ສຳນັກຂ່າວຕ່າງປະເທດລາຍງານວ່າ: ທ່ານ ດຣ. ທີໂດຣສ ກິບຣີເຢຊູສ ຜູ້ອຳນວຍການອົງການອະນາໄມໂລກ ( WHO ) ໄດ້ຮຽກຮ້ອງໃຫ້ບັນດາປະເທດຢຸດຕິການສັກວັກແຊັງປ້ອງກັນໂຄວິດ – 19 ເຂັມທີ 3 ຊົ່ວຄາວ ເພື່ອນຳວັກແຊັງເຫຼົ່ານັ້ນໄປແຈກຢາຍໃຫ້ປະເທດທີ່ໄດ້ຮັບວັກແຊັງໜ້ອຍ.
ຜູ້ອຳນວຍການ WHO ກ່າວວ່າ: ປະເທດລ້ຳລວຍ ມີວັກແຊັງຫຼາຍ, ກະຈາຍວັກແຊັງໂດຍສະເລ່ຍ 100 ໂດສຕໍ່ປະຊາກອນ 100 ຄົນ, ໃນຂະນະທີ່ປະເທດທີ່ມີລາຍໄດ້ຕ່ຳ ບໍ່ສາມາດເຂົ້າເຖິງວັກແຊັງໄດ້ ໂດຍສະເລ່ຍການເຂົ້າເຖິງວັກແຊັງພຽງແຕ່ 1,5 ໂດສ ຕໍ່ປະຊາກອນ 100 ຄົນເທົ່ານັ້ນ.
ທ່ານກ່າວອີກວ່າ: ຈະບໍ່ມີໃຜປອດໄພ ຖ້າທຸກຄົນໃນໂລກນີ້ບໍ່ປອດໄພ ເພາະຖ້າຫາກໂຄວິດ – 19 ແຜ່ລະບາດນານເທົ່າໃດ ແລະ ເປັນວົງ ກວ້າງເທົ່າໃດ ຍິ່ງເພີ່ມໂອກາດການກາຍພັນຂອງເຊື້ອໄວຣັສສູງເທົ່ານັ້ນ ແລະ ຍິ່ງເຮັດໃຫ້ວິກິດການຍາວນານອອກໄປອີກ.
ທ່ານກ່າວອີກວ່າ: ຂໍຮຽກຮ້ອງໃຫ້ຢຸດຕິສັກວັກແຊັງເຂັມທີ 3 ໄວ້ກ່ອນ ຈົນກວ່າຈະເຖິງທ້າຍເດືອນກັນຍານີ້ ເພື່ອເຮັດໃຫ້ເປົ້າໝາຍທີ່ຕັ້ງໄວ້ ຈະສັກວັກແຊັງໃຫ້ແກ່ປະຊາກອນທົ່ວໂລກ ຢ່າງໜ້ອຍ 10% ຂອງປະຊາກອນທຸກປະເທດ.
