ສຳນັກຂ່າວຣອຍເຕີລາຍງານໃນວັນທີ 29 ກັນຍາ 2021 ວ່າ ຊາວມຽນມາ ຕ້ອງປະເຊີນກັບສະພາວະເງິນເຟີ້ ເມື່ອຄ່າຂອງສະກຸນເງິນຈາດອ່ອນຄ່າລົງກວ່າ 60% ແລ້ວ ນັບແຕ່ຕົ້ນເດືອນກັນຍາເປັນຕົ້ນມາ ສົ່ງຜົນໃຫ້ປະຊາຊົນຊາວມຽນມາເດືອດຮ້ອນກັນຖ້ວນໜ້າ ເພາະລາຄາອາຫານ, ນ້ຳມັນເຊື້ອໄຟ ແລະ ເຄື່ອງອຸປະໂພກ ບໍລິໂພກສູງຂຶ້ນ.
ເມື່ອເດືອນສິງຫາຜ່ານມາ ທະນາຄານກາງຂອງມຽນມາ ພະຍາຍາມຄວບຄຸມບໍ່ໃຫ້ເງິນຈາດອ່ອນຄ່າລົງ ແຕ່ກໍຕ້ອງຍົກເລີກເມື່ອວັນທີ 10 ກັນຍາ ເນື່ອງຈາກແຮງກົດດັນຈາກອັດຕາແລກປ່ຽນເພີ່ມຂຶ້ນ ໂດຍຈາກສະຖານະການຄ່າຂອງສະກຸນເງິນຈາດທີ່ບໍ່ມີສະຖຽນລະພາບຢ່າງຮຸນແຮງ ເຮັດໃຫ້ສະຖາບັນຮັບແລກປ່ຽນເງິນຕາ (Northern Breeze Exchange) ໄດ້ສັ່ງປິດສາຂາຊົ່ວຄາວທັງໝົດໃນມຽນມາແລ້ວ.
ສຳລັບອັດຕາແລກປ່ຽນລະຫວ່າງເງິນຈາດກັບເງິນໂດລາ ເມື່ອວັນທີ 28 ກັນຍາ 2021 ຢູ່ທີ່ 2.700 ຈາດ ຕໍ່ 1 ໂດລາສະຫະລັດ ເມື່ອທຽບກັບວັນທີ 1 ກັນຍາ 2021 ອັດຕາແລກປ່ຽນຢູ່ທີ່ 1.695 ຈາດຕໍ່ 1 ໂດລາ ແລະ ກ່ອນເກີດການຢຶດອຳນາດຂອງກອງທັບເມື່ອວັນທີ 1 ກຸມພາ 2021 ອັດຕາແລກປ່ຽນຢູ່ທີ່ 1.395 ຈາດຕໍ່ 1 ໂດລາ.
ທັງນີ້ ເມື່ອບໍ່ດົນມານີ້ ທະນາຄານໂລກໄດ້ຄາດການເສດຖະກິດມຽນມາວ່າ ຈະຕິດລົບເຖິງ 18% ໃນປີນີ້ ເນື່ອງຈາກສະຖານະການການແຜ່ລະບາດຂອງພະຍາດໂຄວິດ-19 ບວກກັບຄວາມບໍ່ສະຫງົບທາງການເມືອງໃນມຽນມາ.
