ສຳນັກຂ່າວຕ່າງປະເທດລາຍງານໃນວັນທີ 12 ຕຸລາ 2021 ວ່າ ບໍລິສັດໂຕໂຍຕ້າ ມໍເຕີ ເປີດເຜີຍວ່າ ຍອດຂາຍລົດໂຕໂຍຕ້າໃນຈີນໄດ້ຫຼຸດລົງເຖິງ 39,5% ໃນເດືອນກັນຍາ ມາຢູ່ທີ່ 115.000 ຄັນ, ຫຼັງຈາກທີ່ຫຼຸດລົງ 11,9% ໃນເດືອນສິງຫາ ສ່ວນສາເຫດຫຼັກ ຍ້ອນຂາດແຄນເຊມີຄອນດັກເຕີ (ຊິບ) ເຊິ່ງເປັນສ່ວນປະກອບສຳຄັນໃນການຜະລິດອາໄຫຼ່ລົດ ລວມທັງເຄື່ອງເອເລັກໂຕຣນິກອື່ນໆ.
ນັກວິເຄາະຄາດການວ່າ ຜູ້ຜະລິດລົດລາຍໃຫຍ່ຂອງຍີ່ປຸ່ນທີ່ດຳເນີນທຸລະກິດໃນຈີນ ມີທ່າອ່ຽງທີ່ຈະປະສົບບັນຫາການຂາດແຄນເຊມີຄອນດັກເຕີ ຢ່າງຮຸນແຮງ ເນື່ອງຈາກການແຜ່ລະບາດຂອງພະຍາດໂຄວິດ-19 ຢ່າງຮຸນແຮງໃນພູມີພາກອາຊີຕາເວັນອອກສຽງໃຕ້ໃນຂະນະນີ້.
ສ່ວນບໍລິສັດຮອນດາ ມໍເຕີ ເປີດເຜີຍວ່າ: ຍອດຂາຍລົດໃໝ່ໃນຈີນຫຼຸດລົງ 28,1% ໃນເດືອນກັນຍາຢູ່ທີ່ລະດັບ 212.448 ຄັນ. ຂະນະທີ່ ບໍລິສັດນິສສັນ ມໍເຕີ ຫຼຸດລົງ 26,2% ຢູ່ທີ່ 104.433 ຄັນ ແລະ ຄາດວ່າ ບໍລິສັດຍັງຈະສືບຕໍ່ປະສົບບັນຫາການຂາດແຄນເຊມີຄອນດັກເຕີຕໍ່ໄປຢ່າງໜ້ອຍຈົນໝົດປີນີ້.
