ສປປ ລາວ ກໍານົດສົ່ງ 30 ປະເພດກີລາ ໃນນັ້ນ 18 ກີລາໃຊ້ງົບປະມານຂອງລົດຮອບດ້ານ ກຽມເຂົ້າຮ່ວມການແຂ່ງຂັນກີລາໃນງານມະຫະກໍາກີລາຊີເກມ ຄັ້ງທີ 31 ທີ່ ສສ ຫວຽດນາມ ທີ່ກໍານົດຈົດແຂ່ງຂັນຂຶ້ນໃນເດືອນພຶດສະພາ 2022.
ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ, ກະຊວງສຶກສາທິການ ແລະ ກີລາ ລາຍງານໃນກອງປະຊຸມສາມັນ ຄະນະກຳມະການໂອແລມປິກແຫ່ງຊາດລາວ (ຄອລ) ປະຈໍາປີ 2021 ເມື່ອທ້າຍອາທິດ ທີ່ຜ່ານມາວ່າ: ດັ່ງທີ່ຮູ້ ງານມະຫະກໍາກີລາ ຊີເກມ ຄັ້ງທີ 31 ທີ່ ສສ ຫວຽດນາມ ແມ່ນຈະຈັດຂຶ້ນໃນປີ 2021 ແຕ່ໄດ້ຮັບຜົນກະທົບຈາກການລະບາດຂອງ ໂຄວິດ-19 ເຮັດໃຫ້ຕ້ອງເລື່ອນການແຂ່ງຂັນ ແລະ ໄດ້ມີກອງປະຊຸມໃນຕົ້ນເດືອນທັນວາ 2021 ໄດ້ຕົກລົງກໍານົດວັນເວລາແຂ່ງຂັນອອກມາຢ່າງເປັນທາງການແລ້ວ ໂດຍຈະແຂ່ງຂັນລະຫວ່າງວັນທີ 12-23 ພຶດສະພາ 2022 ທີ່ນະຄອນຫຼວງຮາໂນ້ຍ ແລະ ບັນດາແຂວງອ້ອມຂ້າງ.
“ ອີງຕາມການການຕົກລົງ ແລະ ຄັດເລືອກເອົາກີລາເປົ້າໝາຍ ສປປ ລາວ ແມ່ນສາມາດກໍານົດ 30 ປະເພດກີລາເປົ້າໝາຍ ເພື່ອເຂົ້າຮ່ວມຊີເກມຄັ້ງທີ 31 ໂດຍອີງໃສ່ສະພາບຕົວຈິງ ແລະ ຜົນງານທີ່ຜ່ານມາ ຈິ່ງແບ່ງຄວາມຮັບຜິດຊອບດັງນີ້:
– 18 ປະເພດກີລາທີ່ມີຄວາມຫວັງ ແລະ ມີຜົນງານທີ່ໂດດເດັ່ນເຄີຍໄດ້ຫຼຽນໃນໄລຍະທີ່ຜ່ານມາ ເປັນກີລາທີ່ນໍາໃຊ້ງົບປະມານຂອງລັດຮອບດ້ານປະກອບດ້ວຍ (ເບິ່ງລາຍລະອຽດຂອງບົດລາຍງານເພີ່ມຕື່ມໄດ້ທີ່ວີດີໂອລຸ່ມນີ້)
-ສ່ວນອີກ 12 ປະເພດກີລາ ແມ່ນໃຊ້ງົບຈາກການຂົນຂວາຍຈາກ ສະຫະພັນກີລາຕ່າງໆ ແລະ ພາກສ່ວນອື່ນໆ ປະກອບມີ (ເບິ່ງລາຍລະອຽດ 30 ປະເພດກີລາມີກີລາໃດແດ່ໃນບົດລາຍງານເພີ່ມຕື່ມໄດ້ທີ່ວີດີໂອລຸ່ມນີ້)
ສໍາລັບຜົນງານຫຼ້າສຸດໃນຊີເກມຂອງ ສປປ ລາວ ສົ່ງ 25 ປະເພດກີລາເຂົ້າຮ່ວມຊີເກມຄັ້ງທີ 30 ທີ່ປະເທດຟິລິບປິນ ເມື່ອປີ 2019 ສາມາດຍາດໄດ້ 1 ຫຼຽນຄໍາ, 5 ຫຼຽນເງິນ ແລະ 29 ຫຼຽນທອງ ຈັດຢູ່ອັນດັບທີ 10 ຂອງຕາຕະລາງສະຫຼຸບຫຼຽນຈາກ 11 ປະເທດເຂົ້າຮ່ວມ ໂດຍອັນດັບທີ 11 ຕີມໍ ເລັສເຕ ມີ 1 ຫຼຽນເງິນ ແລະ 5 ຫຼຽນທອງ, ສ່ວນ ເຈົ້າຄອງຫຼຽນຄໍາເປັນຂອງເຈົ້າພາບ ຟິລິບປິນ ຍາດໄດ້ 149 ຫຼຽນຄໍາ, 117 ຫຼຽນເງິນ ແລະ 121 ຫຼຽນທອງ.