ກ້າວເຂົ້າສູ່ລະດູການຜະລິດເຂົ້ານາປີ ປະຈໍາປີ 2020 ທົ່ວປະເທດລ້ວນພວມກະກຽມໃສ່ລະດູການດັ່ງກ່າວ ເວົ້າລວມ ເວົ້າສະເພາະ ເມືອງເຊບັ້ງໄຟ ແຂວງຄໍາມ່ວນ ຕັ້ງເປົ້າຈະສູ້ຊົນຜະລິດເຂົ້ານາປີປີນີ້ໃຫ້ໄດ້ເນື້ອທີ່ 8.600 ເຮັກຕາ ພ້ອມຄາດຈະຕົກກ້າໃຫ້ສໍາເລັດໃນເດືອນມິຖຸນານີ້.
ຕາມການລາຍງານຈາກ ທ່ານ ຈັນໄທ ສີຈັນທິລາດ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງເຊບັ້ງໄຟ ແຂວງຄຳມ່ວນ ໃນວັນທີ 28 ພຶດສະພາ 2020 ຜ່ານມານີ້ວ່າ: ໃນລະດູການຜະລິດເຂົ້ານາປີ ປີນີ້, ເມືອງເຊບັ້ງໄຟ ມີແຜນການປູກເຂົ້ານາປີຕາມເນື້ອທີ່ໃນທົ່ວເມືອງ 8.600 ເຮັກຕາ, ເຊິ່ງມາຮອດປັດຈຸບັນ ລົງມືຕົກກ້າໄດ້ແລ້ວ 12 ໂຕນ ແລະ ຜະລິດແບບນາຝາຍ (ນາຫວ່ານ) ໄດ້ແລ້ວ 515 ເຮັກຕາ, ຄາດຄະເນການຕົກກ້າໃຫ້ສຳເລັດໃນເດືອນມິຖຸນາ 2020.
ທ່ານ ຈັນໄທ ສີຈັນທິລາດ ຍັງໃຫ້ຮູ້ຕື່ມວ່າ: ສຳລັບ ການຜະລິດເຂົ້ານາແຊງຂອງກະສິກອນໃນທົ່ວເມືອງເຊບັ້ງໄຟ ຕາມເນື້ອທີ່ແຜນການ 2.400 ເຮັກຕາ, ສາມາດຈັດຕັ້ງປະຕິບັດຕົວຈິງໄດ້ 2.579 ເຮັກຕາ, ລື່ນແຜນການ 179 ເຮັກຕາ, ສະເລ່ຍສະມັດຕະພາບ 5,6 ໂຕນຕໍ່ເຮັກຕາ, ລວມຍອດຜົນຜະລິດ 14 ພັນໂຕນ. ສາເຫດທີ່ເຮັດໃຫ້ລື່ນແຜນການ ຍ້ອນສະພາບການຜະລິດເຂົ້ານາປີຂອງປະຊາຊົນຖືກນ້ຳຖ້ວມ 2 ປີຕິດຕໍ່ກັນໃນໄລຍະຜ່ານມາ ພໍ່ແມ່ປະຊາຊົນຈຶ່ງມີຄວາມກະຕືລືລົ້ນໃນການຜະລິດເຂົ້ານາແຊງຫລາຍຂຶ້ນ ບວກກັບລາຄາເຂົ້າທີ່ສູງຂຶ້ນ ເຊິ່ງເປັນປັດໄຈເຮັດໃຫ້ປະຊາຊົນສຸມໃສ່ປູກເຂົ້ານາແຊງຫລາຍຂຶ້ນ.
ສຳລັບແຜນການຕ້ານແລ້ງ-ຕ້ານຖ້ວມໃນປີນີ້ ແມ່ນໄດ້ອອກແຈ້ງການລົງເຖິງອຳນາດການປົກຄອງ ແລະ ພໍ່ແມ່ປະຊາຊົນທີ່ມີໂຄງການຊົນລະປະທານ ແລະ ຝາຍນ້ຳລົ້ນເພື່ອຫ້າງຫາກະກຽມເປັນຕົ້ນ ການກວດກາຫົວງານ, ຄອງເໝືອງ, ການຊັບໄຟໄດ ແລະ ອື່ນໆ ເພື່ອກຽມຄວາມພ້ອມຮອງຮັບໃນເວລາສຸກເສີນ.
ຂໍ້ມູນຈາກ: ປະເທດລາວ