ໃນວັນທີ 17 ກໍລະກົດ 2021 ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມ ຄວບຄຸມພະຍາດຕິດຕໍ່ ກະຊວງສາທາລະນະສຸກ, ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ທີ່ກະຊວງສາທາລະນະສຸກ.
ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມ ຄວບຄຸມພະຍາດຕິດຕໍ່ ກ່າວວ່າ: ມາຮອດປະຈຸບັນຕົວເລກສະສົມຜູ້ຕິດເຊື້ອໃນ ສປປ ລາວ ມີທັງໝົດ 3.295 ຄົນ, ມີຕົວເລກສະສົມຜູ້ເສຍຊີວິດ 4 ຄົນ, ຍັງມີຜູ້ນອນປິ່ນປົວ 1.009 ຄົນ, ທົ່ວປະເທດມີສູນຈໍາກັດບໍລິເວນທີ່ເປີດນໍາໃຊ້ຢູ່ທັງໝົດ 48 ສູນ, ມີຜູ້ຈໍາກັດບໍລິເວນທັງໝົດ 6.152 ຄົນ. ພ້ອມນີ້ມີຜູ້ເດີນທາງເຂົ້າລາວ ວັນທີ 16 ກໍລະກົດ ຈຳນວນ 2.673 ຄົນ.
ໃນວັນທີ 16 ກໍລະກົດ ໄດ້ເກັບຕົວຢ່າງໄປກວດວິເຄາະຫາເຊື້ອທັງໝົດ 1.513 ກໍລະນີ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 108 ຄົນ, ໃນນັ້ນ ຈຳປາສັກ 45 ຄົນ, ສະຫວັນນະເຂດ 43 ຄົນ, ສາລະວັນ 13 ຄົນ, ນະຄອນຫຼວງວຽງຈັນ 5 ຄົນ, ບໍລິຄຳໄຊ 1 ຄົນ ແລະ ຄຳມ່ວນ 1 ຄົນ.
ໃນນັ້ນ ກໍລະນີນຳເຂົ້າມີ 104 ຄົນ ເປັນການນຳເຂົ້າຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ໂດຍຖືກຕ້ອງຕາມກົດໝາຍ, ສ່ວນການຕິດເຊື້ອໃນຊຸມຊົນມີ 4 ຄົນ ຈາກ ຢູ່ແຂວງຈຳປາສັກ ເຊິ່ງເປັນພະນັກງານປະຈຳດ່ານ 3 ຄົນ ທີ່ມີປະຫວັດສຳຜັດໃກ້ຊິດ ນຳຜູ້ຕິດເຊື້ອເກົ່າ ແລະ ອີກ 1 ຄົນ ແມ່ນເປັນແຮງງານນຳເຂົ້າ.
