ອ້ອຍເປັນພືດເສດຖະກິດທີ່ສໍາຄັນຊະນິດໜຶ່ງ ທີ່ໃຊ້ເປັນວັດຖຸດິບໃນການຜະລິດນໍ້າຕານ ແລະ ຜະລິດຕະພັນຕ່າງໆ ເພື່ອນໍາໃຊ້ ແລະ ບໍລິໂພກໃນປະເທດເຮົາ.
ອ້ອຍນອກຈາກຈະສາມາດຜະລິດເປັນນໍ້າຕານ ຫຼື ຂອງຫວານຕ່າງໆແລ້ວ ຍັງສາມາດຜະລິດເປັນເຫຼົ້າແວງ, ເຫຼົ້າ 90, ເຫຼົ້າຂາວປະເພດຕ່າງໆເປັນສ່ວນປະສົມຂອງຢາປົວພະຍາດ. ນອກຈາກນີ້, ສິ່ງເສດເຫຼືອຈາກອ້ອຍ ຍັງໃຊ້ເປັນອາຫານສັດ, ຜະລິດເປັນເຈ້ຍ ແລະ ຝຸ່ນບົ່ມໄດ້ອີກ.
ແນວໃດກໍຕາມ, ດັ່ງທີ່ຜູ້ຂຽນກ່າວມາຂ້າງເທິງ ອ້ອຍເຕັມໄປດ້ວຍຄຸນປະໂຫຍດທີ່ ສໍາຄັນຍັງພົບເຫັນຫຼາຍຢູ່ຕາມສວນຄົວຂອງປະຊາຊົນລາວເຮົາ ແຕ່ເພື່ອໃຫ້ການປູກອ້ອຍມີປະສິດທິຜົນດີນັ້ນຕ້ອງປູກ ແລະ ເບິ່ງແຍງເອົາໃຈໃສ່ໃຫ້ຖືກວິທີ. ດັ່ງນັ້ນ, ຄວາມຮູ້ກະສິກໍາໃນມື້ນີ້ຜູ້ຂຽນຈຶ່ງໄດ້ຮຽບຮຽງເອົາວິທີການປູກອ້ອຍແບບຖືກຕ້ອງມາໃຫ້ທຸກທ່ານນໍາໄປທົດລອງນໍາກັນ.
ການຄັດເລືອກພື້ນທີ່ປູກອ້ອຍ: ຕ້ອງເປັນສະຖານທີ່ທີ່ນໍ້າຖ້ວມບໍ່ເຖິງ, ດິນຕ້ອງບໍ່ເປັນດິນຄ້ອຍຊັນເກີນໄປ ເມື່ອເລືອກສະຖານທີ່ໄດ້ແລ້ວກໍຕ້ອງເລືອກລະດູປູກ ເຊິ່ງລະດູທີ່ເໝາະສົມແມ່ນເອີ້ນໄດ້ວ່າປູກໄດ້ເກືອບຕະຫຼອດປີ ຍົກເວັ້ນໃນໄລຍະທີ່ມີຝົນຕົກໜັກເກີນໄປ ຄື: ເດືອນກັນຍາຫາຕຸລາ.
ດ້ານການກຽມດິນ: ຄວນສັງເກດເບິ່ງດິນເສຍກ່ອນວ່າພື້ນທີ່ດິນໃນສວນເປັນແນວໃດ ເຊັ່ນ: ຮາບພຽງ, ເນີນສູງ ຫຼື ຄ້ອຍຊັນໄປທາງໃດທາງໜຶ່ງ ຫາກບໍ່ສະໝໍ່າສະເໝີຄວນປັບໃຫ້ມັນສະໝໍ່າສະເໝີກ່ອນ ແຕ່ຕ້ອງໃຫ້ມີຄວາມຄ້ອຍຊັນເລັກໜ້ອຍ ( ບໍ່ເກີນ 3% ) ທັງນີ້ກໍເພື່ອບໍ່ໃຫ້ມີນໍ້າຂັງ, ຫຼັງຈາກນັ້ນກຽມໄຖດິນ ໂດຍຕ້ອງໄຖຂະນະທີ່ດິນມີ ຄວາມຊຸ່ມຊື່ນພໍດີ ບໍ່ແຫ້ງ ຫຼື ປຽກເກີນໄປ ເພາະດິນທີ່ຊຸ່ມສາມາດໄຖພວນໄດ້ສະດວກ ແລະ ດິນຈະຜຸຜຸ່ຍດີ, ການໄຖແມ່ນໄຖໃຫ້ເລິກເທົ່າທີ່ຈະເຮັດໄດ້, ໄຖຫຼາຍໆຄັ້ງເພື່ອໃຫ້ດິນຜຸຜຸ່ຍດີ.
ການກຽມທ່ອນພັນ: ຫຼັງເລືອກແນວພັນໄດ້ແລ້ວ ໃຫ້ນໍາທ່ອນພັນມາຕັດໃຫ້ເປັນ 3 ຕາ; ຕັດລະຫວ່າງເຄິ່ງກາງປ້ອງ ຂະນະຕັດທ່ອນພັນພະຍາຍາມບໍ່ໃຫ້ຕາຊໍ້າ ແລະ ກະທົບກະເທືອນຫຼາຍ. ຕໍ່ມາແຊ່ທ່ອນພັນດ້ວຍຢາຂ້າເຊື້ອຣາທັນທີທີ່ຕັດເປັນທ່ອນ ຖ້າປ່ອຍໄວ້ເຊື້ອຣາຈະເຂົ້າທາງຮອຍຕັດໄດ້. ຫຼັງຈາກນັ້ນ, ນໍາມາແຊ່ຕໍ່ໃນນໍ້າຮ້ອນປະມານ 50 ອົງສາເຊໄລຍະ 2 ຊົ່ວໂມງ ເພື່ອກໍາຈັດພະຍາດໃບຂາວທີ່ຕິດມາກັບທ່ອນພັນແລ້ວນໍາໄປປູກທັນທີ.
ສ່ວນການປູກ ມີ 2 ວິທີຄື: ການປູກດ້ວຍແຮງງານຄົນ ແລະ ການປູກດ້ວຍເຄື່ອງປູກ; ຫາກປູກດ້ວຍແຮງງານຄົນໃຫ້ໃຊ້ວິທີການຍົກຄູກ່ອນ ແລ້ວຈຶ່ງວາງທ່ອນພັນລົງຕາມໄລຍະປູກ ພ້ອມທັງປົກດິນໜາ 3 – 5 ຊັງຕີແມັດ ສໍາລັບຍາມຝົນ, ແຕ່ຖ້າປູກໃນລະດູແລ້ງຄວນປົກໜາ 20 ຊັງຕີແມັດ ເມື່ອປົກດິນແລ້ວ ຄວນຢຽບໃຫ້ແໜ້ນພໍສົມຄວນ ເພື່ອຫຼຸດການລະເຫີຍຂອງນໍ້າອອກຈາກດິນ ແລະ ໃຫ້ທ່ອນພັນຕິດສະໜິດກັບດິນ.
ຫາກປູກດ້ວຍເຄື່ອງປູກ ຫຼັງຈາກກຽມດິນແລ້ວບໍ່ຕ້ອງຍົກ ຄູ ສາມາດນໍາໃຊ້ເຄື່ອງຈັກປູກໄດ້ເອງ ເຊິ່ງວິທີນີ້ ອ້ອຍຈະມີ ຄວາມງອກງາມສະໝໍ່າສະເໝີດີ.
ທີ່ມາ: ລາວ 44 ຂໍ້ມູນຂ່າວສານເພື່ອການພັດທະນາ
