລາຍງານວ່າ ບໍລິສັດພະລັງງານຍັກໃຫຍ່ຂອງຣັດເຊຍ ແລະ ຈີນ ໄດ້ບັນລຸຂໍ້ຕົກລົງຮ່ວມກັນ ຊຳລະຄ່າແກັສເປັນສະກຸນເງິນຣຸບ ( ruble ) ຂອງຣັດເຊຍ ແລະ ເງິນຢວນ ( yuan ) ຂອງຈີນ ຫຼັງຈາກ ບໍລິສັດ ແກັສປຣອມ ( GazProm ) ຜູ້ປະກອບການພະລັງງານລາຍໃຫຍ່ທີ່ສຸດຂອງໂລກ ເຊິ່ງເປັນລັດວິສາຫະກິດພະລັງງານ ຂອງຣັດເຊຍ ໄດ້ອອກຖະແຫຼງການ ໃນວັນທີ 6 ກັນຍາ 2022 ກ່ຽວກັບການລົງນາມກັບ ບໍລິສັດ ນ້ຳມັນແຫ່ງຊາດຈີນ ( CNPC ) ເຊິ່ງເປັນລັດວິສາຫະກິດຂອງຈີນ.
ຂະນະທີ່ ບໍລິສັດ ແກັສ ປຣອມ ລົງນາມໃນຂໍ້ຕົກລົງ ມູນຄ່າ 37,5 ຕື້ໂດລາສະຫະລັດ ເພື່ອຂະຫຍາຍໄລຍະເວລາການສົ່ງແກັສໃຫ້ແກ່ຈີນ ຜ່ານທໍ່ Power of Siberia ມີຄວາມຍາວ ປະມານ 3.000 ກິໂລແມັດ ທີ່ແກັສປຣອມ ດຳເນີນການຕັ້ງແຕ່ປີ 2019 ແລະ ຄາດວ່າຈະເລີ່ມສົ່ງແກັສໃນທ້າຍປີນີ້ ເຊິ່ງຈະຊ່ວຍເພີ່ມປະລິມານການສົ່ງແກັສ ໃຫ້ແກ່ ຈີນໃນປີ 2023.