ໃນວາລະການດໍາເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII ຄັ້ງວັນທີ 30 ຕຸລາ 2020 ສະມາຊິກສະພາແຫ່ງຊາດພ້ອມກັນພິຈາລະນາຮັບຮອງການແຕ່ງຕັ້ງ ບຸກຄະລາກອນຂອງລັດຖະບານ ບາງຕໍາແໜ່ງຕາມການສະເໜີຂອງນາຍົກລັດຖະມົນຕີແຫ່ງ ສປປ ລາວ.
ທ່່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກ່າວວ່າ: ໃນວາລະທໍາອິດຂອງກອງປະຊຸມໃນມື້ນີ້ວັນທີ 30 ຕຸລາ 2020 ກອງປະຊຸມພວກເຮົາຈະໄດ້ພິຈາລະນາຄໍາສະເໜີຂອງທ່ານນາຍົກລັດຖະມົນຕີ ກ່ຽວກັບການຍົກຍ້າຍ ແລະ ການແຕ່ງຕັ້ງບຸກຄະລາກອນຂອງລັດຖະບານ; ອີງຕາມກົດໝາຍວ່າດ້ວຍສະພາແຫ່ງຊາດສະບັບປັບປຸງປີ 2020 ໂດຍສະເພາະມາດຕາ 33 ຂໍ້ 2.3. 2.9 ກ່ຽວກັບການຍົກຍ້າຍສະມາຊິກລັດຖະບານແມ່ນສິດ ແລະ ໜ້າທີ່ຂອງຄະນະປະຈໍາສະພາແຫ່ງຊາດ.
ສະນັ້ນ, ໃນຕອນແລງວານນີ້ ວັນທີ 29 ຕຸລາ 2020 ກອງປະຊຸມຄະນະປະຈໍາສະພາແຫ່ງຊາດ ກໍ່ໄດ້ມີການປຶກສາຫາລື ແລະ ເຫັນດີຕາມການສະເໜີຂອງທ່ານນາຍົກລັດຖະມົນຕີ ກ່ຽວກັບການຍົກຍ້າຍສະມາຊິກລັດຖະບານຈໍານວນ 2ທ່ານ ເຊິ່ງມີລາຍລະອຽດດັ່ງນີ້: 1 ເຫັນດີຍົກຍ້າຍທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້ ໄປຮັບໜ້າທີ່ໃໝ່ເປັນລັດຖະມົນຕີປະຈໍາສໍານັກງານນາຍົກລັດຖະມົນຕີ; 2 ເຫັນດີຍົກຍ້າຍ ທ່ານ ເພັດ ພົມພິພັກ ລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ໄປຮັບໜ້າທີ່ໃໝ່ເປັນລັດຖະມົນຕີກະຊວງກະສິກໍາ ແລະ ປ່າໄມ້.
ສໍາລັບການສະເໜີແຕ່ງຕັ້ງສະມາຊິກລັດຖະບານຕາມການສະເໜີຂອງນາຍົກລັດຖະມົນຕີ ແມ່ນຈະພິຈາລະນາ ແລະ ຮັບຮອງເອົາໃນວາລະມື້ນີ້.
ຈາກນັ້ນທ່ານ ນາງ ສວນສະຫວັນ ວິຍະເກດ ຄະນະປະຈຳສະພາແຫ່ງຊາດ, ເລຂາທິການສະພາແຫ່ງຊາດ ໄດ້ຂຶ້ນຜ່ານຄຳສະເຫນີຂອງນາຍົກລັດຖະມົນຕີວ່າດ້ວຍການແຕ່ງຕັ້ງທ່ານ ຄໍາເຈນ ວົງໂພສີ ຮອງຫົວໜ້າຄະນະໂຄສະນາອົບຮົມສູນກາງພັກ ໄປຮັບໜ້າທີ່ເປັນ ລັດຖະມົນຕີຫົວໜ້າຫ້ອງວ່າການສໍານັກງານນາຍົກລັດຖະມົນຕີ ແລະ ສະເໜີແຕ່ງຕັ້ງ ທ່ານ ທອງຈັນ ມະນີໄຊ ຮອງລັດຖະມົນຕີກະຊວງພາຍໃນ ຂຶ້ນເປັນ ລັດຖະມົນກະຊວງພາຍໃນ.
ພາຍຫຼັງການພິຈາລະນາຢ່າງຖີ່ຖ້ວນ ແລະ ກົງໄປກົງມາ ຕາມຊີວະປະຫວັດ, ຄຸນວຸດທິການສຶກສາ ແລະ ການເຄື່ອນໄຫວວຽກງານຕົວຈິງ ຂອງບັນດາທ່ານ ທີ່ໄດ້ຖືກແຕ່ງຕັ້ງ , ສສຊ ກໍໄດ້ພ້ອມກັນລົງຄະແນນສຽງຮັບຮອງເອົາການແຕ່ງຕັ້ງບຸກຄະລາກອນຂັ້ນການນຳຂອງລັດຖະບານ.
