ຂີງແມ່ນສະໝຸນໄພທີ່ນິຍົມນຳມາປຸງແຕ່ງເປັນປະເພດເຄື່ອງດື່ມເພື່ອສຸຂະພາບຫຼາຍສົມຄວນ ເພາະລົດຊາດທີ່ທີ່ເຜັດເປັນເອກະລັກທີ່ມາພ້ອມສັບພະຄຸນໃນການຊ່ວຍຂັບລົມ, ຊ່ວຍແກ້ອາການແໜ້ນທ້ອງ, ຊ່ວຍຂັບລົມອອກຈາກລຳໄສ້ ແລະ ແກ້ອາການທ້ອງອືດໄດ້ເປັນຢ່າງດີ. ແຕ່ຖ້າຈະເຮັດເຄື່ອງດື່ມທີ່ມີແຕ່ຂີງຕະຫຼອດກໍ່ອາດຈະເບື່ອ ທົດລອງນຳມາປະສົມແບບຄ໋ອກເທລ (Cocktail) ເພື່ອປ່ຽນລົດຊາດໃໝ່ເຂົ້າມາຊີມແລ້ວຈະຕິດໃຈ ແລະ ຍັງຊ່ວຍເພີ່ມຄວາມສົດຊື່ນໃຫ້ຮ່າງກາຍພ້ອມ.
ສ່ວນປະກອບ:
1 ນ້ຳຕານ 200 ກຣາມ.
2 ນ້ຳສະອາດ 2 ຖ້ວຍນ້ອຍ.
3 ຂີງຊອຍບາງໆ 1 ຫົວນ້ອຍ.
4 ນ້ຳໝາກໜອດສົດ 1 ຖ້ວຍນ້ອຍ.
5 ແກ່ນໝາກໜອດ 1/2 ຖ້ວຍນ້ອຍ.
6 ນ້ຳໝາກນາວ 1 ບ່ວງແກງ.
7 ເຫຼົ້າລຳ 1 ບ່ວງແກງ.
8 ໂຊດາເຢັນໆ 1-2 ແກ້ວ.
9 ນ້ຳກ້ອນຕາມໃຈມັກ.
10 ໃບຫອມມິ້ນສຳລັບແຕ່ງໜ້າ.
ຂໍ້ແນະນຳ: ສຳລັບເຫຼົ້າລຳ (Rum) ເປັນເຫຼົ້າທີ່ຜະລິດມາຈາກອ້ອຍ ຫຼື ກາກນ້ຳຕານດ້ວຍການໝັກ ແລະ ຕອງ ກໍລະນີຈະເຮັດເຄື່ອງດື່ມໃຫ້ເດັກດື່ມຮ່ວມນຳກໍ່ບໍ່ໃສ່ເຫຼົ້າລຳກໍ່ໄດ້ ໂດຍສ່ວນໃຫຍເຫຼົ້າລຳມັກຈະນຳໄປປະກອບເຂົ້າໃນການປຸງແຕ່ງອາຫານປະເພດນ້ຳຊ໋ອດ ຫຼື ໝັກຊີ້ນເຮັດສະເຕັກຕ່າງໆ.
ວິທີປະສົມ:
ເອົານ້ຳໃສໝໍ້ຄ້າງໄຟແຮງພໍຟົດກໍ່ໃຫ້ໃສ່ນ້ຳຕານ ແລະ ຂີງລົງໄປແລ້ວຜ່ອນເປັນໄຟອ່ອນໆຕົ້ມຕໍ່ໄປເລື້ອຍໆອີກປະມານ 10 ນາທີ. ຈາກນັ້ນ, ກໍ່ປົງລົງປະໄວ້ໃຫ້ເຢັນກ່ອນຈຶ່ງນ້ຳເຊື່ອມຂີງທີ່ຕົ້ມໄວ້ນັ້ນມາຕອງເອົາແຕ່ນ້ຳ (ຖ້າມັກຂີງກໍ່ໃສ່ໂດຍບໍ່ຕ້ອງຕອງ) ແລະ ນຳມາປະສົມກັບນ້ຳໝາກໜອດ, ນ້ຳໝາກນາວ ແລະ ເຫຼົ້າລຳຄົນໃຫ້ເຂົ້າກັນດີ.
ສຸດທ້າຍຈຶ່ງໃສ່ແກ່ນໝາກໜອດລົງໄປແລ້ວຄົນໃຫ້ສ່ວນປະສົມເຂົ້າກັນດີ ແລະ ພໍເວລາເສີບໃຫ້ເອົານ້ຳກ້ອນໃສ່ເກືອບເຕັມຈອກແລ້ວຈຶ່ງໃສ່ນ້ຳໝາກນອດທີ່ປະສົມແລ້ວນັ້ນ 1/2 ຈອກ. ສ່ວນທີ່ເຫຼືອແມ່ນໃຫ້ໃສ່ໂຊດາລົງໄປແຕ່ງຈອກດ້ວຍໃບຫອມມິ້ນ ແລະ ຄົນໃຫ້ເຂົ້າກັນເທົ່ານີ້ກໍ່ພ້ອມເສີບແລ້ວ.
ສັບພະຄຸນ: ໝາກໜອດເປັນໝາກໄມ້ທີ່ມີຄຸນຄ່າສູງໃນການຊ່ວຍບຳລຸງສາຍຕາ, ຊ່ວຍບຳລຸງຜິວໃຫ້ນຸ້ມຂຶ້ນ ເບິ່ງແລ້ວອ່ອນກ່ອນໄວ, ຊ່ວຍຫຼຸດຜ່ອນອາການອັກເສບຂອງກະເພາະ, ທີ່ສຳຄັນແມ່ນຊ່ວຍໃນການປິ່ນປົວພະຍາດນອນບໍ່ຫຼັບໄດ້ພ້ອມ ແລະ ຍັງອຸດົມໄປດ້ວຍ ເບຕ້າແຄໂຣທີນ, ວິຕາມິນຊີ, ແຄລຊຽມ, ແມ໋ກ ນີຊຽມ ແລະ ໂພແທສຊຽມ.
