ຄວາມຈະເລີນຈະບໍ່ເກີດຖ້າເຮົາບໍ່ສາມັກຄີພ້ອມພຽງກັນ, ນະຄອນໄກສອນຖືວ່າມີການພັດທະນາຢ່າງຕໍ່ເນື່ອງ ໂດຍສະເພາະພື້ນຖານໂຄງລ່າງ ຖ້າໃຜໄດ້ໄປແລ້ວດົນໆກັບໄປອີກກໍ່ຈະເຫັນໄດ້ວ່າມີການປ່ຽນແປງໄປຈາກແຕ່ກ່ອນ ເນື່ອງຈາກຫຼາຍພາກສ່ວນມີຄວາມເອົາໃຈໃສ່ ເຮັດແທ້ທຳຈິງ ແລະ ຫຼ້າສຸດ ທາງເຂົ້າຮ່ວມບ້ານກໍ່ລົງມືສ້າງແບບເທເບຕົງທີ່ທົນທານໃຊ້ການໄດ້ຍາວນານ.
ໃນຕອນບ່າຍຂອງວັນທີ 6 ເມສາ 2022, ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນ ພົມວິຫານ, ທ່ານ ຄຳສີເພັດ ໄຊຍະວົງ ຫົວໜ້າຫ້ອງການອຸດສາຫະກຳແລະການຄ້ານະຄອນ ໄກສອນພົມວິຫານ, ທັງເປັນຜູ້ຊີ້ນໍາກຸ່ມບ້ານພັດທະນາທີ03,ທ່ານ ນາງ ສຸພາວະດີ ສີແສງລັດ ນາຍບ້ານຫົວເມືອງໃຕ້ ພ້ອມດ້ວຍພະນັກງານວິຊາການບໍລິສັດສະຫວັນຄຳ ກໍ່ສ້າງ-ຂົວທາງ ໄດ້ພ້ອມກັນລົງຕິດຕາມຊຸກຍູ້ການກໍ່ສ້າງ ເສັ້ນທາງປູເບຕົງເສີມເຫຼັກຮ່ອມ ຢູ່ບ້ານຫົວເມືອງໃຕ້ ນະຄອນໄກສອນ ພົມວິຫານ ແຂວງສະຫວັນນະເຂດ ໂດຍ ສະເພາະກໍ່ແມ່ນເສັ້ນທາງປູເບຕົງ ແລະ ບັນດາເສັ້ນທາງຮ່ອມບ້ານ,.
ເສັ້ນທາງປູເບຕົງ ຮ່ອມ 8/2 ເປັນທາງຮ່ອມຂອງບ້ານ ມີຄວາມຍາວ 396 ແມັດ ,ໜ້າທາງກວ້າງ 5 ແມັດ ແລະ ໜາ 15 ຊັງຕີແມັດ ເຊິ່ງເລີ່ມລົງມືກໍ່ສ້າງມາແຕ່ວັນທີ 19 ມີນາ 2022, ເນື່ອງຈາກເມື່ອກ່ອນ ການສັນຈອນໄປມາແມ່ນຫຍຸ້ງຍາກ, ເສັ້ນທາງເປ່ເພຢ່າງໜັກໜ່ວງ, ເມື່ອເຫັນສະພາບແນວນັ້ນ ຫຼາຍພາກສ່ວນໄດ້ມີການປຶກສາຫາລືກັນສ້າງເສັ້ນທາງໃຫ້ໄດ້ມາດຕະຖານກວ່າເກົ່າ ແຕ່ອີງໃສ່ງົບປະມານ ບໍ່ພຽງພໍ ຈຶ່ງໄດ້ປຸກລະດົມຂົນຂວາຍ,ເກັບເງິນນຳຄອບຄົວຜູ້ທີ່ມີພາຫະນະເປັນປະເພດລົດໃຫຍ່, ລົດກະບະ, ລະດົມປະກອບສ່ວນພາກ ທຸລະກິດແລະ ຈັດງານບຸນປະເພນີແລະອື່ນໆເຊີ່ງມູນຄ່າໃນການກໍ່ສ້າງເສັ້ນທາງປູເບຕົງທັງໝົດ 400ລ້ານກີບ.
ໃນໂອກາດທີ່ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນ ພົມວິຫານ ໄດ້ລົງມາຕິດຕາມເບິ່ງການ ກໍ່ສ້າງເສັ້ນທາງປູເບຕົງແລະບັນ ດາເສັ້ນທາງຮ່ອມກໍ່ໄດ້ມີການ ຍ້ອງຍໍຊົມເຊີຍທຸກພາກສ່ວນທີ່ມີ ຄວາມຕັດສິນໃຈສູງມີຄວາມສາ ມັກຄີໜັກແໜ້ນ ໃນການພັດທະນາ ພ້ອມເນັ້ນໃຫ້ອຳນາດການປົກ ຄອງທຸກຂັ້ນຕ້ອງໄດ້ເອົາໃຈໃສ່ ຕໍ່ການນຳພາຂອງພັກ-ລັດ ແລະອັນສຳຄັນສຸດໃຫ້ຮັກສາຄວາມສາມັກຄີໃຫ້ແໜ້ນແຟ້ນ.
ຈາກ: ວິທະຍຸກະຈາຍສຽງ ແຂວງ ສະຫວັນນະເຂດ
