ສຳນັກຂ່າວຕ່າງປະເທດລາຍງານໃນວັນທີ 16 ຕຸລາ 2021 ວ່າ ກອງທຶນຄວາມມັ່ງຄັ່ງແຫ່ງຊາດຊາອຸດິອາຣາເບຍ (PIF) ໄດ້ປະກາດເປີດຕົວໂຄງການ “ ເດິ ຣິກ” (THE RIG) ເຊິ່ງເປັນໂຄງການກໍ່ສ້າງສູນທ່ອງທ່ຽວລອຍນ້ຳຂະໜາດໃຫຍ່ຢູ່ກາງທະເລ ແຫ່ງທຳອິດຂອງໂລກ ໂດຍໄດ້ແຮງບັນດານໃຈຈາກແທ່ງຂຸດເຈາະນ້ຳມັນກາງທະເລ.
PIF ເປັນກົນໄກຫຼັກໃນການຂັບເຄື່ອນແຜນປ່ຽນແປງນະໂຍບາຍເສດຖະກິດໃໝ່ຂອງປະເທດ ຂອງເຈົ້າຊາຍ ໂມຮາມັດ ບິນ ຊັລມານ ມະກຸດຣາຊະກຸມມານແຫ່ງຣາຊະວົງຊາອຸດິອາຣາເບຍ ໂດຍມີເງິນບໍລິຫານຈັດການໃນກອງທຶນປະມານ 400 ຕື້ໂດລາສະຫະລັດ.
ຖະແຫຼງການຂອງ PIF ລະບຸວ່າ: ໂຄງການ ເດິ ຣິກ ຕັ້ງຢູ່ໃນທະເລອ່າວເປີເຊຍ ທາງທິດຕາເວັນອອກຂອງປະເທດກວມເອົາເນື້ອທີ່ 150.000 ຕາແມັດ ໂດຍໂຄງການດັ່ງກ່າວຈະມີສິ່ງດຶງດູດນັກທ່ອງທ່ຽວຫຼາກຫຼາຍຢ່າງ, ພ້ອມມີໂຮງແຮມຫຼູຫຼາ 3 ແຫ່ງ, ພັດຕະຄານ, ຮ້ານອາຫານ, ລານຈອດເຮລີຄ໊ອບເຕີ ແລະ ກິດຈະກຳພະຈົນໄພຕ່າງໆ ລວມທັງກິລາ ເອັກຊ໌ຕຣີມ. ແນວໃດກໍຕາມ PIF ບໍ່ໄດ້ເປີດເຜີຍມູນຄ່າການລົງທຶນຂອງໂຄງການດັ່ງກ່າວນີ້.