ເພື່ອປະຕິບັດຕາມເນື້ອໃນຈິດໃຈບົດບັນທຶກ ຂອງຄະນະການນໍາແຂວງຜົ້ງສາລີ ເເຫ່ງ ສປປ ລາວ ກັບ ຄະນະການນໍານະຄອນຜູ່ເອີ ແຂວງຢຸນນານ ແຫ່ງ ສປປ ຈີນ ຄັ້ງທີ 6, ທັງເປັນການເພີ່ມທະວີການຮ່ວມມືກັນໃນການປ້ອງກັນ ການແຜ່ລະບາດຂອງຕັກແຕນຝູງໄມ້ປ່ອງ ລະຫວ່າງ ແຂວງຜົ້ງສາລີ ກັບ ນະຄອນຜູ້ເອີ ແລະ ເພື່ອຮັບປະກັນຄວາມປອດໄພ ຂອງລະບົບນິເວດ, ປ່າໄມ້ ແລະ ທົ່ງຫຍ້າ ຂອງສອງຝ່າຍໃຫ້ມີຄວາມສົມບູນນັ້ນ, ໃນວັນທີ 1 ມີນາ 2021 ຢູ່ທີຊາຍລາວ – ຈີນ ຫຼັກໝາຍທີ 7 ໄດ້ຈັດໃຫ້ມີ ກອງປະຊຸມພົບປະແລກປ່ຽນດ້ານວິຊາການຮ່ວມກັນປ້ອງກັນ ສະກັດກັ້ນການແຜ່ລະບາດຂອງຕັກແຕນຝູງໄມ້ປ່ອງ ແລະ ການປ້ອງການພະຍາດສັດລ້ຽງ ທີ່ຈະເກີດຂື້ນຕາມລະດູການ ລະຫ່ວາງແຂວງຜົ້ງສາລີ ເເຫ່ງ ສປປ ລາວ ກັບ ນະຄອນຜູ່ເອີ ແຂວງຢຸນນານ ແຫ່ງ ສປປ ຈີນ ຂື້ນ ເຊີ່ງຝ່າຍແຂວງຜົ້ງສາລີ ນຳໂດຍທ່ານ ຄຳເພັດ ຈິດປັນຍາ ຫົວໜ້າພະແນກການຕ່າງປະເທດແຂວງຜົ້ງສາລີພ້ອມດ້ວຍຄະນະ, ຝ່າຍຈີນນຳໂດຍ ທ່ານ ວາງ ໂປ ຮອງຫົວໜ້າຫ້ອງການພົວພັນຕ່າງປະເທດນະຄອນຜູ່ເອີແຫ່ງ ສ ປ ຈີນ ພ້ອມດ້ວຍຄະນະ.
ໃນກອງປະຊຸມພົບປະຄັ້ງນີ້ທັງສອງຝ່າຍແມ່ນໄດ້ລາຍງານກ່ຽວກັບການຈັດຕັ້ງປະຕິບັດວຽກງານການປ້ອງກັນກັ້ນລະບາດຂອງຕັກແຕນຝູງໄມ້ປ່ອງ ໃນໄລຍະຜ່ານມາໃຫ້ການຊາບ. ສຳລັບຢູ່ແຂວງຜົ້ງສາລີ ແມ່ນໄດ້ເລີ່ມລະບາດມາແຕ່ປີ 2015 ເກີດຢູ່ບ້ານກຸງຍາງ, ເມືອງໃໝ່ ລຽບຕາມຊາຍແດນ ລາວ – ຫວຽດນາມ ມາຮອດປະຈຸບັນທົ່ວແຂວງ ມີການລະບາດ ຢູ່ໃນ 115 ບ້ານ, ພົບຈຸດວາງໄຂ່ 181 ຈຸດ , ມີເນື້ອທີ 1.733 ເຮັກຕາ, ໃນນັ້ນພົບຜົນເສຍຫາຍ 89 ບ້ານ, 2.241 ຄອບຄົວ, ເນື້ອທີ່ຜົນລະປູກເສຍຫາຍ 800 ກວ່າ ເຮັກຕາ, ລວມມູນຄ່າ 6 ຕື້ກວ່າກີບ.
ພ້ອມກັນນັ້ນທັງສອງຝ່າຍຍັງໄດ້ເອກະພາບ ທິດທາງແຜນການຮ່ວມມືກັນໃນຕໍ່ຫນ້າເປັນຕົ້ນແມ່ນ: ສອງຝ່າຍເຫັນດີສ້າງກົນໄກປະສານງານເພື່ອປ້ອງກັນ ແລະ ທໍາລາຍການແຜ່ລະບາດຂອງຕັກເເຕນຝູງໄມ້ປ່ອງ ແລະ ສັດຕູພືດອື່ນໆທີ່ທໍາລາຍພືດພັນ, ປ່າໄມ້ຢ່າງຫນັກ, ໂດຍການລາຍງານສະພາບ, ຂໍ້ມູນຂ່າວສານໃຫ້ກັນ ແລະ ກັນຊາບໃນແຕ່ລະໄລຍະຢ່າງທັນການ, ສອງຝ່າຍຕ້ອງຮ່ວມມືກັນສໍາຫຼວດລາຍລະອຽດ ແລະ ປ້ອງກັນປາບປາມໃນຂົງເຂດເເຜ່ລະບາດຂອງຕັກແຕນຝູງໄມ້ປ່ອງ ແລະ ສັດຕູພືດອື່ນໆທີ່ທໍາລາຍພືດພັນ, ປ່າໄມ້ຢ່າງຫນັກ,ຈັດຝຶກອົບຮົມ ແລະ ແລກປ່ຽນບົດຮຽນດ້ານເຕັກນິກໃນການທໍາລາຍທີ່ໄດ້ຮັບປະສິດຕິຜົນດີ.
ສອງຝ່າຍຕ້ອງເອົາໃຈໃສ່ໃນການປ້ອງກັນ ແລະ ທໍາລາຍ ໃນໄລຍະແຕ່ ເດືອນມີນາ-ພຶດສະພາ ຊຶ່ງເປັນໄລຍະທີ່ຕັກແຕນຝູງໄມ້ປ່ອງກໍາລັງແຜ່ພັນ, ເພື່ອບໍ່ໃຫ້ແຜ່ລາມເປັນວົງກວ້າງ, ສອງຝ່າຍຮ່ວມມືກັນສ້າງກົນໄກຊ່ວຍເຫຼືອເຊິ່ງກັນແລະກັນ, ພ້ອມກັນກໍາຈັດ ແລະ ທໍາລາຍສັດຕູພືດ ທີ່, ທໍາລາຍປ່າໄມ້, ທົ່ງຫຍ້າໃຫ້ໄດ້ປະສິດຕິຜົນດີ, ຝ່າຍ ຈີນ ເຫັນດີຊ່ວຍເຫຼືອທຶນ ແລະ ວັດຖຸ, ເພື່ອຮັບປະກັນ ຄວາມປອດໄພລະບົບນິເວດ ຂອງພືດພັນ ແລະ ປ່າໄມ້, ສອງຝ່າຍເຫັນດີ ສ້າງຕັ້ງຜູ້ປະສານງານທັງສອງຝ່າຍເພື່ອລາຍງານການຈັດຕັ້ງປະຕິບັດວຽກງານໃນແຕ່ລະໄລຍະໃຫ້ການຊາບ.
ນອກຈາກນີ້ທັງສອງຝ່າຍຍັງໄດ້ປືກສາຫາລືກ່ຽວກັບວຽກງານການປ້ອງການກັນລະບາດພະຍາດສັດລ້ຽງທີ່ຈະເກີດຂື້ນຕາມລະດຸການຢູ່ລຽບຕາມຊາຍແດນລາວ – ຈີນ ຕື່ມອີກ. ໃນຕອນທ້າຍຂອງພິທີ ທັງສອງຝ່າຍຍັງໄດ້ຮ່ວມກັນລົງນາມເຊັ່ນບົດບັນທືກຮ່ວມກັນລະຫ່ວາງແຂວງຜົ້ງສລີ ແຫ່ງ ສປປ ລາວ ກັບ ນະຄອນຜູ່ເອີ ແຂວງຢຸນນານແຫ່ງ ສປ ຈີນ ໂດຍຕ່າງໜ້າຝ່າຍແຂວງຜົ້ງສາລີເຊັ່ນໂດຍທ່ານ ພູຈອນ ພົມມະຈັນ ຮອງຫົວໜ້າພະແນກກະສີກຳ ແລະ ປ່າໄມ້ແຂວງຜົ້ງສາລີ ແລະ ທ່ານ ລີ ຈີ ເຫີງ ຮອງຫົວໜ້າຫ້ອງການ ປ່າໄມ້, ທົ່ງຫຍ້າ ນະຄອນຜູ່ເອີ ໂດຍຊ່ອງໜ້າຈາກພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.
( ພາບ – ຂ່າວ: ແສງຄຳ ສາລີວັນ )
