ກອງປະຊຸມທາງໄກ ASEAN Senior Officials Meeting ຄັ້ງທີ 38 ໂດຍ ສສ ຫວຽດນາມເປັນເຈົ້າພາບ ໄດ້ສໍາເລັດລົງດ້ວຍໝາກຜົນທີ່ຈົບງາມ ເຊິ່ງ ທ່ານ ອາຄົມເດດ ວົງໄຊ ຫົວໜ້າກົມແຜນການ ແລະ ການຮ່ວມມື ກະຊວງພະລັງງານ ແລະ ບໍ່ແຮ່ ນໍາພາຄະນະຜູ້ແທນ ສປປ ລາວເຂົ້າຮ່ວມກອງປະຊຸມດັ່ງກ່າວ.
ຈຸດປະສົງຂອງກອງປະຊຸມ ເພື່ອເປັນການລາຍງານໝາກຜົນ, ບັນດາໜ້າວຽກ ແລະ ກິດຈະກຳຕ່າງໆທີ່ໄດ້ຈັດຕັ້ງສໍາເລັດໃນແຜນວຽກການຮ່ວມມືພະລັງງານອາຊຽນ APAEC ໄລຍະ1 ( 2016 – 2020 ) ທັງເປັນການທົບທວນຕໍ່ຮ່າງແຜນວຽກ ແລະ ບັນດາແຜນງານຕ່າງໆ ( Programme area ) ທີ່ນອນໃນຮ່າງ APAEC ໄລຍະ 2 ( 2021 – 2025 ) ກ່ອນຈະເປັນສະບັບສຸດທ້າຍ ເພື່ອເອົາເຂົ້າຮັບຮອງໃນກອງປະຊຸມ AMEM ຄັ້ງທີ 38.
ໂດຍລວມ ສປປ ລາວ ແມ່ນເຫັນດີເປັນເອກະພາບໃນການສະໜັບສະໜູນແກ່ວຽກງານການຮ່ວມມືດ້ານພະລັງງານອາຊຽນ ໂດຍສະເພາະແມ່ນຊຸກຍູ້ການສົ່ງເສີມພະລັງງານໄຟຟ້ານໍ້າຕົກທີ່ເປັນພະລັງງານສະອາດ ແລະ ເປັນທ່າແຮງຂອງ ສປປ ລາວ ລວມທັງການຍາດແຍ່ງເອົາການຮ່ວມມືກັບບັນດາປະເທດຄູ່ເຈລະຈາໃນວຽກພະລັງງານອາຊຽນ.
ຄຽງຄູ່ກັນນີ້, ກໍໄດ້ເຂົ້າຮ່ວມກອງປະຊຸມ 4 ຝ່າຍປະກອບມີ: ປະເທດລາວ, ໄທ, ມາເລເຊຍ ແລະ ສິງກະໂປ ເພື່ອຮ່ວມກັນປຶກສາຫາລືຕໍ່ຂອບສັນຍາການຮ່ວມມືໃນໂຄງການສະໜອງພະລັງງານໄຟຟ້າຈາກ ສປປ ລາວ ຫາປະເທດສິງກະໂປ ( LTMS PIP ) ຈໍານວນ 100 MW ເຊິ່ງຄາດວ່າຈະໄດ້ເຊັນ MOU ລະຫວ່າງ 4 ປະເທດໃນເດືອນພະຈິກ 2020 ຢູ່ໃນວາລະຂອງກອງປະຊຸມ AMEM ຄັ້ງທີ 38 ແລະ ໃຫ້ສາມາດເລີ່ມຈັດຕັ້ງປະຕິບັດໂຄງການຫຼັງຈາກປີ 2021.
ກອງປະຊຸມດັ່ງກ່າວມີຂຶ້ນໃນລະຫວ່າງວັນທີ 24 – 27 ສິງຫາ 2020 ຜ່ານມານີ້.
( ເນື້ອໃນ – ຮູບ: ກົມແຜນການ ແລະ ການຮ່ວມມື )
